خبراردو:
جنوبی کشمیر کے قصبہ پلوامہ سے 3کلومیٹردور ٹکن علاقے میں فوج کے44RR،سی آر پی ایف اور ایس او جی پلوامہ نے علاقے میں جنگجو ؤں کی موجود گی کی اطلاع موصول ہونے کے بعد علاقے کو محاصرے میں لے کر یہاں گھر گھر تلاشی شروع کی۔فورسز نے ٹکن میں چھپے بیٹھے جنگجوؤں کے محدود کرنے کے لیے ملحقہ علاقوں میں فورسز کے اضافی دستوں کو طلب کرتے ہوئے یہاں کسی کو بھی پر مارنے کی اجازت نہیں دی۔فورسز نے علاقے میں خاردار تاروں کو نصب کرنے کے علاوہ یہاں موبائل بنکروں کی تعیناتی عمل میں لاتے ہوئے جنگجوؤں کے خلاف حتمی کارروائی کا من بناتے ہوئے گھر گھر تلاشیوں کا آغاز کیا۔ اس دوران فورسز کی تلاشی پارٹی نے جونہی اُس مکان کے صحن میں داخل ہونے کی کوشش کی جہاں جنگجو پناہ لیے ہوئے تھے تو جنگجوؤں نے تلاشی پارٹی پر جدید ہتھیاروں سے فائرنگ شروع کی جس کے جواب میں فورسز نے بھی گولیاں چلائی جس کے ساتھ ہی طرفین کے درمیان جھڑپ کا باضابطہ آغاز ہوا۔نمائندے نے بتایا کہ کہ طرفین کی فائرنگ قریباً اڈھ گھنٹے تک جاری رہی جس کے بعد پولیس نے جھڑپ کی جگہ سے حزب المجاہدین سے وابستہ 2مقامی جنگجوؤں کی نعشیں برآمد کیں۔ پولیس نے مارے گئے جنگجوؤں کی شناخت لیاقت احمد ولد منیر احمد وانی ساکن بیلو پلوامہ اور واجد الاسلام ولد مظفر احمدساکن ببہار پلوامہ کیے بطور کی۔پولیس نے تمام قانونی لواز مات پورے کرنے کے بعد نعشوں کو لواحقین کے سپر د کردیا۔

ادھر جاں بحق ہوئے جنگجوؤں کی نعشوں کو آبائی گاؤں پہنچا کر ہزاروں لوگوں کی موجودگی میں سپرد لحد کیا گیا جس دوران یہاں مرد و خواتین کی بڑی تعداد نے اسلام و آزادی کے حق میں فلک شگاف نعرے بلند کئے۔ادھر جنگجوؤں کو مقامی قبرستانوں میں سپرد لحد کرنے کے بعدنوجوانوان نے بیلو میں قائم فورسز کیمپ پر دن بھر پتھراو کیا جس کے نتیجے میں فورسز نے نوجوانوں کو منتشر کرنے کے لئے آنسوں گیس کے درجنوں گولے داغے جہاں آخری اطلاعات ملنے تک علاقے میں جھڑپوں کا سلسلہ جاری تھا۔ ادھر پلوامہ قصبے میں امتحانات سے واپسی کے بعدسہ پہر طلبا کی ایک بڑی تعداد نے بس اسٹینڈ اور دیگر کئی مقامات پر فورسز کی ٹکڑیوں پر پتھراو کیا جس دوران وہاں افراد تفری کا ماحول پیدا ہو ا ۔اس دوران جنگجوؤں کی ہلاکتوں کے خلاف سنیچر کو ضلع بھر میں مکمل ہڑتال رہی جس دوران یہاں معمولات زندگی مکمل طور پر مفلوج رہے۔

نمائندے کے مطابق جنگجوؤں کی ہلاکت کو لے کر ضلع کے مضافات میں مکمل ہڑتال رہی جس دوران یہاں عوامی، تجارتی، کاروباری اور غیر سرکاری سرگرمیاں مفلوج رہیں جبکہ سڑکوں پر سے ٹرانسپوررٹ مکمل طور پر غائب رہا۔انتظامیہ نے ضلع میں امن و قانون کی صورتحال کو برقرار رکھنے اور افواہ بازی پر روک لگانے کے لیے سنیچر صبح سے ہی موبائل انٹرنیٹ سروس کو معطل کردیا۔ خیال رہے جنوبی کشمیر کے ضلع پلوامہ کے ڈار گنائی گنڈ علاقے میں فورسز کے ساتھ جمعہ کی شام کو فورسز کے ساتھ جھڑپ میں ایک غیر ملکی جنگجوجاں بحق ہوا ہے جبکہ جھڑپ کے دوران ایک ایس او جی اہلکار بھی گولی لگنے کی وجہ سے زخمی ہوا۔اس دوران حزب سپریمو سید صلاح الدین نے پلوامہ اور ترال معرکے میں جاں بحق جنگجوؤں کو خراج عقیدت ادا کرتے ہوئے کہا کہ شہدا ہمارے ماتھے کا جھومر ہیں اور اُن کے مقدس لہو کی ہر صورت میں لاج رکھی جائے گی۔ انہوں نے بتایا کہ لیاقت احمد وانی اور واجد الاسلام وفا کے پیکر تھے جنہوں نے جانفشانی کے ساتھ کئی معرکوں میں حصہ لیکر دشمن پر کاری ضربیں لگائیں تھیں۔