واشنگٹن، ایران کی جانب سے جنگ کے خاتمے سے متعلق امریکی تجاویز پر آج ردعمل ظاہر کئے جانے کا امکان ہے۔

امریکی نشریاتی ادارے سی سی این کے مطابق ایران کی جانب سے آج جنگ کے خاتمے سے متعلق امریکی تجاویز پر آج ردعمل دیے جانے کی توقع ہے۔ رپورٹ میں ذرائع کے حوالے سے کہا گیا ہے کہ امریکی اور ایرانی فریق جنگ کے خاتمے کے لیے ایک معاہدے تک پہنچنے کی طرف بڑھ رہے ہیں اور ایران کی جانب سے ثالثوں کو امریکی تجاویز کا جواب دیا جائے گا۔

ایران کی تسنیم نیوز ایجنسی کے مطابق ایرانی اہلکاروں نے بتایا اس معاملے پر دوبارہ غور شروع کر دیا ہے اور جب کسی نتیجے پر پہنچا جائے گا تو ثالث کو مطلع کردیا جائے گا۔

واضح رہے کہ امریکی صدر ڈونلڈ ٹرمپ نے گزشتہ روز ایک بیان میں کہا تھا کہ جنگ ختم کرنے کا بہترین موقع ہے، اور میں سمجھتا ہوں کہ ایران سے معاہدے کے قریب ہیں۔ ممکن ہے کہ اگلے ہفتے دورہ چین سے پہلے یہ معاہدہ ہو جائے۔ انہوں نے امریکی ٹی وی کو انٹرویو میں کہا تھا کہ دیکھتے ہیں معاہدے سے متعلق آگے کیا ہوتا ہے، وٹکوف اور جیرڈ کشنر کو مذاکرات کے لیے بھیجنے کا امکان نہیں، ایران سے ڈیل نہیں ہوتی تو دوبارہ بمباری کر سکتے ہیں۔

یو این آئی۔ ع ا۔

تہران، ایران نے کہا ہے کہ اس کی بندرگاہیں آبنائے ہرمز اور علاقائی سمندروں میں موجود تجارتی جہازوں کو ہر قسم کی بحری خدمات اور معاونت فراہم کرنے کے لیے مکمل طور پر تیار ہیں۔

ایران کی پورٹس اینڈ میری ٹائم آرگنائزیشن نے اپنے بیان میں کہا کہ تجارتی بحری جہازوں کو جہاز رانی سے متعلق خدمات، تکنیکی معاونت اور طبی سہولیات فراہم کرنے کے لیے تمام انتظامات مکمل ہیں۔

بیان میں کہا گیا کہ ایران کی بندرگاہیں خصوصاً آبنائے ہرمز میں موجود جہازوں کو ضروری سپورٹ اور بحری سہولیات مہیا کرنے کی صلاحیت رکھتی ہیں۔

دوسری جانب اقوام متحدہ میں ایرانی مشن نے رکن ممالک سے مطالبہ کیا ہے کہ وہ آبنائے ہرمز سے متعلق امریکہ اور اس کے خلیجی اتحادیوں کی قرارداد کو مسترد کر دیں۔

ایرانی مشن کے مطابق یہ قرارداد بحران کے حل کے بجائے سیاسی مقاصد اور ناقص محرکات پر مبنی ہے۔

ایران نے مؤقف اختیار کیا کہ آبنائے ہرمز میں کشیدگی کا واحد قابل عمل حل مستقل جنگ بندی اور سمندری ناکہ بندی کے خاتمے میں ہے۔

یواین آئی۔ م س

بیروت، بینجمن نیتن یاہو نے دعویٰ کیا ہے کہ اسرائیل کی فوج نے حزب اللہ کی رضوان فورس کے ایک اہم کمانڈر کو ہدف بنا کر ہلاک کر دیا ہے۔اسرائیلی وزیر اعظم نے بدھ کے روز بیان میں کہا کہ اسرائیلی فوج نے بیروت کے مضافاتی علاقے میں کارروائی کرتے ہوئے رضوان فورس کے آپریشنل کمانڈر کو نشانہ بنایا۔

حزب اللہ کے قریبی ذرائع نے غیر ملکی خبر رساں ادارے کو بتایا کہ مارے جانے والے کمانڈر کی شناخت مالک بلوط کے نام سے ہوئی ہے، تاہم حزب اللہ کی جانب سے فوری طور پر باضابطہ تصدیق سامنے نہیں آئی۔

نیشنل نیوز ایجنسی کے مطابق اسرائیلی جنگی طیاروں نے بیروت کے قریب حزب اللہ کے مضبوط گڑھ پر حملہ کیا، جس کے بعد علاقے سے دھواں اٹھتا دیکھا گیا۔

رپورٹس کے مطابق حالیہ مہینوں میں لبنان میں جاری کشیدگی کے دوران یہ حزب اللہ کی کسی اہم شخصیت کو نشانہ بنانے کا بڑا واقعہ قرار دیا جا رہا ہے۔

یہ حملہ ایسے وقت میں سامنے آیا ہے جب ڈونلڈ ٹرمپ نے ایران کے ساتھ ممکنہ امن معاہدے کے لیے مثبت بیان دیا تھا۔

واضح رہے کہ اسرائیل اور لبنان کے درمیان 17 اپریل کو جنگ بندی کا اعلان کیا گیا تھا، تاہم اس کے باوجود سرحدی علاقوں اور بیروت کے مضافات میں کشیدگی اور حملوں کا سلسلہ وقفے وقفے سے جاری ہے۔