واشنگٹن، امریکہ کے خصوصی ایلچی اسٹیو وٹکوف ایران کے ساتھ ممکنہ جوہری معاہدے پر مذاکرات کے لیے سوئٹزرلینڈ روانہ ہو گئے ہیں۔ توقع ظاہر کی جا رہی ہے کہ امریکہ اور ایران کے درمیان بات چیت کا پہلا دور وہیں منعقد ہوگا۔

یہ اطلاع خبر رساں ویب سائٹ ایکسیوس نے ایک نامعلوم امریکی عہدیدار کے حوالے سے دی ہے۔ عہدیدار کے مطابق امریکی صدر ڈونلڈ ٹرمپ کے داماد جیرڈ کشنر پہلے ہی سوئٹزرلینڈ میں موجود ہیں۔

رپورٹ میں کہا گیا ہے کہ ابھی یہ واضح نہیں ہے کہ مذاکرات کے لیے کوئی نیا وقت طے کیا گیا ہے یا نہیں۔ بات چیت جمعہ کو شروع ہونے والی تھی، لیکن لبنان میں اسرائیل اور اور لبنان کی شیعہ تنظیم حزب اللہ کے درمیان لڑائی کی وجہ سے اسے مؤخر کر دیا گیا تھا۔

رپورٹ کے مطابق امریکی وفد کی قیادت نائب صدر جے ڈی وینس کرنے والے تھے، لیکن انہوں نے جمعرات کو اپنا دورہ ملتوی کر دیا اور ابھی یہ بھی واضح نہیں کہ آیا وہ ہفتے کے اختتام تک سوئٹزرلینڈ جائیں گے یا نہیں۔

واضح رہے کہ 14 جون کو ایران اور امریکہ نے تصدیق کی تھی کہ ایک مفاہمتی یادداشت (ایم او یو) پر کام مکمل ہو چکا ہے۔

دونوں ممالک نے 18 جون کی شب اس دستاویز پر دستخط کیے، جس میں 28 فروری سے جاری فوجی تنازع کے خاتمے کی شق شامل ہے۔

اس مفاہمتی یادداشت کے ذریعے دونوں فریقوں کے درمیان کئی ماہ سے جاری کشیدگی کے خاتمے کی جانب ایک اہم پیش رفت ہوئی ہے۔

یہ معاہدہ دونوں ممالک کو ایرانی جوہری مسئلے اور امریکی پابندیوں کے حوالے سے حتمی معاہدے پر مذاکرات کے لیے 60 دن کی مہلت فراہم کرتا ہے۔ اس کے علاوہ یہ امریکہ کے لئے اپنی بحری ناکہ بندی ختم کرنے اور ایران کے لئے آبنائے ہرمز سے تجارتی جہازوں کی آمد و رفت بحال کرنے کی ایک متعین مدت مقرر کی گئی ہے۔

یواین آئی۔الف الف

لندن، جنوبی انگلینڈ میں بیڈفورڈ کے قریب دو ٹرینوں کے درمیان تصادم کے نتیجے میں ایک شخص ہلاک جبکہ 89 افراد زخمی ہو گئے۔

برطانوی ٹرانسپورٹ پولیس نے یہ اطلاع دی۔ اس سے قبل حکام نے اس حادثے میں ایک شخص کی ہلاکت کی تصدیق کی تھی۔

ٹرانسپورٹ پولیس نے کہا، “33 افراد کو اسپتال منتقل کیا گیا، جن میں سے 11 کی حالت تشویشناک تھی۔ 56 دیگر افراد کو مختلف نوعیت کی چوٹوں کے باعث طبی امداد فراہم کی گئی۔” انہوں نے کہا کہ حادثے میں ایک ٹرین کا ڈرائیور ہلاک ہو گیا۔

یواین آئی۔الف الف

واشنگٹن، امریکی صدر ڈونلڈ ٹرمپ نے کہا ہے کہ ہم ملاقات کےلئے بےچین نہیں تھے بلکہ ایران تھا ہم 60 دن تک اپنی حکمت عملی کوجاری رکھیں گے۔

اپنے بیان میں ٹرمپ نے کہا کہ ایران کو اب کوئی پیسہ نہیں ملے گا ایک سینٹ بھی نہیں دیاجائے گا اس جنگ نے ایران کو مکمل طور پر کمزور اور تباہ کر دیا ہے ایران کے پاس اب کوئی فضائیہ، بحریہ، اینٹی ایئر کرافٹ اور ریڈار سسٹم نہیں بچا۔

ٹرمپ نے کہا کہ ڈیموکریٹس کہتے ہیں ایران 4 ماہ پہلے کےمقابلے آج بہترحالت میں ہے، کیا کوئی ایسی جھوٹی بات کہہ کربچ سکتا ہے؟ لوگ اتنے بےوقوف ہو سکتے ہیں

امریکی نیوز ویب سائٹ “ایگزیوس” کو دیے گئے ایک خصوصی انٹرویو میں صدر ٹرمپ نے ایران کے ساتھ حالیہ معاہدے پر کھل کر گفتگو کی اور اسے امریکی سفارت کاری کی بڑی کامیابی قرار دیا۔

امریکی صدر کا کہنا تھا کہ ایران کے ساتھ ہونے والا یہ نیا معاہدہ تہران کے غیر مشروط ہتھیار ڈالنے کے مترادف ہے۔ انہوں نے بتایا کہ یہ معاہدہ عالمی معیشت کو ایک بڑے بحران سے بچانے کے لیے کیا گیا ہے، جس کے تحت آبنائے ہرمز کو دوبارہ جہاز رانی کے لیے کھول دیا گیا ہے، جبکہ جوہری مذاکرات کی بحالی کے لیے 60 روزہ مدت مقرر کی گئی ہے۔

صدر ٹرمپ نے مزید کہا کہ معاہدے کے باوجود کئی اہم اور حساس معاملات ابھی تک حل طلب ہیں، جن پر آئندہ ہونے والے مذاکرات کے اگلے ادوار میں تفصیلی بات چیت کی جائے گی۔

یو این آئی۔ ع ا۔