سری نگر، ‘آپریشن سندور’ کی پہلی برسی سے قبل نیشنل کانفرنس کے صدر فاروق عبداللہ نے بدھ کے روز کہا کہ اس آپریشن نے “اپنے فوائد ضرور دیے ہیں دیے ہیں، تاہم انہوں نے زور دے کر کہا کہ جنگیں کبھی بھی پائیدار حل فراہم نہیں کرتیں بلکہ صرف انسانیت کے لیے دکھ اور تکلیف کا باعث بنتی ہیں۔

فاروق عبداللہ نے روس-یوکرین جنگ اور مشرق وسطیٰ کی کشیدہ صورتحال کی مثال دیتے ہوئے کہا کہ دنیا کو ان تنازعات کی بھاری انسانی اور معاشی قیمت چکانی پڑ رہی ہے۔ ان کے خطاب کے اہم نکات یہ تھے۔ “یوکرین میں ہونے والی تباہی اور مشرق وسطیٰ کے حالات کو دیکھیں، جنگیں حل نہیں لاتیں۔”

انہوں نے توانائی کی سپلائی میں رکاوٹوں کا ذکر کرتے ہوئے کہا کہ ایران سے وابستہ حالات کی وجہ سے گیس کی پیداوار متاثر ہوئی ہے اور قطر جیسے ممالک کو پیداوار بحال کرنے میں ایک سے دو سال لگ سکتے ہیں۔فاروق عبداللہ نے مشرق وسطیٰ میں بڑے پیمانے پر جنگ کے امکان کو رد کرتے ہوئے کہا کہ دنیا کی اقتصادی حالت فی الوقت جنگ کی متحمل نہیں ہو سکتی۔ ان کا کہنا تھا کہ مشرق وسطیٰ کے پاس تیل اور گیس کے بڑے ذخائر ہیں اور اگر وہاں دباؤ بڑھا تو عالمی بقا مشکل ہو جائے گی۔

مختلف ریاستوں کے انتخابی نتائج پر تبصرہ کرتے ہوئے انہوں نے کہا ممتا بنرجی نتائج کو تسلیم کرنے کے لیے تیار نہیں ہیں اور ان کا الزام ہے کہ وہاں بڑے پیمانے پر دھاندلی ہوئی ہے۔

انہوں نے تمل ناڈو میں نئی حکومت کی آمد، کیرالہ میں کانگریس کی جیت اور آسام میں بی جے پی کی کامیابی کا تذکرہ کیا۔

پنجاب میں ہونے والے دھماکوں کے حوالے سے انہوں نے عوام کو مشورہ دیا کہ وہ خوفزدہ نہ ہوں، کیونکہ اس طرح کے واقعات ہندوستان میں پہلے بھی ہوتے رہے ہیں۔ مزید برآں، جموں و کشمیر میں انتخابی فہرستوں کی حالیہ نظرثانی (ایس آئی آر) کے حوالے سے ان کا کہنا تھا کہ ہر عمل کا اپنا اثر ہوتا ہے۔

یواین آئی ۔م اع

جموں، جموں و کشمیر کے لیفٹیننٹ گورنر منوج سنہا نے بدھ کے روز سرحدی گا ؤں کو ملک کی جرات اور استقامت کی علامت قرار دیتے ہوئے کہا ہے کہ اب یہ علاقے ملک کے ‘آخری گاؤں’ نہیں بلکہ ‘پہلے گاؤں’ کے طور پر پہچانے جاتے ہیں۔

ضلع سانبہ کے سرحدی گاؤں ریگل کے دورے کے دوران لیفٹیننٹ گورنر نے عوامی جلسے سے خطاب کیا اور کئی اہم منصوبوں کا افتتاح و سنگِ بنیاد رکھا، جن میں گورنمنٹ پرائمری اسکول ریگل میں ڈیجیٹل لائبریری کا قیام،کمیونٹی ہال اور تفریحی مرکز کی تعمیر،’امرت سروور’ کی ترقی اور نکاسی آب کا نظام،

سولر اسٹریٹ لائٹس اور تین اوپن جم کی تنصیب اور وائبرنٹ ویلجز پروگرام شامل ہیں۔

ایل جی منوج سنہا نے وزیر اعظم نریندر مودی کی قیادت میں شروع کیے گئے ‘وائبرنٹ ویلجز پروگرام’ پر روشنی ڈالتے ہوئے کہا کہ اس کا مقصد سرحدی آبادی کو قومی دھارے میں شامل کرنا ہے۔

لیفٹیننٹ گورنر نے حکام کو سخت ہدایات جاری کیں کہ وہ اس بات کو یقینی بنائیں کہ سرحدی علاقوں کا ہر گھر معاشی طور پر خود کفیل ہو۔ انہوں نے اعلان کیا کہ”ہمارا ہدف ہے کہ 2030 تک ضلع سانبہ کے سرحدی دیہات کا ایک بھی خاندان خطِ غربت سے نیچے نہ رہے۔”

انہوں نے پی او جےکے سے بے گھر ہونے والے افراد اور مغربی پاکستان کے پناہ گزینوں کو زمین کے مالکانہ حقوق دینے کے عزم کا اعادہ کیا۔ شاہ پور کنڈی ڈیم کی تکمیل سے خطے کی زرعی پیداوار میں زبردست اضافہ ہوگا۔

انہوں نے ریگل گاؤں کو ‘ٹی بی سے پاک’ ہونے پر مبارکباد دی اور منشیات کے خلاف جنگ جاری رکھنے کی اپیل کی۔ایل جی نے نوجوانوں میں ایس پی اوز کے تقرری نامے اور مختلف سرکاری اسکیموں کے تحت منظوری کے خطوط تقسیم کیے۔اپنے دورے کے دوران منوج سنہا نے ریگل بارڈر آؤٹ پوسٹ پر تعینات جوانوں سے ملاقات کی اور ‘آپریشن سندور’ میں ان کے مثالی کردار اور ملکی سرحدوں کی حفاظت کے لیے ان کے غیر متزلزل عزم کو سراہا۔اس موقع پر ارکانِ اسمبلی، چیف سکریٹریز، پولیس اور سول انتظامیہ کے اعلیٰ حکام سمیت عوام کی بڑی تعداد موجود تھی۔

یواین آئی ۔م اع

سرینگر/اننت ناگ،جموں و کشمیر پولیس نے کانگریس لیڈر اور رکن اسمبلی پیرزادہ محمد سید کی اہلیہ ڈاکٹر تبسم اور ان کے بیٹے کے خلاف سرکاری ڈیوٹی میں رکاوٹ ڈالنے اور ڈی کے پورہ میں واقع پرائمری ہیلتھ سینٹر (پی ایچ سی) کو غیر قانونی طور پر تالا لگانے کے الزام میں کیس درج کیا ہے۔

تحصیلدار کوکر ناگ، سید معیز قادری کی شکایت پر تھانہ اچھ بل میں (بی این ایس) کی دفعات 132 اور 351(2) کے تحت مقدمہ درج کیا گیا ہے۔ حکام کے مطابق مبینہ طور پر ایم ایل اے کے اہل خانہ نے محکمہ صحت اور ریونیو کے افسران کو دھمکیاں دیں اور کام سے روکا۔ہیلتھ سینٹر کو تالا لگنے کی وجہ سے ایمبولینس اور ضروری ادویات اندر ہی پھنس گئیں، جبکہ ڈاکٹر اور طبی عملہ باہر کھڑے رہنے پر مجبور ہوئے۔

تحصیلدار کا کہنا ہے کہ یہ مرکز گزشتہ 15 سالوں سے یہاں کام کر رہا تھا اور مالکان کو قانونی طریقہ کار اپنانے کا مشورہ دیا گیا تھا، لیکن انہوں نے اچانک تالا لگا کر امن و امان کی صورتحال پیدا کر دی۔

دوسری جانب ڈاکٹر تبسم نے ان الزامات کی سختی سے تردید کرتے ہوئے اسے انسانی ہمدردی کے نام پر دی گئی جائیداد کا معاملہ قرار دیا۔ ان کا موقف ہے کہ یہ عمارت ان کی ذاتی ملکیت ہے جو برسوں پہلے اس وقت انتظامیہ کو دی گئی تھی جب علاقے میں کوئی طبی سہولت موجود نہیں تھی۔انہوں نے دعویٰ کیا کہ اس کا کوئی باقاعدہ کرایہ نامہ یا معاہدہ نہیں ہے اور عمارت اب خستہ حال ہو چکی ہے۔ان کا کہنا ہے کہ “ہم نے ایک سال سے خالی کرنے کی درخواستیں دیں، لیکن حکام ٹس سے مس نہیں ہوئے۔ اب جب علاقے میں نیا ہیلتھ سینٹر بن چکا ہے، تو وہ میرا گھر کیوں نہیں چھوڑ رہے؟

ڈاکٹر تبسم نے ایک سینئر اہلکار پر اپنے بیٹے کے ساتھ بدتمیزی اور ہاتھا پائی کا الزام بھی لگایا ہے، جبکہ تحصیلدار نے ان الزامات کو “ڈرامہ بازی” قرار دیتے ہوئے کہا کہ انتظامیہ نے صرف مفادِ عامہ میں مرکزی دروازے کا تالا کھولا تھا اور کسی کے ساتھ کوئی بدتمیزی نہیں کی گئی۔پولیس نے معاملے کی تفتیش شروع کر دی ہے، جبکہ یہ تنازع نجی ملکیت کے حقوق اور عوامی خدمات کی فراہمی کے درمیان ایک قانونی جنگ کی شکل اختیار کر چکا ہے۔

یواین آئی ۔م اع