نئی دہلی، وزیر اعظم نریندر مودی نے کہا ہے کہ آسٹریا کے چانسلر کرسچین اسٹاکر کے دورہ ہند سے دونوں ممالک کے درمیان تجارت اور سرمایہ کاری کے شعبے میں نئی توانائی آئے گی اور مختلف شعبوں میں آسٹریا کی مہارت اور ہندوستان کی رفتار و وسعت دنیا کے لیے قابل بھروسہ سپلائی چین کو یقینی بنائے گی دونوں ممالک دفاع، سیمی کنڈکٹر، کوانٹم اور بایو ٹیکنالوجی کے شعبوں میں بھی اپنی شراکت داری کو مضبوط کریں گے۔ ہندوستان اور آسٹریا نے تعلیم کے شعبے میں تعاون کے لیے ایک مفاہمت نامہ پر دستخط کیے ہیں اور مائگریشن اینڈ موبلٹی ایگریمنٹ کو نرسنگ کے شعبے میں بھی آگے بڑھانے کا فیصلہ کیا ہے۔ دونوں ممالک نے نوجوانوں کے تبادلے کے پروگرام کے تحت ہالی ڈے پروگرام شروع کرنے کا بھی اعلان کیا ہے۔

جناب مودی نے دورہ ہند پر آئے ہوئے جناب اسٹاکر کے ساتھ بات چیت کے بعد جمعرات کو یہاں مشترکہ پریس بیان میں کہا کہ ہندوستان-آسٹریا شراکت داری کو اختراع اور مستقبل کی ضروریات پر مبنی بنانے کی ضرورت ہے۔ انہوں نے کہا کہ دونوں ممالک کا پختہ یقین ہے کہ فوجی تصادم سے مسائل کا حل ممکن نہیں اور ہم یوکرین اور مغربی ایشیا میں مستقل امن کے حامی ہیں۔ انہوں نے مزید کہا کہ ہندوستان اور آسٹریا دونوں ہی عالمی اداروں میں اصلاحات کے پرزور حامی ہیں اور دہشت گردی کو جڑ سے اکھاڑ پھینکنا ہماری مشترکہ عہد بستگی ہے۔

جاری ۔ یواین آئی ۔ایف اے

نئی دہلی، وزیر اعظم نریندر مودی نے جمعرات کے روز کہا کہ آج سے شروع ہونے والا پارلیمنٹ کا خصوصی اجلاس ملک میں خواتین کو بااختیار بنانے کی سمت ایک “تاریخی قدم” ہے، جس سے عوامی زندگی میں خواتین کے وقار اور نمائندگی کو آگے بڑھانے کے حکومت کے عزم کی عکاسی ہوتی ہے۔

سوشل میڈیا پلیٹ فارم ‘ایکس’ پر ایک پوسٹ میں وزیراعظم مودی نے کہا، “آج سے شروع ہونے والے پارلیمنٹ کے خصوصی اجلاس کے ذریعے ہمارا ملک خواتین کو بااختیار بنانے کی سمت ایک تاریخی قدم اٹھانے جا رہا ہے۔ ہماری ماؤں اور بہنوں کا احترام ملک کا احترام ہے، اور اسی جذبے کے ساتھ ہم اس سمت مضبوطی سے آگے بڑھ رہے ہیں۔”

ایک سنسکرت شلوک کا حوالہ دیتے ہوئے وزیر اعظم نے مزید کہا، “تم ابھرو اور اپنی کرنوں سے دنیا کو منور کرو۔ کنوا خاندان کے رشیوں نے خوشحالی اور فراوانی کے لیے اپنی حمدوں کے ذریعے تمہیں پکارا ہے،” جس کے ذریعے انہوں نے قومی ترقی میں خواتین کے مرکزی کردار پر ثقافتی اور فلسفیانہ زور دیا۔

یہ تبصرے ایک ایسے وقت میں سامنے آئے ہیں جب پارلیمنٹ کا ایک نایاب خصوصی اجلاس طلب کیا گیا ہے جس میں قانون ساز اداروں میں خواتین کی نمائندگی بڑھانے کی تجاویز سمیت اہم قانون سازی کے اقدامات متوقع ہیں۔ حکومت نے مسلسل ایسے اقدامات کو جامع ترقی اور صنفی مساوات کو یقینی بنانے کی ایک وسیع مہم کے طور پر پیش کیا ہے۔

خواتین کو بااختیار بنانے کا معاملہ ہندوستان کے سیاسی منظرنامہ میں ایک مرکزی نقطہ رہا ہے، جہاں یکے بعد دیگرے آنے والی حکومتیں فیصلہ سازی کے اداروں میں خواتین کی شرکت بڑھانے کے طریقہ کار پر بحث کرتی رہی ہیں۔ اگرچہ خواتین کے ریزرویشنچ کے حوالے سے قانون سازی کی کوششیں برسوں تک نشیب و فراز کا شکار رہی ہیں، لیکن موجودہ سیشن پر سب کی نظریں جمی ہوئی ہیں کہ آیا دیرینہ66 وعدوں کو عملی جامہ پہنانے کے لیے کوئی ٹھوس قدم اٹھایا جاتا ہے یا نہیں۔

وزیر اعظم مودی کا یہ پیغام اس سیشن کے رخ کا تعین کرتا ہے، جہاں خواتین کو بااختیار بنانے کو نہ صرف ایک پالیسی ترجیح بلکہ قومی فخر اور ثقافتی اقدار کے معاملے کے طور پر پیش کیا گیا ہے۔

یواین آئی۔ م س

چنڈی گڑھ، پنجاب کے ضلع فتح گڑھ صاحب میں منگل کی رات ایک افسوسناک حادثہ پیش آیا، جب زائرین کو لے جانے والی ایک بس ہمت پورہ گاؤں کے قریب الٹ گئی، جس کے نتیجے میں سات افراد کی موت ہوگئی جبکہ 21 زخمی ہوگئے۔

یہ تمام افراد بیساکھی کی تقریبات میں شرکت کے بعد سری آنند پور صاحب سے واپس آ رہے تھے۔ مرنے والوں میں خواتین اور بچے بھی شامل ہیں۔ جاں بحق ہونے والوں میں دو بھائی لکھبیر سنگھ اور ہرویر سنگھ بھی شامل ہیں، جو مین ماجری گاؤں کے رہائشی تھے۔

حادثہ رات تقریباً 9:30 بجے پیش آیا، جب بس میں اچانک خرابی پیدا ہوئی جس کے باعث ڈرائیور گاڑی پر قابو نہ رکھ سکا۔ بس سڑک سے نیچے اتر گئی، ایک بجلی کے کھمبے سے ٹکرائی اور الٹ گئی۔

حادثے میں بچ جانے والے مسافروں کے مطابق ٹکر کے بعد کچھ دیر کے لیے بس میں بجلی دوڑ گئی، جس سے خوف و ہراس پھیل گیا۔ قریبی گاؤں والے شور سن کر موقع پر پہنچے اور پھنسے ہوئے مسافروں کو باہر نکالا، تاہم انہوں نے امدادی گاڑیوں کی آمد میں تاخیر کی شکایت بھی کی۔

سینئر پولیس افسران، جن میں ایس ایس پی ڈاکٹر شُبھم اگروال شامل ہیں، جلد ہی موقع پر پہنچ گئے اور ریسکیو آپریشن کی نگرانی کی۔ ان کے مطابق حادثہ مین ماجری سے محض ڈیڑھ کلومیٹر کے فاصلے پر پیش آیا، جہاں مسافروں کو اترنا تھا۔

زخمیوں میں سے 12 کو مورِنڈا کے اسپتال منتقل کیا گیا، جبکہ 9 افراد کو فتح گڑھ صاحب میں داخل کیا گیا۔ کئی شدید زخمیوں کو بہتر علاج کے لیےپی جی آئی چندی گڑھ ریفر کیا گیا ہے۔

مرنے والوں میں جگوندر سنگھ، اقبال سنگھ ، لکھبیر سنگھ، ہرویر سنگھ، پردیپ کور، رنجیت کور اور کلویندر سنگھ (کجّل شامل ہیں۔

مقامی حکام کے مطابق بس کو موقع سے ہٹا دیا گیا ہے اور علاقہ صاف کر دیا گیا ہے۔ گاؤں کے لوگ پوری رات پولیس کے ساتھ مل کر امدادی کاموں میں حصہ لیتے رہے۔

یو این آئی۔ ایم جے،