خبراردو:

جنوبی کشمیر کے ہوم شالی بگ حلقہ انتخاب سے تعلق رکھنے والے نیشنل کانفرنس کے سینئر لیڈر اور سابق ایم ایل اے عبدالمجید لارمی نے دعویٰ کرتے ہوئے کہا کہ پارٹی آنے والے اسمبلی انتخابات میں مضبوط عوامی منڈیت حاصل کرکے ہی دم لے گی۔ انہوں نے دعویٰ کیا کہ نیشنل کانفرنس رواں برس منعقد ہونے والے اسمبلی انتخابات میں پی ڈی پی، کانگریس اور دیگر سیاسی پارٹیوں کا زمینی سطح پر مکمل صفا یا کرے گی۔ لارمی کا کہنا تھا کہ میں نے اپنے حلقہ انتخاب میں عوام کی فلاح و بہبود کے لیے بہت ساری کوششیں کیں جن میں کالج کا قیام، بجلی کی فراہمی اور سڑکوں کی تعمیر و ترقی شامل ہیں۔ این سی لیڈر کا کہنا تھا کہ میں نے ایم ایل اے اور ایم ایل سی کی حیثیت سے اپنے حلقہ انتخاب کے لوگوں کے لیے وہ کچھ کیا جو گزشتہ 20برسوں کے دوران دیگر سیاسی پارٹیوں نے نہیں کیا۔ ’میں نے حلقہ انتخاب کے ہر گاؤں اور دیہات میں بجلی کی فراہمی کویقینی بنانے کے لیے ٹھوس اقدامات اُٹھائے، میں نے یہاں بجلی پول، تاریں لگوائیں تاکہ لوگوں کو بہتر سہولیات میسر ہو۔

انہوں نے بتایا کہ یہاں کے لوگوں کی دیرینہ مانگ تھی کہ نوجوان لڑکوں اور لڑکیوں کے لیے ایک کالج ہو ، میں نے اس کے لئے اسمبلی اور بورڈ میٹنگیں میں بھی زورو شور کے ساتھ آواز اُٹھائی اور اس بات کو ممکن بنایا کہ نوجوانوں لڑکوں اور لڑکیوں کے لیے ڈگری کالج ممکن ہوجائے۔انہوں نے کہا کہ فی الوقت میرے حلقہ انتخاب میں 42کروڑ کی لاگت سے تعمیر ہونے والے کھڈونی سنگم روڑ پر بھی کام جاری ہے اور میں پرامید ہوں کہ مستقبل قریب میں یہ راستہ بھی لوگوں کے لیے دستیاب رہے گا۔ایک سوال کے جواب میں این سی لیڈر کا کہنا تھا کہ حلقہ انتخاب ہوم شالی بگ میں آزادی کا جذبہ موجود ہے اور لوگ اس جذبے کے ساتھ وابستہ ہے۔

انہوں نے بتایا کہ یہاں پر جماعت اسلامی والوں کا کافی اثر ہے اور لوگ ان کے نظریہ سے بے حد متاثر دکھائی دے رہے ہیں تاہم اب لوگوں کو بھی یہ بات اچھی طرح سمجھ میں آئی ہے کہ بائیکاٹ کرنے سے کسی کا بھی بھلا نہیں ہوتا ہے۔ انہوں نے بتایا کہ حلقہ انتخابات میں 1977سے ہی لوگ جماعت اسلامی کے ساتھ وابستہ ہے اورجذبہ آزادی کے ساتھ لگاؤ رکھتے ہیں تاہم ایسے لوگوں کو بھی اب اس بات کا فہم حاصل ہوچکا ہے کہ انتخابات کا بائیکاٹ کرنے سے کچھ بھی حاصل ہونے والا نہیں ہے۔ عبدالمجید لارمی کا کہنا تھا کہ ہم نے گزشتہ پرس پنچایتی انتخابات کا بائیکاٹ کیا لیکن میں ذاتی طور پر اس کو ایک بہت بڑی غلطی سے تعبیر کرتا ہوں کیوں کہ ہمارے بائیکاٹ کا غیروں نے فائدہ اُٹھاکر وادی کشمیر میں اپنی پوزیشن مضبوط بنائی۔ انہوں نے بتایا کہ یہاں کی مجموعی آبادی جس جذبہ آزادی کے ساتھ وابستہ ہیں ہم بھی چاہتے ہیں کہ اُس مسئلہ کو سیاسی سطح پر ڈائیلاگ کے ذریعے حل کیا جائے۔انہوں نے بتایا کہ پارٹی کے نائب صدر اور سابق وزیر اعلیٰ عمر عبداللہ نے تو ببانگ دہل اسمبلی میں اس بات کا اعلان کیا کہ مسئلہ کشمیر کو فوجی قوت یا دھونس دباؤ سے حل نہیں کیا جاسکتا بلکہ اس کے لیے ساسی سطح پر پہل کی ضرورت ہے۔انہوں نے بتایا کہ پارٹی کے بانی مرحوم شیخ محمد عبداللہ نے بھی مسئلہ کشمیر کو سیاسی سطح پر حل کرنے کی وکالت کی۔ انہوں نے 1953کو وزیر اعظم جواہر لعل نہرو کے سامنے اس بات کا کھلا اعلان کیا کہ ہمیں اپنا حق دیا جائے لیکن بدقسمتی سے اُس کی مرکزی قیادت نے مرحوم شیخ محمد عبداللہ کی بات سننے کے بجائے انہیں جیل میں ڈال دیا۔

عبدالمجید لارمی کا کہنا تھا کہ مرحوم شیخ محمد عبداللہ 22سال تک جیل میں رہے تاہم اس دوران نئی دہلی نے یہاں بخشی، میر قاسم، صادق اور مفتی پیدا کرکے یہاں کے نظام کو درہم برہم کردیا۔ انہوں نے بتایا کہ جیل سے باہر آنے کے بعد 1975میں مرحوم شیخ محمد عبداللہ نے جو ایکارڈ کیا اُس کاالگ پس منظر تھاکیوں کہ اُس وقت حال ہی میں پاک بھارت جنگ کے نتیجے میں مشرقی پاکستان ’بنگلہ دیش‘ الگ ہوچکا تھا اور اس ساری صورتحال کو سامنے رکھتے ہوئے پاکستان انتہائی کمزور ہوا تھا اور بھارت کو بھی اس بات کا شدت کے ساتھ احساس ہونے لگا تھا کہ اس طرح کا طریق کار دیرپا نہیں ہوسکتا۔این سی لیڈر کا کہنا تھا کہ مرحوم شیخ محمد عبداللہ ریاست کی اٹانومی کوبحال کرنے کی خاطر ہی 1975میں ایکار ڈعمل میں لایا اور اُس وقت نئی دہلی نے بھی مرحوم کو یقین دہائی کرائی کہ ریاست کی اندرونی خود مختاری کو فوری طور پر بحال کردیا جائیگا لیکن بدقسمتی کے ساتھ مرحوم شیخ محمد عبداللہ اس دنیا سے انتقال کرگئے اور نئی دہلی نے اپنی یقین دہانی کو پورا نہیں کیا۔ عبدالمجید لارمی کا کہنا تھا کہ سال 1996میں جونہی نیشنل کانفرنس اقتدار میںآگئی تو اس نے 2002میں ریاست اسمبلی میں اٹانومی سے متعلق قرار داد پاس کرائی تاہم بدقسمتی سے نئی دہلی نے اٹانومی کی قرار داد کو ردی کی ٹوکری میں ڈال دیا۔این سی لیڈر نے بتایا کہ میں ذاتی طور پر اس بات کا اعتراف کرتا ہوں کہ ہمیں اُسی وقت بطور احتجاج اقتدار سے دستبردار ہونا چاہیے تھا لیکن ہم نے عوامی خواہشات کے خلاف جاکر بڑی غلطی کا ارتکاب کیا۔انہوں نے بتایا کہ اگر آنے والے انتخابات میں پارٹی مضبوط منڈیت کے ساتھ اقتدار میں آتی ہے تو ہم اسمبلی میں اٹانومی سے متعلق قرار لائیں گے اور کو پاس کرواکر ہی دم لیں گے۔این سی لیڈر کا کہنا تھا کہ ریاست جموں وکشمیر میں امن کے قیام اور تینوں خطوں جموں، کشمیر اور لداخ میں یکساں تعمیر و ترقی کے لیے اٹانومی واحد حل ہے۔

انہوں نے کہا کہ اگر ریاست میں اٹانومی کو بحال کیا جاتا ہے تو اس کا سب سے بڑا فائدہ جموی عوام کو حاصل ہوگا لیکن فرقہ پرست سیاسی جماعتوں نے وہاں الگ ماحول قائم کرتے ہوئے جموی عوام کے قلب و ذہن میں دوریاں پید اکی ہیں۔ریاست کے تینوں خطوں جموں، کشمیر اور لداخ کے عوام میں پائی جارہی دوریوں پر بات کرتے ہوئے عبدالمجید لارمی کا کہنا تھا کہ اس کے لیے صرف اور پی ڈی پی کے بانی مرحوم مفتی محمد سعید ہی ذمہ دار ہے جنہوں نے فرقہ پرست بی جے پی کے ساتھ سیاسی نکاح کرتے ہوئے ریاستی عوام کی خواہشات کا سودا کیا۔ انہوں نے بتایا کہ سابق مخلوط حکومت کے دورا قدار میں جموی عوام پر فرقہ پرستوں کے کافی تشدد ڈھایا۔ وہاں کی مسلم آبادی کو اپنے آبائی علاقوں سے بے دخل کردیا گیا۔ مسلمان گوجروں کو سدھرا، وجے پور اور بھٹندی جیسے علاقوں سے نکلوایا گیا۔ اگر محبوبہ مفتی اُس وقت جموں میں مسلمانوں پر ہورہی زیادتیوں پر آواز اُٹھائی تو ہم بھی سمجھتے کہ انہیں ریاستی عوام کی فکر لاحق ہے تاہم اب جب کہ موصوفہ اقتدار سے باہر کردی گئی ، لہٰذا اُن کی آواز ڈرامہ بازی کے سوا کچھ بھی نہیں۔عبدالمجید لارمی کا کہنا تھا کہ اگر چہ جنوبی کشمیر کو پی ڈی پی کا گڑھ مانا جاتا ہے تاہم آنے والے اسمبلی انتخاب میں نیشنل کانفرنس پی ڈی پی اوردیگر سیاسی جماعتوں کا صفایا کرنے میں کامیاب ہوجائے گی۔انہوں نے کہا کہ ہمیں اُمید ہے کہ پارٹی جنوبی کشمیر کی 16میں سے 12نشستوں پر جیت درج کرنے میں کامیاب ہوجائے گی۔انہوں نے الزم عائد کرتے ہوئے کہا کہ ایجنسیوں نے نیشنل کانفرنس کا مقابلہ کرنے کی خاطر سجاد غنی لون ، انجینئر رشید اور دیگر نئے چہروں کو میدان میں اُتارا ہے لیکن عوام صرف اور صرف نیشنل کانفرنس کو ہی ووٹ دے گی ۔ سال 2010میں عمر عبداللہ کی سرکار کے وقت وادی کشمیر میں نوجوانوں کی ہلاکت پر لارمی کا کہنا تھا کہ یہ انتہائی بدقسمتی کی بات ہے کہ اُس وقت بہت ساری جانیں ضائع ہوئیں تاہم اُس کے لیے عمر عبداللہ نے عوام سے معافی طلب کی اور میں بھی پارٹی کا ادنی کارکن ہونے کی حیثیت سے اُن ہلاکتوں پر عوام سے معافی طلب کرتا ہوں۔