واشنگٹن، امریکی صدر ڈونلڈ ٹرمپ نے کہا ہے کہ امریکہ نے آبنائے ہرمز میں ایران کی سات کشتیوں پر حملہ کیا ہے، کیونکہ واشنگٹن اس ؎بند آبی گزرگاہ کے ذریعے خلیج میں پھنسے ہوئے جہازوں کو نکالنے کی کوشش کر رہا ہے۔ یہ معلومات منگل کے روز بی بی سی نے فراہم کیں۔

متحدہ عرب امارات اور جنوبی کوریا دونوں نے پیر کے روز اس اہم آبی گزرگاہ میں جہازوں پر حملوں کی اطلاع دی تھی۔ متحدہ عرب امارات نے یہ بھی بتایا کہ ایرانی حملے کے بعد فجیرہ کی تیل کی بندرگاہ پر آگ لگ گئی۔ ایران کے وزیر خارجہ عباس عراقچی نے کہا کہ آبنائے میں ہونے والے ان واقعات سے یہ واضح ہو گیا ہے کہ سیاسی بحران کا کوئی فوجی حل نہیں ہے۔ انہوں نے مزید کہا کہ پروجیکٹ فریڈم دراصل پروجیکٹ ڈیڈ لاک ہے۔”

فروری میں امریکہ اور اسرائیل کی جانب سے ایران پر فضائی حملے شروع کیے جانے کے بعد سے آبنائے ہرمز کافی حد تک بند ہے۔ تہران نے جوابی کارروائی کرتے ہوئے اس اہم آبی گزرگاہ کو بلاک کر دیا ہے، جہاں سے دنیا کے 20 فیصد تیل اور مائع قدرتی گیس کی ترسیل ہوتی ہے۔

اپریل کے آغاز میں، امریکہ اور ایران نے جنگ بندی کا اعلان کیا تھا، جس کے تحت ایران نے متحدہ عرب امارات سمیت خلیجی ممالک پر ڈرون اور میزائل حملے بند کرنے کا وعدہ کیا تھا، لیکن تب سے اب تک محض چند جہاز ہی آبنائے سے گزر سکے ہیں۔ امریکہ نے ایرانی بندرگاہوں کی ناکہ بندی بھی کر رکھی ہے۔

صدر ٹرمپ نے کہا کہ ”ہم نے سات چھوٹی کشتیوں کو مار گرایا ہے یا جیسا کہ وہ انہیں ‘تیز رفتار’ کشتیاں کہتے ہیں۔ اب ان کے پاس بس یہی بچی ہیں۔” امریکی فوج نے بتایا کہ ان کشتیوں پر حملہ کرنے کے لیے ہیلی کاپٹروں کا استعمال کیا گیا۔

بعد ازاں، ایرانی سرکاری میڈیا نے صدر ٹرمپ کے اس دعوے کی تردید کی کہ امریکہ نے تیز رفتار کشتیوں پر حملہ کیا ہے۔

فوجی ذرائع کا حوالہ دیتے ہوئے، تسنیم نیوز ایجنسی نے رپورٹ کیا کہ اس کے بجائے دو چھوٹے مال بردار جہازوں کو نشانہ بنایا گیا، جس میں پانچ شہری ہلاک ہو گئے۔

اس سے قبل امریکہ نے کہا تھا کہ بحریہ کے تباہ کن بحری جہاز اور امریکی پرچم والے تجارتی جہاز پیر کے روز آبنائے ہرمز سے گزرے تھے۔ ایران نے ان دعووں کو مکمل طور پر جھوٹا قرار دیتے ہوئے کہا کہ اس کی فوج نے ایک امریکی جنگی جہاز پر انتباہی فائرنگ کی، تاہم امریکی فوج نے اس کی تردید کی ہے۔

عالمی رہنماؤں نے متحدہ عرب امارات کے بنیادی ڈھانچے پر ہونے والے حملوں کی مذمت کی ہے۔ فرانسیسی صدر ایمانوئل میکرون نے کہا کہ یہ حملے غیر منصفانہ اور ناقابل قبول ہیں۔ برطانوی وزیر اعظم سر کیئر اسٹارمر نے کہا کہ برطانیہ خلیج میں اپنے شراکت داروں کے دفاع کے لیے اپنی حمایت جاری رکھے گا۔

پڑوسی ملک قطر نے ٹینکر پر حملے کی مذمت کرتے ہوئے آبنائے ہرمز کو بلا شرط دوبارہ کھولنے کا مطالبہ کیا ہے۔

اتوار کے روز صدر ٹرمپ نے کہا تھا کہ امریکہ “پروجیکٹ فریڈم” کے تحت پھنسے ہوئے جہازوں کو سمندری راستے سے نکالنے میں مدد شروع کرے گا۔ فروری میں امریکہ-ایران جنگ شروع ہونے کے بعد سے اب تک تقریباً 20,000 ملاح 2,000 جہازوں پر پھنسے ہوئے ہیں۔

یو این آئی۔ م ع

ریاض، خلیج تعاون کونسل کے سیکرٹری جنرل جاسم البدیوی نے متحدہ عرب امارات کو نشانہ بنانے والے ایرانی حملوں کی مذمت کرتے ہوئے انہیں خطرناک جارحانہ عمل اور کھلی کشیدگی قرار دیا ہے۔

مسٹر جاسم البدیوی نے کہا کہ ایران کی جانب سے اماراتی آئل ٹینکر پر حملے اور چار کروز میزائل داغنا جنگ بندی کی خلاف ورزی ہے، جو خطے کے امن کے لیے خطرہ ہے۔

حالیہ سیکیورٹی صورتحال کے پیش نظر یو اے ای نے طلبہ اور تعلیمی عملے کے تحفظ کو مدنظر رکھتے ہوئے 5 مئی سے 8 مئی تک تعلیمی نظام کو آن لائن لرننگ پر منتقل کرنے کا فیصلہ کیا ہے۔

اسی تناظر میں امارات اور عمان پر حملے ایسے وقت میں سامنے آئے ہیں جب امریکہ نے ’’پروجیکٹ فریڈم‘‘ کے تحت آبنائے ہرمز میں پھنسے جہازوں کی مدد اور تجارتی نقل و حمل کو محفوظ بنانے کا اعلان کیا تھا۔

امریکی فوج کے مطابق اس وقت خلیج عرب میں موجود بحری جہاز 87 ممالک کی نمائندگی کر رہے ہیں، جو اس حساس گزرگاہ میں عالمی موجودگی کی اہمیت کو ظاہر کرتے ہیں۔

سینٹکام کے مطابق ایران پر عائد بحری ناکہ بندی کے آغاز سے اب تک امریکی افواج نے تقریباً 50 تجارتی جہازوں کے راستے تبدیل کیے ہیں تاکہ جہاز رانی کی سلامتی اور قواعد کی پاسداری کو یقینی بنایا جا سکے۔

خطے میں بڑھتی کشیدگی کے باعث عالمی سطح پر تشویش میں اضافہ ہو رہا ہے، جبکہ مختلف ممالک سفارتی اور دفاعی سطح پر صورتحال پر قریبی نظر رکھے ہوئے ہیں۔

ابوظہبی، متحدہ عرب امارات نے الزام عائد کیا ہے کہ ایران نے آبنائے ہرمز سے گزرنے والے اس کے آئل ٹینکر پر دو ڈرونز سے حملہ کیا ہے۔ عرب میڈیا کے مطابق یو اے ای کی وزارت خارجہ نے بتایا کہ حملے کا نشانہ بننے والا جہاز سرکاری آئل کمپنی ایڈنوک سے وابستہ تھا۔ کمپنی کی میری ٹائم لاجسٹکس یونٹ کے مطابق ’’بارکہ‘‘ نامی جہاز اس وقت خالی تھا اور فیلنگ کے لیے جا رہا تھا، جبکہ اس واقعے میں کوئی جانی نقصان نہیں ہوا۔

متحدہ عرب امارات کی وزارت خارجہ نے اس حملے کی شدید مذمت کرتے ہوئے کہا کہ تجارتی جہازوں کو نشانہ بنانا بین الاقوامی بحری قوانین کی خلاف ورزی ہے اور اس سے عالمی توانائی کی ترسیل کو خطرات لاحق ہو سکتے ہیں۔

بیان میں ایران سے مطالبہ کیا گیا کہ وہ ایسے بلا اشتعال حملوں کو فوری طور پر بند کرے اور آبنائے ہرمز کو بحری آمد و رفت کے لیے مکمل طور پر کھلا رکھا جائے۔

دوسری جانب قطر نے بھی اس واقعے پر تشویش کا اظہار کرتے ہوئے کہا کہ آبنائے ہرمز کو تجارتی جہازوں کے لیے محفوظ راستہ بنایا جانا چاہیے۔

ادھر پاسداران انقلاب نے دعویٰ کیا ہے کہ اس نے اسی روز امریکی بحریہ کے ایک ڈسٹرائر جہاز کو میزائل حملے کا نشانہ بنا کر پسپائی پر مجبور کیا، جبکہ جنوبی کوریا کے ایک جہاز میں بھی آگ بھڑک اٹھی۔

تاہم سینٹکام نے اس دعوے کو مسترد کرتے ہوئے کہا کہ آبنائے ہرمز میں کسی امریکی جہاز کو نشانہ نہیں بنایا گیا اور امریکی پرچم بردار دو جہاز بحفاظت اس گزرگاہ سے گزر چکے ہیں۔

اس کے جواب میں پاسداران انقلاب نے امریکی مؤقف کو جھوٹ اور بے بنیاد قرار دیا ہے، جس سے خطے میں کشیدگی مزید بڑھنے کا خدشہ ظاہر کیا جا رہا ہے۔

یواین آئی۔ م س