جموں خطے میں صورتحال دگرگوں،منگل کو بھی اسکول بند
کشتواڑاور کٹھوعہ کے ڈپٹی کمشنروں نے کی ایڈوائزری اوروارننگ جاری ،عوام کو ہوشیار رہنے کا مشورہ
سری نگر:جے کے این ایس : موسلاداربارشوں کے نتیجے میں آبی ذخائر میں پانی کی سطح بڑھ جانے اورمزید بارشیں ہونے کی پیش گوئی کے بیچ حکام نے جموں ڈویڑن میں تمام سرکاری اور نجی اسکولوں کی بندش میں ایک اور دن(26اگست تک) کی توسیع کردی۔

اس دوران ضلع انتظامیہ کشتواڑ نے سوموار کو ہندوستانی محکمہ موسمیات کے الرٹ کے بعد موسم کی ایڈوائزری جاری کی، جس میں جموں و کشمیر بشمول کشتواڑ ضلع25 سے 29 اگست تک بادل پھٹنے، سیلاب، لینڈ سلائیڈنگ اور مٹی کے تودے گرنے کے امکانات کے ساتھ شدید بارش کی وارننگ دی گئی۔ادھرڈپٹی کمشنر کٹھوعہ نے فلڈ ایڈوائزری جاری کی، راوی اور معاون ندیوں میں پانی کی سطح بڑھنے کی وارننگ دی۔جے کے این ایس کے مطابق حکام نے مسلسل خراب موسم اور حفاظتی خدشات کا حوالہ دیتے ہوئے پیر کو جموں ڈویڑن میں تمام سرکاری اور نجی اسکولوں کی بندش میں ایک اور دن کی توسیع کردی۔ڈائریکٹر سکول ایجوکیشن جموں کی طرف سے جاری کردہ ایک حکم نامے میں کہا گیا ہے کہ موسم کی خراب صورتحال کے پیش نظر، یہ حکم دیا جاتا ہے کہ جموں ڈویڑن میں تمام سرکاری اور نجی اسکول کل یعنی 26اگست2025 تک بند رہیں گے۔حکام نے کہا کہ یہ ہدایت مکمل طور پر طلباءاور عملے کی حفاظت کے لیے احتیاطی اقدام کے طور پر لی گئی ہے۔ادھرضلع انتظامیہ کشتواڑ نے سوموار کو ہندوستانی محکمہ موسمیات (آئی ایم ڈی) کے الرٹ کے بعد موسم کی ایڈوائزری جاری کی، جس میں جموں و کشمیر بشمول کشتواڑ ضلع25 سے29 اگست تک بادل پھٹنے، سیلاب، لینڈ سلائیڈنگ اور مٹی کے تودے گرنے کے امکانات کے ساتھ شدید بارش کی وارننگ دی گئی۔ایڈوائزری کے مطابق عوام سے اپیل کی گئی ہے کہ وہ نالے، ندی کے کناروں، سیلاب زدہ علاقوں یا پانی بھرے علاقوں کے قریب جانے سے گریز کریں، ہنگامی سامان تیار رکھیں، چوکس رہیں، اور غیر ضروری سفر سے گریز کریں، خاص طور پر نشیبی اور کمزور علاقوں میں۔ حساس علاقوں میں لوگوں کو مشورہ دیا گیا ہے کہ وہ مقامی حکام کے ساتھ مشاورت سے محفوظ مقامات کی نشاندہی کریں۔تمام متعلقہ محکموں بشمول ریونیو، پی ڈبلیو ڈی (آر اینڈ بی)، پی ایم جی ایس وائی، صحت اور طبی، تعلیم، آبپاشی اور فلڈ کنٹرول، این ایچ آئی ڈی سی ایل، بی آر او اور دیگر کو فوری مدد فراہم کرنے کے لیے ہیڈ کوارٹر میں تعینات فیلڈ اسٹاف کے ساتھ ہائی الرٹ رہنے کی ہدایت کی گئی ہے۔ خراب موسم کی وجہ سے اسکول بند ہونے کی صورت میں، زونل ایجوکیشن آفیسرز سے کہا گیا ہے کہ وہ ڈپٹی کمشنر کو کم از کم ایک دن پہلے مطلع کریں۔تحصیلداروں کو ہدایت کی گئی ہے کہ وہ موسمی حالات کی وجہ سے ہونے والے جانی یا مالی نقصان کی فوری اطلاع دیں۔ڈی سی آفس کشتواڑ میں ڈسٹرکٹ کنٹرول روم ہنگامی ردعمل کے لیے چوبیس گھنٹے فعال رہے گا۔ عوام سے کہا گیا ہے کہ وہ کسی بھی ہنگامی صورتحال کی صورت میں ڈسٹرکٹ کنٹرول روم کے نمبرات پر رابطہ کریں۔دریں اثناءڈپٹی کمشنر کٹھوعہ نے فلڈ ایڈوائزری جاری کی، راوی اور معاون ندیوں میں پانی کی سطح بڑھنے کی وارننگ دی۔ضلع انتظامیہ کٹھوعہ نے حالیہ شدید بارش اور ایگزیکٹیو انجینئر آر ایس ڈی ہیڈکوارٹر-کم-ایمرجنسی پلاننگ مینیجر، چیف انجینئر ڈیموں سے موصول ہونے والی مواصلت کے پیش نظر پیر کے روز ایک فلڈ ایڈوائزری جاری کی، جس میں کسی بھی وقت ڈیم سے پانی کے ممکنہ ریگولیٹڈ اخراج کی وارننگ دی گئی، جس سے دریائے را وی اورمعاون ندی نالوںکے علاقوں میں پانی کی سطح میں اچانک اضافہ ہو سکتا ہے۔ ایڈوائزری کے مطابق دریائے راوی، ا ±جھ نالہ اور ملحقہ معاون ندیوں کے ساتھ نشیبی علاقوں میں رہنے والے مکینوں سے کہا گیا ہے کہ وہ چوکس رہیں اور دریا کے کناروں کے قریب جانے سے گریز کریں۔ لوگوں کو یہ بھی مشورہ دیا گیا ہے کہ وہ اس عرصے کے دوران نہانے، مچھلیاں پکڑنے، یا دریاو ¿ں اور نالہوں میں یا اس کے آس پاس کوئی سرگرمی کرنے سے گریز کریں۔کسانوں کو ہدایت کی گئی ہے کہ وہ اپنے مویشیوں کو آبی ذخائر کے قریب نہ رکھیں اور انہیں فوری طور پر محفوظ مقامات پر منتقل کریں۔

ہنگامی صورتحال کی صورت میں، عوام کو کٹھوعہ کے ضلع کنٹرول روم سے رابطہ کرنے کی ہدایت کی گئی ہے، جو چوبیس گھنٹے کام کرتا ہے۔تمام متعلقہ محکموں کے سب ڈویڑنل مجسٹریٹس، تحصیلداروں اور فیلڈ فنکشنز کو ہدایت کی گئی ہے کہ وہ کسی بھی ناگہانی صورتحال سے نمٹنے کے لیے آدمیوں اور مشینری کو تیار رکھیں۔ڈپٹی کمشنر کٹھوعہ، راجیش شرما (جے کے اے ایس) نے ایڈوائزری جاری کرتے ہوئے عام لوگوں سے چوکنا رہنے، گھبراہٹ سے بچنے اور وقتاً فوقتاً جاری کردہ حفاظتی ہدایات پر سختی سے عمل کرنے کی تاکید کی۔ایڈوائزری کو خطرے سے دوچار علاقوں میں جان و مال کی حفاظت کے لیے ایک احتیاطی اقدام کے طور پر بیان کیا گیا ہے۔