واشنگٹن، آبنائے ہرمز کے قریب امریکی ہیلی کاپٹر گرائے جانے کے بعد خطے میں جنگ کے خدشات بڑھ گئے، امریکی فوج نے ایران پر حملے شروع کردیے۔

امریکی نیوز چینل سی این این کی رپورٹ کے مطابق عالمی سطح پر کشیدگی میں ایک بار پھر اضافہ ہوگیا ہے۔ امریکی سینٹرل کمانڈ نے کہا ہے کہ امریکی ہیلی کاپٹر مار گرانے کے جواب میں ایران کے خلاف حملے شروع کیے گئے۔

رپورٹ کے مطابق امریکی فوج نے اعلان کیا ہے کہ آبنائے ہرمز کے قریب امریکی آرمی کے اپاچی ہیلی کاپٹر کو مار گرائے جانے کے بعد ایران کے خلاف جوابی فضائی حملے شروع کر دیے گئے ہیں، امریکی فوج ایران میں صرف مخصوص اہداف کو نشانہ بنارہی ہے۔

اس سے قبل امریکی صدر ڈونلڈ ٹرمپ نے اپنے بیان میں کہا تھا کہ امریکہ کو “اس حملے کا لازمی طور پر جواب دینا تھا، جبکہ وائٹ ہاؤس کی جانب سے خطے میں مزید فوجی اقدامات کا عندیہ بھی دیا گیا ہے۔ اس حوالے سے دو امریکی حکام نے دعویٰ کیا ہے کہ امریکی اپاچی ہیلی کاپٹر کو ایرانی ڈرون نے نشانہ بنایا۔ ایک ذریعے کے مطابق حملے میں شاہد ڈرون استعمال کیا گیا، تاہم امریکی حکام کا کہنا ہے کہ ابھی یہ واضح نہیں ہو سکا کہ ہیلی کاپٹر کو دانستہ طور پر نشانہ بنایا گیا یا وہ کراس فائر کا شکار ہوا۔

دوسری جانب ایرانی وزیر خارجہ عباس عراقچی نے غیر ملکی افواج کو آبنائے ہرمز سے نکل جانے کا مشورہ دیتے ہوئے خبردار کیا ہے کہ خطے میں موجود بیرونی افواج انسانی غلطیوں، حادثات یا ممکنہ کراس فائر کے باعث مسلسل خطرات سے دوچار رہیں گی۔ تجزیہ کاروں کے مطابق امریکہ، ایران اور اسرائیل کے درمیان بڑھتی ہوئی کشیدگی مشرق وسطیٰ کو ایک بڑے تنازع کی طرف دھکیل سکتی ہے، جبکہ آبنائے ہرمز میں پیدا ہونے والی صورتحال عالمی تیل رسد اور بین الاقوامی تجارت پر بھی اثر انداز ہو سکتی ہے۔

یو این آئی۔ ع ا۔

تہران، تہران کے نائب وزیر خارجہ کاظم غریب آبادی نے کہا ہے کہ ایران نے جان بوجھ کر کسی امریکی ہیلی کاپٹر کو نشانہ نہیں بنایا۔

ایران کے نائب وزیر خارجہ کاظم غریب آبادی نے الجزیرہ کو بتایا کہ اتوار کے روز آبنائے ہرمز کے اوپر تباہ ہونے والے امریکی اپاچی ہیلی کاپٹر کو ایران نے جان بوجھ کر نشانہ نہیں بنایا تھا۔ کاظم غریب آبادی نے کہا کہ علاقے میں کشیدہ فوجی صورت حال کے باعث اس نوعیت کے واقعات غیر ارادی طور پر پیش آسکتے ہیں۔

انھوں نے کہا ”ایران اس حملے کے پیچھے نہیں تھا۔ آبنائے ہرمز میں کشیدہ ماحول کے باعث ایسے واقعات غیر ارادی طور پر رونما ہو سکتے ہیں۔ آبنائے ہرمز کے اوپر امریکی ہیلی کاپٹر کو ایران کی جانب سے جان بوجھ کر نشانہ نہیں بنایا گیا تھا۔”

ایران نے بحرین اور اردن میں امریکی فوجی اڈوں پر ڈرون اور میزائل داغ دیے ادھر ایرانی سرکاری میڈیا نے بھی رپورٹ کیا کہ فوجی ذرائع نے بتایا ہے کہ ایران نے آبنائے ہرمز میں 24 گھنٹوں کے دوران کوئی فضائی کارروائی نہیں کی تھی۔ تاہم دوسری طرف ایران کے وزیر خارجہ عباس عراقچی نے ایک بیان میں کہا ہے کہ امریکہ نے ”ہمارے عزم کو آزمانے” کا راستہ اختیار کیا ہے اور ایران کی مسلح افواج ”کسی بھی حملے یا دھمکی کو بغیر جواب کے نہیں چھوڑیں گی۔” انھوں نے مزید کہا ”اگر آپ محفوظ رہنا چاہتے ہیں تو ہمارے خطے سے نکل جائیں۔”

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ ایران کے اپاچی ہیلی کاپٹر کو تباہ کرنے کے جواب میں کیے گئے امریکی حملوں کے باوجود ایران کے ساتھ معاہدہ اب بھی ممکن ہے۔

مسٹر ٹرمپ نے اے بی سی نیوز سے گفتگو کرتے ہوئے کہا، ’’میرا ماننا ہے کہ سختی سے جواب دینا چاہیے۔ میں نے اپنی پوری زندگی اسی طرح کام کیا ہے۔ ہمارے درمیان ایک بہت اچھا معاہدہ ہوا تھا اور ممکن ہے کہ آئندہ بھی ہوگا۔‘‘

انہوں نے ہیلی کاپٹر کی تباہی کے جواب میں امریکہ کے حملوں کو نہایت مضبوط اور انتہائی سخت ردِعمل قرار دیا۔

مسٹر ٹرمپ نے منگل کے روز دعویٰ کیا تھا کہ آبنائے ہرمزمیں گشت کے دوران اسلامی جمہوریہ نے ایک امریکی ہیلی کاپٹر مار گرایا تھا۔ صدر نے زور دے کر کہا کہ اس حملے کا جواب امریکہ کو ضرور دینا چاہیے۔

امریکی سینٹرل کمان نے کہا کہ اس نے اپنے دفاع میں حملے کیے ہیں۔ امریکہ نے آبنائے ہرمز کے اطراف فضائی افواج اور ریڈار سسٹم کو نشانہ بنایا۔

امریکی حملوں کے بعد ایران کے وزیر خارجہ عباس عرقچی نے کہا کہ ایرانی فوج کسی بھی حملے یا دھمکی کا جواب دیے بغیر نہیں چھوڑے گی۔ انہوں نے امریکہ سے مطالبہ کیا کہ وہ اس خطے کو چھوڑ دے۔

یواین آئی۔الف الف