رضوان سلطان:

پہلے 21 نومبر کو اچانک اسمبلی تحلیل اور پھر اسکے اگلے روز ہی گورنر ستیہ پال ملک کی صدارت میں ریاستی انتظامی کونسل کی میٹنگ میں جموں کشمیر بنک کے حوالے سے کئی اہم نو عیت کے فیصلے لے کر ریاست کی عوام کو ایک اور جھٹکا دیا گیا. 22 نومبر کو جموں میں ہوئی اس میٹنگ میں جموں کشمیر بنک کی خود مختاری کو ختم کر کے اسے اب ایک پبلک سیکٹر انڈرٹیکنگ بنانے کے منصوبے کو منظوری دے دی گئی ہے ۔

انتظامی کونسل نے کہا کہ جموں کشمیر حق اطلاعات ایکٹ ۲۰۰۹ یعنی RTI کا اطلاق دیگر پبلک سیکٹر انڈر ٹیکنگ کی طرح اب جموں کشمیر بنک پر بھی ہو گا ۔ وہیں بنک کو سنٹرل ویجی لنس کمیشن کے دائرے میں بھی لایا گیا ۔ اور اس طرح اسکی خود مختاری کو ختم کر کے جے کے بنک اب ریاستی قانون سازیہ کے سامنے جواب دہ ہو گا ۔ یعنی بنک کو ریاستی محکمہ خزانہ کی و ساطت سے اپنی سالانہ رپورٹ ریاستی قانون سازیہ کے سامنے پیش کرنا ہوگی ۔

ردعمل :
گورنر انتظامیہ کے اس فیصلے پر وادی میں شورشرابا اٹھنا شروع ہو گیا ہے ۔ این سی نے سرینگر میں اس فیصلے کے خلاف احتجاج کرتے ہوئے گورنر کو آر ایس ایس کا بندہ تک کہہ دیا ، عمر عبداللہ نے کہا گورنر ایک نگران منتظم ہیں اور ان کے پاس لوگون کا منڈیٹ نہیں جو ایسے بڑے فیصلے لیں جن کے دور تک اثرات مرتب ہوں گے ۔ پی ڈی پی کی صدر محبوبہ مفتی نے اس فیصلے پر کہا کہ یہ پریشنان کن ہے کہ جو ہمارے اداروں کے پاس خودمختاری ہے اسے چھینا جا رہا ہے ۔انجینئر رشید نے اس فیصلے کو تباہ کن قرار دے کر کہا کہ یہ فیصلہ ہمیں منظور نہیں ہے ۔میر واعظ عمر فاروق نے نے اسے ریاستی خصوصی پوزیشن اور اقتصادی حالت کیلئے زبردست خطرہ قرار دے کر کہا کہ دلی اب ریاست کے معاشی اداروں پر بھی ہاتھ ڈال رہی ہے ۔کشمیر اکنامک الائینس نے اسے جموں کشمیر بنک کی خود مختاری پر حملہ قرار دے کر کہا کہ اگر یہ فیصلہ واپس نہیں لیا گیا تو ریاست گیر میں احتجاج کا اعلان کیا جائے گا ۔

گورنر انتظامیہ کا دفاع :

اپنے فیصلے کا دفاع کرتے ہوئے گورنر انتظامیہ کا کہنا ہے کہ جے کے بنک کے کام کاج اور بورڈ آف ڈائرکٹرس کے اختیارات میں مداخلت کرنے کا کوئی منسوبہ نہیں اور بنک کا نظم نسق آر بی آئی کے رہنما خطوط کے مطابق ہی چلتا رہئے گا ۔ ریاستی ترجمان نے واضح کیا کہ اس فیصلے کے تین مرکزی جز ہیں ۔
پہلا ۔ جموں کشمیر بنک کو پبلک سیکٹر کرنا۔ اس پر ان کا کہنا تھا کہ ریاستی سرکار کا جمون کشمیر بنک میں ساٹھ فیصد شےئر ہے ، اور لہذا یہ ادارہ ایک عملی طور ایک پبلک سیکٹر انڈرٹیکنگ ہے ۔
دوسرا۔ آر ٹی آئی کے دائرے میں میں لانے سے کام کاج میں مزید شفافیت آئے گئی۔
تیسراَ : انہوں نے کہا کہ جہاں تک سی وی سی یعنی سنٹرل ویجی لنس کمیشن کے رہنما خطوط کی پاسداری کا تعلق ہے تو سرکار کے زیرانتظام تما م بنک ان رہنما خطوط کی پاسداری کرتے ہیں ۔۔
وہیں انہوں نے کہا کہ حال ہی میں کے وائی سی (know your Customer) کی پاسداری نہ کرنے سے آر بی آئی نے جموں کشمیر بنک پر تین کروڑ کا جرمانہ عائد کیا ۔

وہیں انہوں نے کہا کہ بنک کو اپنی سالانہ رپورٹ فائنانس محکمہ کے ذریعے ریاستی قانون سازیہ کے سامنے پیش کرنا ہوگی ، جو پھر سالانہ جنرل میٹنگ کے بعد عوام کے سامنے لائی جائے گی ۔
آپ کو بتادیں ۱۹۳۸ میں قائم کیا گیا جموں کشمیر بنک ملک کا واحد بنک ہے جس کو ریاستی سرکار کی مدد سے چلایا جا رہا ہے اور اس وقت بنک میں ریاست سرکار کی ۶۰ شراکتداری ہے ۔
اور بنکنگ ریگیولیشن ایکٹ کے تحت جے کے بنک اس وقت آر بی آئی کی نگرانی میں کام کر رہا ہے ۔

گورنر کے اس فیصلے سے کئی سوالات کھڑے ہو رہے ہیں ، پہلا ریگیولیشن ایکٹ آر بی آئی کو پرائیویٹ سیکٹر بنکوں پر نگرانی کا اختیار دیتا ہے ، جموں کشمیر بنک جو کہ ایکٹ کے تحت آر بی آئی کے سامنے جوابدہ ہے ، اسے اب ریاستی قانون سازیہ میں جواب دہ کیسے بنایا جاسکتا ہے ؟
دوسرا ترجمان نے کہا کہ ۶۰ فیصد شےئر ریاستی سرکار کا ہونے کی وجہ سے بنک عملی طور پبلک سیکٹر انڈر ٹیکنگ ہے ، تو کیا یہ فیصلہ باقی ۴۰ فیصدشےئر ہولڈرس سے پوچھ کر کیا گیا ہے ۔