کینبرا، آسٹریلوی وزیراعظم انتھونی البانیز نے آبنائے ہرمز کو دوبارہ کھولنے کے اعلان کا خیرمقدم کرتے ہوئے اسے عالمی معیشت اور علاقائی استحکام کے لیے مثبت پیش رفت قرار دیا ہے۔

آسٹریلوی وزیراعظم نے فرانسیسی صدر اور برطانوی وزیراعظم کی میزبانی میں منعقدہ “ورچوئل لیڈرز سمٹ” میں شرکت کی، جس میں آبنائے ہرمز کی صورتحال پر تفصیلی مشاورت کی گئی۔ اس موقع پر گفتگو کرتے ہوئے انتھونی البانیز نے کہا کہ آسٹریلیا نے مسلسل اس تنازع کے خاتمے کا مطالبہ کیا ہے کیونکہ جنگ جتنی طویل ہوگی، عالمی معیشت پر اس کے اثرات اتنے ہی سنگین ہوں گے۔

انہوں نے مزید کہا کہ آبنائے ہرمز کی بندش اور تنازع کے باعث پیدا ہونے والی صورت حال سے آسٹریلوی شہری بھی متاثر ہو رہے ہیں اور قیمتوں میں اضافے کے اثرات کو محسوس کر رہے ہیں۔ آسٹریلوی وزیراعظم نے واضح کیا کہ آسٹریلیا آبنائے ہرمز میں پائیدار استحکام اور سلامتی کو یقینی بنانے کی تمام کوششوں کی بھرپور حمایت کے لیے تیار ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے گزشتہ روز فینکس میں تقریب سے خطاب کرتے ہوئے دنیا کو یہ کہہ کر تجسس میں ڈال دیا ہے کہ ’’کل ہماری طرف سے سرپرائز آئے گا، مثبت چیزیں ہونے والی ہیں، کوئی ذہین شخص وائٹ ہاؤس آ رہا ہے۔‘‘

ڈونلڈ ٹرمپ نے کہا ہفتے (آج) کی صبح وائٹ ہاؤس میں پریس کانفرنس کریں گے، ہمارے ملک کی کیئر کرنے والے کی پریس کانفرنس ہوگی اور یہ ہمارے ملک کے لیے اچھا ہوگا، پریس کانفرنس میں ایران سے متعلق بھی سوال ہوں گے اور اس طرح یہ پریس کانفرنس اس متعلق بھی ہو جائے گی۔

امریکی صدر ٹرمپ نے وزیر اعظم اور فیلڈ مارشل سے اظہار تشکر کیا اور کہا پاکستان کا خصوصی طور پر شکریہ ادا کرتا ہوں، وزیر اعظم شہباز شریف اور فیلڈ مارشل عاصم منیر بہترین شخصیات ہیں، انھوں نے بہت مدد کی، سید عاصم منیر ’’گریٹ گریٹ‘‘ فیلڈ مارشل ہیں۔ انھوں نے کہا میں سعودی عرب، یو اے ای، بحرین، قطر کا بھی شکریہ ادا کرتا ہوں۔ ان کا کہنا تھا کہ ایران اور لبنان کو ملا کر میں نے 10 جنگیں روکی ہیں، ہمارے دور میں امریکہ دوبارہ عروج پر جا رہا ہے، دنیا بھر میں امریکہ کی عزت کی جاتی ہے، ہمیں اپنی طاقت پر شرمندگی نہیں، اپنے ملک کا دفاع کر رہے ہیں، گزشتہ 2 ماہ میں اپنے ملک کا دفاع کیا۔

میں امن پسند ہوں، پاکستان اور ہندوستان کی جنگ روک کر 35 سے 50 ملین لوگوں کی جان بچائی، امن کے لیے مجھے جنگوں میں مداخلت کرنی پڑتی ہے، ہم الیکشن نہ جیتتے تو امریکہ بھی تیسری دنیا کے ممالک کی طرح ہو جاتا، امریکہ میں بھی جرائم، اموات اور بیماریاں پیدا ہو جاتیں، آج ایسا امریکہ ہے جس پر ہر شہری فخر محسوس کرتا ہے۔

ٹرمپ نے کہا ہم نومبر میں مڈٹرم الیکشن بھی جیت رہے ہیں، مڈٹرم الیکشن اس طرح جیتیں گے جیسے پہلے کبھی کسی نے نہیں جیتا، ہمارے پاس ایران سے متعلق اچھی خبر بھی ہے، آج دنیا کے لیے ایک عظیم دن ہوگا، ایران نے اعلان کیا ہے کہ آبنائے ہرمز مکمل طور پر کھلا ہے، اور اب آبنائے ہرمز کاروبار کے لیے تیار ہے۔ انھوں نے کہا آبنائے ہرمز کی صورت حال اب مکمل بہتر ہو گئی ہے، ایران امریکہ کی مدد سے آبنائے ہرمز سے مائنز ہٹا رہا ہے، ناکہ بندی تب تک برقرار رہے گی جب تک 100 فی صد ڈیل مکمل نہیں ہوتی، ایران کے ساتھ کسی پیسے کی لین دین نہیں ہوگی۔

یو این آئی۔ ع ا۔

کویت سٹی، کویت کی قومی ایئر لائن ‘کویت ایئرویز’ نے بنگلہ دیش کے دارالحکومت ڈھاکہ کے لیے اپنی کمرشل پروازیں دوبارہ شروع کرنے کا باضابطہ اعلان کر دیا ہے۔

غیر ملکی ذرائع ابلاغ کے مطابق کویت کی قومی ایئر لائن ‘کویت ایئرویز’ کا کہنا ہے کہ یہ پروازیں سعودی عرب کے شہر دمام (کنگ فہد انٹرنیشنل ایئرپورٹ) کے ذریعے چلائی جائیں گی ایئر لائن کے مطابق، ڈھاکہ کے لیے پروازوں کا آغاز 24 اپریل سے ہو رہا ہے، جو ہفتے میں دو بار آپریٹ کی جائیں گی۔

کویت ایئرویز کے قائم مقام سی ای او، عبدالوہاب الشطی کا اس حوالے سے کہنا تھا کہ ڈھاکا کے روٹ کی بحالی مسافروں کی ضرورت اور اہمیت کے پیشِ نظر کی گئی ہے۔ ہم اپنے نیٹ ورک کو وسعت دینے اور دمام آپریشنز کے ذریعے مختلف مقامات کو دوبارہ منسلک کرنے کے لیے مسلسل کوشاں ہیں۔

انہوں نے مزید بتایا کہ دمام کے ذریعے حال ہی میں جن دیگر شہروں کے لیے پروازیں بحال کی گئی ہیں، ان میں لاہور، لندن، قاہرہ، استنبول، عمان، ممبئی اور دہلی شامل ہیں۔ رپورٹس کے مطابق کویت ایئرویز اس وقت 14 مقامات کے لیے پروازیں چلا رہی ہے اور بڑھتی ہوئی طلب کے پیشِ نظر مزید روٹس کی بحالی پر کام جاری ہے۔

یو این آئی۔ ع ا۔