واشنگٹن/لندن، امریکی صدر ڈونلڈ ٹرمپ نے برطانیہ کے وزیر اعظم کیر اسٹارمر کے ممکنہ استعفے سے متعلق خبروں کے درمیان ان کے لیے نیک خواہشات کا اظہار کیا ہے۔

ٹرمپ نے اپنے سوشل میڈیا پلیٹ فارم ٹروتھ سوشل پر ایک پوسٹ میں لکھا، “برطانیہ کے وزیر اعظم کیر اسٹارمر استعفیٰ دے دیں گے۔ میں ان کے لیے نیک تمناؤں کا اظہار کرتا ہوں۔”

تاہم ٹرمپ نے اپنے دعوے کے حق میں کوئی ثبوت یا اندرونی معلومات پیش نہیں کیں۔

ان کی یہ پوسٹ ایسے وقت میں سامنے آئی جب برطانوی ذرائع ابلاغ میں یہ خبریں گردش کر رہی ہیں کہ دباؤ کا شکار لیبر پارٹی کے رہنما کیر اسٹارمر آئندہ چند دنوں میں اپنے عہدے سے مستعفی ہو سکتے ہیں۔

ٹرمپ اس سے قبل بھی ایران کے خلاف امریکہ اور اسرائیل کی پالیسیوں کی حمایت نہ کرنے پر اسٹارمر کو تنقید کا نشانہ بنا چکے ہیں۔ اتوار کو اپنی پوسٹ میں انہوں نے ایک بار پھر برطانوی وزیر اعظم پر دو اہم معاملات میں ناکامی کا الزام عائد کیا۔

ٹرمپ نے لکھا، “وہ دو انتہائی اہم موضوعات، امیگریشن اور توانائی (شمالی سمندر میں تیل کی پیداوار کھولو!) میں بری طرح ناکام رہے ہیں۔”

برطانوی حکومت کی جانب سے تاحال اسٹارمر کے استعفے سے متعلق خبروں کی باضابطہ تصدیق نہیں کی گئی ہے۔

یواین آئی۔ م س

تہران/برگن اسٹاک، امریکی صدر ڈونلڈ ٹرمپ کی حالیہ دھمکیوں کے بعد سوئٹزرلینڈ کے برگن اسٹاک میں جاری امریکہ اور ایران کے درمیان مذاکرات فی الحال تعطل کا شکار ہو گئے ہیں، تاہم بات چیت مکمل طور پر ختم نہیں ہوئی۔

سی این این کی ایک رپورٹ کے مطابق مذاکراتی عمل سے وابستہ ایک ایرانی ذرائع نے بتایا کہ دونوں فریقوں کو دوبارہ مذاکرات کی میز پر لانے کے لیے پس پردہ رابطے (بیک چینل رابطے) بدستور جاری ہیں۔

دریں اثنا ایران کے چیف مذاکرات کار محمد باقر قالیباف نے ٹرمپ کے بیانات پر سخت ردعمل ظاہر کرتے ہوئے انہیں امریکہ کی “مایوسی” قرار دیا ہے۔

واضح رہے کہ ٹرمپ نے اتوار کو مذاکراتی عمل کے دوران خبردار کیا تھا کہ اگر کوئی معاہدہ نہ ہوا تو امریکہ آبنائے ہرمز کا کنٹرول سنبھالنے کے لیے اقدامات کر سکتا ہے۔

قالیباف نے سوشل میڈیا پلیٹ فارم ایکس پر اپنے بیان میں کہا، “اگر ان کی دھمکیاں واقعی مؤثر ہوتیں تو آج انہیں اس حد تک مایوسی کا سامنا نہ کرنا پڑتا۔”

انہوں نے مزید کہا کہ ایران امریکی دھمکیوں کو سنجیدگی سے نہیں لیتا اور ملک کی مسلح افواج ہر قسم کی صورتحال سے نمٹنے کے لیے مکمل طور پر تیار ہیں۔

یواین آئی۔ م س

واشنگٹن، امریکی صدر ڈونلڈ ٹرمپ نے بائیں بازو کے انتہا پسندوں اور ڈیموکریٹس پر سخت تنقید کی ہے۔

ڈونلڈ ٹرمپ نے اپنے حالیہ بیان میں کہا کہ ان کو اب اندازہ ہو رہا ہے کہ ہم نے ایران کے خلاف کتنی بڑی کامیابی حاصل کی، تہران کو حالیہ جنگ میں مکمل طور پر شکست ہو چکی ہے۔

امریکی صدر نے دعویٰ کیا کہ سابق امریکی صدر براک اوباما نے ایران کو اربوں ڈالرز فراہم کیے، اوباما نے ایران کے خلاف امریکی فوج کا استعمال ہی نہیں کیا جو ضروری تھا، دنیا میں دہشتگردی کے سب سے بڑے سرپرست ایران کو قابو کرنا ناگزیر تھا۔

ان کا کہنا تھا کہ ایرانی حکام اوباما اور جو بائیڈن کو انتہائی ناکام لیڈر سمجھتے تھے، وہ ان کو ناکام سمجھنے میں 100 فیصد درست تھے، میرے برسر اقتدار آنے سے پہلے ایران مسلسل 47 برس من مانی کرتا رہا، جبکہ میرے اقتدار میں آنے کے بعد سب کچھ بدل گیا امریکہ پھر سے طاقتور ہو چکا ہے۔

انہوں نے مزید کہا کہ کتنی مضحکہ خیز بات ہے ڈیموکریٹس دعویٰ کر رہے ایران پہلے سے مضبوط ہے، تہران کو مکمل فوجی شکست ہو چکی اب اس کی بحریہ باقی ہے اور نہ فضائیہ۔

امریکی صدر نے ڈیموکریٹس کو بے وقوف قرار دے دیا۔

یو این آئی۔ ع ا۔