تہران، نائب ایرانی صدر محمد رضا عارف نے کہا ہے کہ علاقائی سلامتی یقینی بنانےکیلئے ہمسایوں کے ساتھ کام کرنے کیلئے تیار ہیں۔

اپنے بیان میں انہوں نے کہا کہ ایرانی عوام جنگ کے حقیقی فاتح ہیں اور جلد فتح کا جشن منائیں گے، جنگ کے بعد خطے میں تعاون کا فروغ اور اسے اقتصادی مرکز میں تبدیل کرنا ہے۔

نائب صدر نے کہا کہ ایران کی پالیسی ہمیشہ علاقائی تعاون پر مبنی رہی ہے کسی بھی قسم کی اجارہ داری پر یقین نہیں رکھتے، آبنائے ہرمز ایران کی جائز ملکیت ہے ہم نے برسوں سے اسٹریٹجک اثاثے کا مکمل استعمال نہیں کیا اب ہم آبنائے ہرمز پر کنٹرول حاصل کرنے کیلئے پرعزم ہیں۔ محمد رضا عارف کا کہنا تھا کہ ایران نے عالمی قوانین اور اسٹریٹجک تحفظات پر آبنائے ہرمز کے انتظام کا فیصلہ کیا ایران اب اہم آبی گزرگاہ کی سیکیورٹی کویقینی بنائے گا۔

یو این آئی۔ ع ا ۔

روم، کیتھولک رہنما پوپ لیو اور امریکی وزیر خارجہ مارکو روبیو نے باہمی تعلقات بہتر بنانے کے لیے ایک دوسرے کو علامتی تحائف پیش کئے۔

غیر ملکی ذرائع ابلاغ کے مطابق امریکی وزیر خارجہ مارکو روبیو نے دوران ملاقات پوپ کو ایک چھوٹا کرسٹل کا فٹبال تحفے میں دیا جبکہ پوپ نے انہیں زیتون کے درخت کی لکڑی سے بنا ایک قلم دیا جسے انہوں نے امن کا پودا قرار دیا۔

رپورٹس کے مطابق دونوں کے درمیان یہ ملاقات ویٹیکن اور امریکہ کے درمیان تعلقات کو بہتر بنانے کے مقصد سے ہوئی، ایسے وقت میں جب ٹرمپ پوپ پر کئی بار تنقید کے نشتر برسا چکے ہیں۔ ویٹیکن کے مطابق دونوں رہنماؤں نے دوطرفہ تعلقات مضبوط بنانے کے عزم کا اعادہ کیا اور عالمی حالات پر کھل کر تبادلہ خیال کیا۔

اس موقع پر امریکی وزیر خارجہ کا کہنا تھا کہ وہ کیوبا، مذہبی آزادی اور عالمی مسائل پر بات چیت کے لیے آئے ہیں۔ روبیو نے ملاقات کے دوران مزاحیہ انداز میں کہا کہ وہ جانتے ہیں پوپ شکاگو کے رہائشی ہیں اور بیس بال کے شوقین ہیں، اسی لیے انہوں نے انہیں فٹبال کا تحفہ دیا۔ ویٹیکن حکام نے یہ بھی کہا کہ دونوں نے دنیا میں امن قائم کرنے اور بین الاقوامی تعاون بڑھانے کی ضرورت پر زور دیا۔

یو این آئی۔ ع ا۔

مکہ مکرمہ، سعودی عرب میں مسجد الحرام اور مسجد نبوی صلی اللہ علیہ وآلہ وسلم کی دیکھ بھال کی امور کی جنرل اتھارٹی نے رواں برس حج سیزن 2026 کیلیے رضاکارانہ کام کے مواقع کی ایک رینج کا اعلان کردیا ہے سعودی خبر رساں ادارے کی رپورٹ کے مطابق اس اقدام کا مقصد کمیونٹی کی شرکت کو مضبوط بنانا، رضاکارانہ کام کو فروغ دینا اور معاشرے میں رضا کارانہ خدمات کی ثقافت کو مزید فروغ دینا ہے۔ رپورٹس کے مطابق رضاکارانہ مواقع میں مذہبی رہنمائی اور تعلیم فراہم کرنا، نماز کی صف بندی کے انتظام میں مدد، سکرینز اور الیکڑانک ڈیوائسز کی نگرانی، ترجمے کی خدمات، فیلڈ آگاہی مہم اور مسجد نبوی صلی اللہ علیہ وآلہ وسلم کے زائرین کی خدمت شامل ہے۔

جنرل اتھارٹی کے مطابق جو افراد رضاکارانہ کاموں میں دلچسپی رکھتے ہیں وہ نیشنل پلیٹ فارم فار والینٹیئرز ورک کے ذریے خود کو رجسٹر کروالیں اور درخواست ارسال کردیں۔ واضح رہے کہ سعودی وژن 2030 کے تحت مملکت میں رضاکارانہ سرگرمیوں کو فروغ دیا جا رہا ہے۔

یو این آئی۔ ع ا۔