سری نگر، جموں و کشمیر کے سرکاری میڈیکل کالج اننت ناگ میں شعبہ امراضِ قلب کے ایک سینئر کارڈیالوجسٹ ڈاکٹر سید مقبول کو سرکاری ہیلتھ اسکیموں میں دھوکہ دہی کے الزام میں معطل کر دیا گیا ہے۔

آیوشمان بھارت پردھان منتری جن آروگیہ یوجنا۔صحت کے تحت رجسٹرڈ 103 ہارٹ سرجری کے معاملات کی جانچ کے بعد جموں و کشمیر حکومت نے کارڈیالوجسٹ ڈاکٹر سید مقبول کو معطل کر دیا ہے اور انہیں نوٹس بھی بھیجا ہے۔ جانچ میں ٹرانزیکشن مینجمنٹ سسٹم (ٹی ایم سی) پر اپلوڈ کیے گئے دعوے اور کیتھیٹرائزیشن لیبارٹری پروسیجر رجسٹریشن میں انٹری کے درمیان فرق پایا گیا۔ جانچ کرنے والوں نے الزام لگایا کہ جہاں دوہرے چیمبر والے پیس میکر کی پیوند کاری کے لیے فنڈز کا دعویٰ کیا گیا تھا، وہیں اصل میں کیے گئے پروسیجر لیفٹ بنڈل برانچ ایریا پیسنگ (ایل بی بی اے پی) تھے۔ ریاستی صحت ایجنسی (ایس ایچ اے) نے ایل بی بی اے پی سے جڑے دعوے میں غیر معمولی اضافہ دیکھا اور معاملے کو ماہر کی رائے کے لیے ایس کے آئی ایم ایس، سورا میں شعبہ امراضِ قلب کے سربراہ کو بھیج دیا۔ 55 معاملات کے کلینیکل آڈٹ میں پایا گیا کہ 27 مریضوں کا تقریباً 49 فیصد بائیں دل کا کام معمول کے مطابق تھا اور کیو آر ایس مارفولوجی چوڑی تھی۔ ماہرین نے یہ نتیجہ اخذ کیا کہ ان معاملات میں ایل بی بی اے پی کے لیے کوئی طبی ضرورت نہیں تھی۔ ایس ایچ اے نے بعد میں متعلقہ دعووں کو مسترد کر دیا۔

جانچ میں یہ بھی الزام لگایا گیا ہے کہ ڈاکٹر نے منظور شدہ خریداری چینلز کو بائی پاس کیا، براہِ راست نجی سپلائر سے طبی آلات لیے اور ان مستفیدین سے پیسے لیے جو آیوشمان بھارت پردھان منتری جن آروگیہ یوجنا۔صحت کے تحت کیش لیس علاج کے حقدار تھے۔ جانچ میں کہا گیا کہ ایس کے آئی ایم ایس کے تکنیکی ماہرین نے گڑبڑی کی تصدیق کی اور ڈاکٹر پر ٹی ایم سی سسٹم میں غلط معلومات درج کرنے، اپنے عہدے کا غلط استعمال کرنے اور سنگین طبی لاپرواہی برتنے کا الزام لگایا۔

ڈاکٹر مقبول کو ایک ہفتے کے اندر تحریری جواب دینے کی ہدایت دی گئی ہے اور ایسا نہ کرنے پر جموں و کشمیر سول سروسز (سی سی اے) رولز، 1956 کے تحت انضباطی کارروائی شروع کی جا سکتی ہے، جس میں ملازمت سے برطرفی بھی شامل ہے۔ جموں و کشمیر کی وزیر صحت سکینہ اتو نے کہا کہ کارڈیالوجسٹ کو معطل کر دیا گیا ہے۔ محترمہ اتو نے کہا کہ “کچھ شکایتیں تھیں اور اس کے بعد ہم نے جانچ کے احکامات دیے۔ ابتدائی جانچ میں کچھ باتیں سامنے آئیں اور ڈاکٹر کو معطل کر دیا گیا ہے۔”

یو ا ین آئی۔ این یو۔

میری لینڈ، امریکی صدر ڈونلڈ ٹرمپ نے میری لینڈ میں ایک تقریب سے خطاب میں بتایا کہ آبنائے ہرمز سے جہاز غیر معمولی انداز میں گزرنے لگے ہیں اور تقریباً 700 بحری جہاز گزر رہے ہیں۔

امریکی صدر نے کہا آبنائے ہرمز سے اتنے جہاز گزر رہے ہیں کہ ایسا پہلے کبھی نہیں دیکھا، جہاز گزرنے پر کمپنیاں بہت خوش ہیں، ایران کے ساتھ معاہدے پر دستخط ہو چکے ہیں اور اب 60 دنوں میں حتمی ڈیل کرنی ہوگی۔

ڈونلڈ ٹرمپ نے ایران کو ایک بار پھر متنبہ کرتے ہوئے کہا کہ ساٹھ روز میں حتمی معاہدہ نہ ہوا تو سخت اقدامات کریں گے، انھوں نے خبردار کیا کہ اگر مقررہ مدت میں حتمی معاہدہ نہ ہو سکا تو امریکہ ایسے اقدامات کرے گا جس سے ایران کو خوشی نہیں ہوگی اور مجھے نہیں لگتا کہ ایسا کچھ کرنا پڑے گا، حتمی ڈیل ہو جائے گی۔

جنگ بندی معاہدے پر ٹرمپ نے سعودی بادشاہ اور ولی عہد کا شکریہ ادا کیا، اور کہا کہ یو اے ای کے صدر بہترین شخصیت ہیں۔ اس موقع پر امریکی صدر نے یوکرین جنگ پر بھی تبصرہ کیا اور بتایا کہ روس یوکرین جنگ میں 34 ہزار افراد مارے جا چکے ہیں، ہم کوشش کر رہے ہیں کہ دونوں میں جنگ بندی ہو جائے۔

ڈونلڈ ٹرمپ نے چین کے حوالے سے کہا کہ صدر شی جن پنگ ستمبر میں امریکا کا دورہ کریں گے، اور میں بھی دوبارہ چین کا دورہ کروں گا، وہاں بڑی کانفرنس ہوگی، میں نے چین کے صدر کو کہا تھا کہ آبنائے ہرمز میں مداخلت نہ کریں، انھوں نے میری بات مان لی اور مداخلت نہیں کی۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ پاکستانی فیلڈ مارشل عاصم منیر اور پاکستان کے وزیراعظم عظیم ہیں، پاکستانی رہنماؤں نے ایران سے ڈیل میں بہت مدد دی۔

صدر ڈونلڈ ٹرمپ کی جانب سے ایک بار پھر پاکستان کے وزیراعظم اور فیلڈ مارشل عاصم منیر کی تعریف کی گئی ہے۔ صدر ٹرمپ نے امریکی ویب سائٹ کو انٹرویو دیتے ہوئے کہا کہ فیلڈ مارشل عاصم منیر عظیم آدمی ہیں اور پاکستان کے وزیراعظم بھی عظیم ہیں۔ امریکی صدر نے کہا کہ فیلڈ مارشل عاصم منیر اپنے وزیراعظم کا مکمل احترام کرتے ہیں جو بہت خوبصورت بات ہے۔ ٹرمپ نے کہا کہ پاکستانی رہنماؤں نے ایران سے ڈیل میں بہت مدد دی، پاکستانی قیادت ایرانی قیادت اور ایرانی قوم کو جانتی تھی۔

بعد ازاں امریکی صدر ڈونلڈ ٹرمپ نے ایک تقریب سے خطاب کرتے ہوئے کہا کہ چینی صدر سمتبر میں امریکہ کا دورہ کریں گے، ایران کے معاملے میں چین نے بھی اہم کردار اداکیا۔ ڈونلڈ ٹرمپ نے کہا کہ چین ایران سے اپنی ضروریات کا 50 فیصد تیل خریدتا ہے۔

اسرائیل کے ساتھ امریکہ کے بہترین تعلقات ہیں۔ اس کے علاوہ صدر ٹرمپ نے کہا کہ رواں سال کسی وقت دوبارہ چین جاؤں گا۔

یو این آئی۔ ع ا۔