واشنگٹن،

امریکی صدر ڈونلڈ ٹرمپ نے اعلان کیا ہے کہ وہ برطانیہ کے شاہ چارلس سوم کے دورہ امریکہ کے دوران ان کے ساتھ شمالی اوقیانوسی معاہدے کی تنظیم (ناٹو) اور ایران کے خلاف امریکی مہم سے متعلق اہم معاملات پر بات چیت کریں گے۔

صدر ٹرمپ نے ایک نیوز ایجنسی کو فون پر انٹرویو دیتے ہوئے کہا، “میں ہر موضوع پر بات کروں گا۔ کنگ چارلس میرے دوست ہیں اور ایک بہترین انسان ہیں۔” رپورٹ کے مطابق، بات چیت کے ایجنڈے میں برطانیہ کا ‘ڈیجیٹل سروس ٹیکس’ بھی شامل ہوگا۔

بکنگھم پیلس نے 31 مارچ کو شاہ چارلس سوم اور ملکہ کیمیلا کے دورہ امریکہ کا اعلان کیا تھا۔ صدر ٹرمپ کے مطابق، شاہی جوڑا 27 سے 30 اپریل تک امریکہ کے سرکاری دورے پر رہے گا۔

پیر سے شروع ہونے والا یہ چار روزہ دورہ برطانیہ سے امریکہ کی آزادی کی 250 ویں سالگرہ کے موقع پر منعقد کیا جارہا ہے۔

یہ دورہ عالمی سیاست اور خاص طور پر مشرقِ وسطیٰ کی موجودہ کشیدہ صورتحال کے تناظر میں انتہائی اہمیت کا حامل قرار دیا جا رہا ہے۔

اسپوتنک/یو این آئی

واشنگٹن،

امریکہ روس اور ایران کے تیل اور پیٹرولیم مصنوعات پر دی گئی رعایتوں کی مدت میں مزید اضافہ نہیں کرے گا۔یہ اطلاع امریکی وزیرِ خزانہ اسکاٹ بیسینٹ نے خبر رساں ادارے ‘ایسوسی ایٹڈ پریس کو دی۔

مسٹر بیسینٹ نے کہا، “ایرانیوں کے لیے اب کوئی رعایت نہیں ہے… ہم نے ناکہ بندی کر رکھی ہے اور وہاں سے کوئی تیل باہر نہیں آ رہا۔ ہمارا خیال ہے کہ اگلے دو تین دنوں میں انہیں پیداوار بند کرنا پڑے گی، جو ان کے تیل کے کنوؤں کے لیے بہت نقصان دہ ثابت ہوگا۔”

وزیرِ خزانہ نے مزید کہا کہ وہ روس کے لیے بھی تیل کی رعایتوں میں کسی اور توسیع کا تصور نہیں کر سکتے۔

مارچ میں امریکی دفتر برائے غیر ملکی اثاثہ جات کنٹرول نے ان تمام لین دین کی اجازت دی تھی جن میں روسی اور ایرانی تیل پہلے سے بحری جہازوں پر لدا ہوا تھا۔ اس کی آخری تاریخ بالترتیب 11 اپریل اور 19 اپریل مقرر کی گئی تھی۔

اس بڑھتی ہوئی کشیدگی کی وجہ سے آبنائے ہرمز میں بحری آمد و رفت تقریباً رک گئی ہے۔ یہ راستہ خلیجی ممالک سے عالمی منڈیوں تک تیل اور قدرتی گیس کی ترسیل کے لیے کلیدی اہمیت رکھتا ہے، اور اس بندش کی وجہ سے عالمی سطح پر ایندھن کی قیمتوں میں اضافہ ہو رہا ہے۔

تہران، ایران کی نیم سرکاری مہر خبررساں ایجنسی کا کہنا ہے کہ ایرانی وزیر خارجہ آج شام سے “اسلام آباد، مسقط اور ماسکو کے دوروں کا آغاز کریں گے”۔

مہر نیوز نے کہا کہ اس دورے کا مقصد دو طرفہ مشاورت، خطے کی موجودہ پیش رفت اور ایران کے خلاف امریکہ اور اسرائیلی حکومت کی طرف سے مسلط کردہ جنگ کی تازہ ترین صورتحال پر تبادلہ خیال کرنا ہے۔

وزیر اعظم شہباز شریف نے ایرانی وزیر خارجہ عباس عراقچی کی قیادت میں مختصر وفد کی پاکستان آمد کی اطلاع کو اہم سفارتی پیشرفت قرار دے دیا۔

ذرائع نے اے آر وائی نیوز کو بتایا کہ ایرانی وزیر خارجہ عباس عراقچی کے رابطے کے بعد نائب وزیر اعظم اسحاق ڈار نے وزیر اعظم شہباز شریف سے رابطہ کیا اور ان کو ایرانی ہم منصب سے ہونے والی گفتگو سے آگاہ کیا۔ شہباز شریف اور اسحاق ڈار نے خطے کی سکیورٹی صورتحال اور کشیدگی میں اضافے کے خدشات پر بات چیت کی جبکہ ایران اور امریکہ کے درمیان مذاکرات کے دوسرے دور پر بھی تبادلہ خیال کیا۔

واضح رہے کہ پاکستان دونوں فریقین کو جلد دوبارہ مذاکرات کی میز پر لانے کیلیے سرگرم ہے۔ وزیر اعظم شہباز شریف کی جانب سے امن و استحکام کیلیے اہم پالیسی اور سفارتی ہدایات جاری کر دی گئیں۔ پاکستان خطے میں کشیدگی کم کرنے، اعتماد سازی اور مذاکراتی عمل آگے بڑھانے کیلیے پُرعزم ہے۔ شہباز شریف نے اعلیٰ سطح سفارتی رابطوں میں تیزی لانے اور مشاورت جاری رکھنے کی ہدایت کی۔

یو این آئی۔ ع ا۔