اسلام آباد ،سعودی عرب نے پاکستان کیلئے 5 ارب ڈالر کے ڈیپازٹ میں توسیع کا اعلان کردیا، یہ رقم آئندہ ہفتے تک پاکستان کو منتقل ہونے کی توقع ہے۔

تفصیلات کے مطابق وفاقی وزیر خزانہ محمد اورنگزیب نے واشنگٹن میں پاکستانی سفارتخانے میں میڈیا بریفنگ کے دوران ملک کے لیے ایک بڑی معاشی خوشخبری سناتے ہوئے کہا ہے کہ برادر ملک سعودی عرب نے پاکستان کے زرمبادلہ کے ذخائر کو سہارا دینے کے لیے 3 ارب ڈالر کے اضافی ڈپازٹس فراہم کرنے کا اعلان کیا ہے، یہ رقم آئندہ ہفتے تک پاکستان کو منتقل ہونے کی توقع ہے۔

وزیر خزانہ نے سعودی عرب کی جانب سے پاکستان کی مالی مدد کے حوالے سے اہم تفصیلات بتاتے ہوئے کہا 3 ارب ڈالر کے نئے ڈپازٹس پاکستان کے غیر ملکی زرِ مبادلہ کے ذخائر کو مستحکم کرنے میں مددگار ثابت ہوں گے۔ ان کا کہنا تھا کہ سعودی عرب نے پہلے سے موجود 5 ارب ڈالر کے ڈپازٹس کی مدت میں بھی توسیع کا اعلان کیا ہے، اب یہ رقم سالانہ رول اوور کے بجائے طویل مدت تک پاکستان کے پاس رہے گی۔

وزیر خزانہ نے سعودی ہم منصب محمد بن عبداللہ الجدعان سے ہونے والی ملاقات کو انتہائی سود مند قرار دیتے ہوئے کڑے وقت میں سعودی حمایت پر شکریہ ادا کیا۔ محمد اورنگزیب نے پاکستان کی معاشی سمت کے حوالے سے واضح کیا کہ رواں مالی سال کے اختتام تک پاکستان کے زرمبادلہ کے ذخائر کو 18 ارب ڈالر تک لے جانے کا ہدف مقرر کیا گیا ہے۔

ان کا کہنا تھا کہ سعودی عرب کی جانب سے تین ارب ڈالر کے اضافی ڈپازٹس اگلے ہفتہ پاکستان کومل جائیں گے، بانڈز کی صورت میں بین الاقوامی سرمایہ کاروں کو کی جانے والی تمام ادائیگیاں وقت پر کی جائیں گی۔ وفاقی وزیر نے عالمی سرمایہ کاروں کو دعوت دی کہ پاکستان میں سرمایہ کاری کے بہترین مواقع موجود ہیں اور ملکی کردار کو اب عالمی سطح پر سراہا جا رہا ہے۔

وزیر خزانہ نے اس اہم سفارتی اور معاشی کامیابی کا کریڈٹ وزیراعظم شہباز شریف اور فیلڈ مارشل سید عاصم منیر کی انتھک کوششوں کو دیتے ہوئے نائب وزیراعظم اسحاق ڈار اور گورنر اسٹیٹ بینک جمیل احمد کے تعاون کو بھی سراہا۔

یو این آئی۔ ع ا۔

اسلام آباد، پاکستان کے وزیراعظم شہباز شریف، امریکہ۔ایران مذاکرات کے دوسرے دور سے قبل، سعودی عرب، قطر اور ترکیہ کا چار روزہ سفارتی دورہ کریں گے۔

پاکستان وزارتِ خارجہ نے آج بروز بدھ جاری کردہ بیان میں کہا ہے کہ “وزیراعظم محمد شہباز شریف 15 سے 18 اپریل کی تاریخوں میں سعودی عرب، قطر اور جمہوریہ ترکیہ کے سرکاری دورے کریں گے”۔ بیان میں کہا گیا ہے کہ سعودی عرب اور قطر کے دورے “دو طرفہ تعلقات کے تناظر” میں ہوں گے جبکہ ترکیہ میں وزیراعظم شہباز شریف ‘انطالیہ ڈپلومیسی فورم’ میں شرکت کریں گے اور صدر رجب طیب اردوعان سمیت دیگر رہنماؤں سے دو طرفہ ملاقاتیں کریں گے۔ دوروں میں وزیراعظم شہباز شریف کے وفد میں وزیر خارجہ اسحاق ڈار اور دیگر اعلیٰ حکام بھی شامل ہوں گے۔

واشنگٹن اور تہران نےکئی دہائیوں کے بعد گزشتہ ہفتے کے آخر میں اسلام آباد میں پہلے رُو بہ رُو مذاکرات کئے ہیں۔ یہ ملاقات امریکہ اور اسرائیل کے ایران پر حملے سے شروع ہونے والی چھ ہفتوں سے زیادہ طویل جنگ کو ختم کرنے کی کوششوں کا حصّہ ہے۔ ایران کے جوابی حملوں نے سعودی عرب اور قطر سمیت خلیج میں امریکی اتحادیوں کو نشانہ بنایا جس کے نتیجے میں خطے سے توانائی کی برآمدات میں بھی رکاوٹ پیدا ہوئی تھی۔ اگرچہ ‘اسلام آباد مذاکرات’ کسی حتمی معاہدے کے بغیر ختم ہو گئے تھے تاہم امریکہ کے صدر ڈونلڈ ٹرمپ نے منگل کے روز کہا ہے کہ مذاکرات اسی ہفتے اسلام آباد میں دوبارہ شروع ہو سکتے ہیں۔

امریکہ کی جانب سے ایران کی بحری ناکہ بندی کے احکامات کے باوجود فریقین کے درمیان نازک جنگ بندی اگلے ہفتے تک برقرار رہے گی۔ پاکستان وزارتِ خزانہ نے بدھ کے روز جاری کردہ اعلان میں دورہ سعودی عرب کے بارے میں کہا ہے کہ پاکستان اور سعودی عرب کے درمیان گہرے تعلقات ہیں۔ ریاض، پاکستان کے زرمبادلہ کے ذخائر کو سہارا دینے کے لیے 3 ارب ڈالر فراہم کرے گا۔ اس امداد کا اعلان پاکستان کی جانب سے متحدہ عرب امارات کو اربوں ڈالر قرضہ واپس کرنے کے اعلان سے چند دن بعد کیا گیا ہے۔ وزارتِ خزانہ نے مزید کہا ہے کہ سعودی عرب میں موجود 5 ارب ڈالر کے ڈیپازٹس کی مدت میں بھی غیر معینہ مدت کے لیے توسیع کر دی جائے گی۔

یو این آئی۔ ع ا۔

اسلام آباد، پاکستان میں تعینات ایرانی سفیر رضا امیری مقدم نے اسلام آباد مذاکرات کو پائیدار سفارتی فریم ورک کی بنیاد قرار دے دیا۔

سوشل میڈیا پلیٹ فارم ایکس پر جاری اپنے بیان میں ایرانی سفیر رضا امیری مقدم نے کہا کہ اسلام آباد مذاکرات ایونٹ نہیں بلکہ ایک عمل ہے جس نے پائیدار سفارتی فریم ورک کی بنیاد رکھ دی۔

رضا امیری مقدم نے کہا کہ وزیر اعظم پاکستان شہباز شریف اور فیلڈ مارشل سید عاصم منیر کا نیک نیتی پر مبنی اقدام پر شکریہ ادا کرتے ہیں، پاکستانی اداروں نے مذاکرات کے انعقاد کو یقینی بنانے کیلیے انتھک کام کیا۔

انہوں نے کہا کہ پاکستانی حکومت، فوج، پولیس اور سکیورٹی فورسز کی انتھک کوششوں سے مذاکرات کا انعقاد ہوا، مہمانوں کو پُرامن، منظم اور باوقار ماحول فراہم کرنے پر پاکستان کے شکر گزار ہیں، پاکستانی سکیورٹی فورسز نے مذاکرات کیلیے بہترین لاجسٹک سہولیات فراہم کیں۔ ’ایرانی ٹیم نے قومی مفادات اور عوامی حقوق کے تحفظ کیلیے باوقار مذاکرات کیے جس کا مقصد ایرانی عوام کے جائز حقوق کو یقینی اور محفوظ بنانا ہے۔ اگر اعتماد اور عزم مضبوط ہو تو یہ عمل تمام فریقین کے مفاد میں ہوگا۔‘

یو این آئی۔ ع ا۔