تہران ، ایرانی فوجی حکام نے خبردار کیا ہے کہ متحدہ عرب امارات نےسوچےسمجھےبغیرکوئی اقدام کیا تو اس کے مفادات ایران کا ہدف ہوں گے۔

تفصیلات کے مطابق خلیجی خطے میں کشیدگی کے سائے مزید گہرے ہو گئے ہیں۔ ایران نے متحدہ عرب امارات پر حملے کے منصوبے کی تردید کر دی ہے، لیکن ساتھ ہی ایک کڑی وارننگ بھی جاری کی۔

ایرانی سرکاری میڈیا نے سینئر فوجی حکام کے حوالے سے واضح کیا ہے کہ تہران متحدہ عرب امارات پر حملے کا کوئی ارادہ نہیں رکھتا۔ تاہم، تہران نے یو اے ای کو خبردار کیا ہے کہ وہ “شیشے کے گھر” میں بیٹھا ہے اور اگر اس نے کوئی بھی غیر سنجیدہ قدم اٹھایا تو اماراتی مفادات ایرانی میزائلوں کا ہدف بن سکتے ہیں۔ ایرانی حکام کا کہنا تھا کہ یو اے ای کی ناقص سیکیورٹی اس کے لیے مہلک خطرہ ثابت ہو سکتی ہے۔

دوسری جانب سمندری حدود کے حوالے سے ایرانی پاسدارانِ انقلاب نے دوٹوک پیغام دیا ہے کہ بین الاقوامی شپنگ کمپنیاں امریکی تحفظ کی خام خیالی میں نہ رہی، آبنائے ہرمز سے گزرنے کے لیے ایرانی اجازت لازمی ہے، ورنہ جہازوں کو بزور طاقت روکا جائے گا۔ ایرانی فوج نے دعویٰ کیا ہے کہ حالیہ کارروائی میں امریکی جنگی جہازوں کو سخت وارننگ دے کر آبنائے ہرمز میں داخل ہونے سے روک دیا گیا ہے۔ فجیرہ میں آئل فیسلٹی پر ہونے والے حملے کے حوالے سے ایرانی حکام کا کہنا ہے کہ یہ واقعہ سراسر امریکی مہم جوئی کا نتیجہ ہے امریکہ نے آبنائے ہرمز میں ایک غیر قانونی گزرگاہ بنانے کی کوشش کی جس سے یہ صورتحال پیدا ہوئی۔ تہران نے عالمی برادری سے مطالبہ کیا ہے کہ خطے میں عدم استحکام پیدا کرنے پر امریکہ کو ذمہ دار ٹھہرایا جائے۔

یو این آئی۔ ع ا۔

تہران، ایرانی وزیر خارجہ عباس عراقچی نے ایکس پر تازہ ٹویٹ میں کہا کہ آبنائے ہرمز میں پیش آنے والے واقعات یہ واضح کرتے ہیں کہ کسی سیاسی بحران کا فوجی حل ممکن نہیں ہے۔

عباس عراقچی نے لکھا کہ پاکستان کی مخلصانہ کوششوں سے مذاکرات میں پیش رفت ہو رہی ہے، ایسے میں امریکہ کو چاہیے کہ وہ بدخواہوں کی وجہ سے دوبارہ کسی دلدل میں گھسیٹے جانے سے ہوشیار رہے۔ انھوں نے کہا کہ خطے کی صورت حال کے پیشِ نظر یہی احتیاط متحدہ عرب امارات کو بھی برتنی چاہیے۔

ایرانی وزیر خارجہ کا آبنائے ہرمز کے سلسلے میں نئی امریکی منصوبہ بندی سے متعلق کہنا تھا کہ ’پروجیکٹ فریڈم‘ دراصل ’پروجیکٹ ڈیڈ لاک‘ ہے۔ انھوں نے اشارہ دیا کہ پاکستان کی ثالثی میں جو مذاکرات کامیابی سے آگے بڑھ رہے ہیں، اس منصوبے سے اس میں ایک بار پھر ڈیڈ لاک واقع ہو جائے گا۔

واضح رہے کہ امریکہ کا ایک نیا منصوبہ سامنے آیا ہے جس کے تحت امریکی بحریہ آبنائے ہرمز میں پھنسے ہوئے یا خطرے میں موجود تجارتی جہازوں کو گائیڈ اور اسکاٹ کرے گی، تاکہ وہ محفوظ طریقے سے آبنائے ہرمز سے گزر سکیں۔ آبنائے ہرمز دنیا کی اہم ترین آئل روٹ ہے اور یہاں کشیدگی کے باعث ہزاروں جہاز متاثر ہوئے، امریکی منصوبے کا مقصد آزادانہ جہاز رانی بحال کرنا ہے، امریکا کا الزام ہے کہ اس نے جہازوں پر حملے کیے، راستے محدود کیے یا کنٹرول کرنے کی کوشش کی، اور پروجیکٹ فریڈم اس صورت حال کے جواب میں شروع کیا جا رہا ہے۔ اس پروجیکٹ کے تحت امریکی بحری جہاز (ڈسٹرائرز) تجارتی جہازوں کے ساتھ چلیں گے، فضائی نگرانی، ڈرونز اور میزائل دفاعی نظام استعمال ہوگا، اور ہزاروں امریکی فوجی اور درجنوں جنگی وسائل تعینات کیے جا رہے ہیں۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ ایران جنگ ختم ہونے پر پیٹرول کی قیمتیں تیزی سے کم ہوجائیں گی۔ وہ آج بھی خود کو ایسا ہی محسوس کرتے ہیں جیسا پچاس سال پہلے محسوس کرتے تھے۔

واشنگٹن میں بزنس سمٹ سے خطاب کرتے ہوئے ڈونلڈ ٹرمپ نے کہا کہ آدمی کی صحت خراب ہو تو پتا چل جاتا ہے جیسے پچھلی امریکی انتظامیہ میں پتہ چل جاتا تھا۔ ان کا کہنا تھا کہ چین کے صدر سے ملاقات کا منتظر ہوں، چین کا دورہ اہم ہوگا۔

امریکی صدر نے کہا کہ ایران کے 159 جہاز ڈبو دیے، میری تو خواہش تھی کہ ان پر قبضہ کیا جاتا۔ انہوں نے مزید کہا کہ ویت نام میں ہم نے 19 سال گزارے، کوریا میں سات سال گزارے، اب ایران کے معاملے میں لوگ کہتے ہیں کہ اتنی دیر کیوں ہو رہی ہے۔ ٹرمپ ایران جنگ سے متعلق صحافیوں کے سوالوں کے جواب دیے بغیر تقریب سے روانہ ہوگئے۔

یو این آئی۔ ع ا۔