نئی دہلی، دہلی میں طلبہ کے احتجاجی مظاہرے اور کانگریس لیڈروں کے خلاف پولیس کارروائی پر کانگریس صدر ملکارجن کھرگے اور پارٹی کی جنرل سکریٹری پرینکا گاندھی واڈرا نے مرکزی حکومت کو جم کر نشانہ بنایا دونوں لیڈروں نے الزام لگایا کہ حکومت طلبہ کی آواز دبانے اور اپوزیشن کو ڈرانے کی کوشش کر رہی ہے مسٹر کھرگے نے کہا کہ بھارتیہ جنتا پارٹی  راشٹریہ سویم سیوک سنگھ کے لوگ بغیر کسی شناخت یا بیج کے پولیس کے درمیان کام کر رہے ہیں اور بلا واسطہ طور پر طلبہ نیز کانگریس لیڈروں کو ڈرانے دھمکانے کا کام کر رہے ہیں۔ انہوں نے خبردار کرتے ہوئے کہا کہ اگر حکومت طلبہ کے ساتھ ساتھ کانگریس کے سینئر لیڈروں کو بھی کچلنے کی کوشش کرے گی تو ملک بھر میں لاکھوں لوگ ان کی حمایت میں کھڑے ہوں گے اور حالات حکومت کے کنٹرول سے باہر ہو جائیں گے۔ کانگریس صدر نے کہا کہ بعد میں حکومت کو پچھتانا پڑے گا کہ اس نے مسٹر راہل گاندھی، پرینکا گاندھی واڈرا اور دیگر اپوزیشن لیڈروں کے ساتھ ایسا سلوک کیوں کیا۔ انہوں نے دہرایا کہ کانگریس اور انڈیا الائنس کسی بھی دباؤ سے ڈرنے والے نہیں ہیں اور اپنی لڑائی جاری رکھیں گے۔

وہیں کانگریس کی جنرل سکریٹری پرینکا گاندھی نے کہا کہ ان کے ساتھ کیا ہوا، یہ اہم نہیں ہے، بلکہ اصل سوال یہ ہے کہ طلبہ کے ساتھ جو سلوک کیا گیا، وہ صحیح ہے یا غلط۔ انہوں نے کہا کہ طلبہ اپنے جائز مطالبات اور اپنے حقوق کے لیے جدوجہد کر رہے ہیں نیز نظامِ تعلیم میں تبدیلی چاہتے ہیں۔ انھوں نے کہا کہ ملک میں بار بار امتحانی سوالنامے لیک ہو رہے ہیں اور حکومت نوجوانوں کو روزگار دینے میں بھی ناکام رہی ہے، جس سے کروڑوں نوجوانوں کا مستقبل متاثر ہو رہا ہے۔ انہوں نے کہا کہ جمہوریت میں پرامن احتجاج کرنا شہریوں کا آئینی حق ہے لیکن طلبہ کے ساتھ سڑک پر اور پارلیمنٹ کے اندر جو سلوک ہو رہا ہے، وہ پوری طرح غیر جمہوری ہے۔

انہوں نے الزام لگایا کہ پارلیمنٹ میں اپوزیشن کو اہم موضوعات پر بحث کرنے کا موقع نہیں دیا جاتا۔ انہوں نے کہا کہ جب اپوزیشن اسپیکر سے اس سلسلے میں بات کرتی ہے تو انہیں حکومت سے بحث کی یقین دہانی کرائی جاتی ہے لیکن حقیقت یہ ہے کہ جمہوری بات چیت کی گنجائش مسلسل کم ہوتی جا رہی ہے۔

یو این آئی۔ ایف اے

نئی دہلی، کانگریس نے ‘چھاتروں کی گونج’ مہم کے تحت بدھ کو ملک بھر کے کالجوں، یونیورسٹیوں، کوچنگ اداروں، ہاسٹلوں اور دیگر تعلیمی احاطوں میں طلبہ کے ساتھ بات چیت کا پروگرام منعقد کرنے کا فیصلہ کیا کانگریس کے جنرل سکریٹری کے سی وینوگوپال نے آج ضروری پریس ریلیز جاری کرتے ہوئے کہا کہ مسلسل ہو رہے سوالناموں کے لیک، امتحانات میں تاخیر، بھرتی کے عمل میں غیر یقینی صورتِ حال، تعلیم کی بڑھتی لاگت اور بڑھتی بے روزگاری جیسے مسائل کو لے کر طلبہ کی آواز کو منظم طریقے سے اٹھانے کے لیے یہ مہم چلائی جا رہی ہے۔ مسٹر وینوگوپال نے کہا کہ لوک سبھا میں قائدِ حزبِ اختلاف راہل گاندھی نے 17 جون کو راجستھان کے کوٹہ سے ‘چھاتروں کی گونج’ مہم کی شروعات کی تھی، جسے 17 جولائی کو دہرادون میں آگے بڑھایا گیا۔ اس مہم کا مقصد ملک کے نظامِ تعلیم کو استحصالی نظام سے آزاد کرانا اور طلبہ کے مسائل پر عوامی دباؤ بنانا ہے۔

بیان کے مطابق منگل کو کانگریس صدر ملکارجن کھرگے، راہل گاندھی، پرینکا گاندھی واڈرا اور دیگر سینئر لیڈروں نے یہاں طالب علم مظاہرین پر پولیس کارروائی کی مخالفت میں وزیرِ اعظم رہائش گاہ کے باہر پرامن مظاہرہ کیا لیکن پولیس نے ان کے ساتھ بدسلوکی کیے جانے کا الزام لگایا۔ پارٹی لیڈروں نے کہا کہ ملک کے نوجوانوں کے ساتھ کھڑا ہونا، نظامِ تعلیم کی جواب دہی یقینی بنانا اور طلبہ کے مستقبل کی حفاظت کرنا ان کی اجتماعی ذمہ داری ہے۔ پارٹی نے اپنے لیڈروں سے کہا ہے کہ آج وہ متعلقہ شہروں کے کوآرڈینیٹرز کے ساتھ پروگرام منعقد کر کے ‘چھاتروں کی گونج’ مہم پر پریس کانفرنس کریں۔ مسٹر گاندھی کی کوٹہ تقریر اور پریزنٹیشن کے ذریعے پیپر لیک، امتحان میں تاخیر، بھرتی میں غیر یقینی صورتِ حال اور بے روزگاری جیسے مسائل کو طلبہ کے سامنے رکھیں۔ ساتھ ہی طلبہ کو مہم سے جڑنے اور اپنے تجربات نیز تجاویز شیئر کرنے کے لیے حوصلہ افزائی کریں۔

یو این آئی۔ ایف اے

نئی دہلی، کانگریس سمیت مختلف اپوزیشن پارٹیوں کے اراکینِ پارلیمنٹ نے وزیرِ تعلیم دھرمیندر پردھان کو برطرف کرنے کے مطالبے حق میں بدھ کو پارلیمنٹ ہاؤس کے مکر دوار پر مظاہرہ کیا لوک سبھا اور راجیہ سبھا کی کارروائی ایک گھنٹے کے لیے ملتوی ہونے کے بعد اپوزیشن اراکینِ پارلیمنٹ، پارلیمنٹ ہاؤس کے مکر دوار پر جمع ہوئے۔ انہوں نے ہاتھوں میں بینر اور تختیاں لے کر مسٹر پردھان کو برطرف کرنے کا مطالبہ کرتے ہوئے نعرے بازی کی۔ مظاہرے کے دوران اپوزیشن اراکینِ پارلیمنٹ نے الزام لگایا کہ طلبہ کے ساتھ ہو رہی ناانصافی کی اصل وجہ سوالناموں کے لیک ہونے کے واقعات ہیں اور اس کے لیے وزیرِ تعلیم ہی پوری طرح ذمہ دار ہیں۔ انہوں نے کہا کہ اخلاقی ذمہ داری لیتے ہوئے مسٹر پردھان کو ہٹایا جانا چاہیے۔

اراکینِ پارلیمنٹ کے ہاتھوں میں ‘دھرمیندر پردھان کو برطرف کرو’ جیسے نعرے لکھی تختیاں بھی تھیں۔

مظاہرے میں کانگریس صدر اور راجیہ سبھا میں قائدِ حزبِ اختلاف ملکارجن کھرگے، لوک سبھا میں قائدِ حزبِ اختلاف راہل گاندھی، کانگریس کی جنرل سکریٹری محترمہ پرینکا گاندھی واڈرا، کے سی وینوگوپال، گورو گوگوئی، دیپیندر سنگھ ہڈا، گرجیت سنگھ اوجلا، ڈی ایم کے، سماجوادی پارٹی کے اکھلیش یادو، دھرمیندر یادو، اودھیش پرشاد، رام گوپال یادو، ترنمول کانگریس کے سوگت رائے اور کلیان بنرجی سمیت اپوزیشن پارٹیوں کے متعدد اراکینِ پارلیمنٹ شامل ہوئے۔

یو این آئی۔ ایف اے