سینٹ پیٹرز برگ، ایرانی وزیر خارجہ عباس عراقچی کا کہنا ہے کہ امریکہ سے مذاکرات میں پاکستان اہم ثالث ہے، پاکستانی حکام کے ساتھ ہونے والی بات چیت انتہائی کامیاب رہی۔

تفصیلات کے مطابق ایرانی وزیر خارجہ عباس عراقچی نے روسی شہر سینٹ پیٹرز برگ پہنچ کر ایرانی میڈیا سے اہم گفتگو میں انکشاف کیا ہے کہ پاکستان اس وقت ایران اور امریکہ کے درمیان جاری مذاکرات میں ایک اہم ترین ثالث کا کردار ادا کر رہا ہے۔

عباس عراقچی کا کہنا تھا کہ پہلے مذاکراتی دور میں کافی پیش رفت ہوئی تھی، تاہم امریکہ کی جانب سے حد سے زیادہ مطالبات اور نامناسب رویے کے باعث یہ بات چیت کسی حتمی نتیجے پر نہیں پہنچ سکی۔

انہوں نے واضح کیا کہ امریکہ کے غیر ضروری مطالبات مذاکرات میں پیش رفت کی راہ میں بڑی رکاوٹ ہیں، ایران اپنے اصولی مؤقف اور قومی مفادات کے تحفظ کے لیے مکمل طور پر پرعزم ہے۔ ایرانی وزیر خارجہ نے بتایا کہ ان کے حالیہ دورہ پاکستان اور عمان کا مقصد دوطرفہ تعلقات کے ساتھ ساتھ خطے کی صورتحال پر مشاورت کرنا تھا، پاکستانی حکام کے ساتھ ہونے والی بات چیت انتہائی کامیاب رہی، ملاقاتوں میں ماضی کی سفارتی کوششوں کا جائزہ لیا گیا اور آئندہ کا لائحہ عمل طے کرنے پر مفید تبادلہ خیال ہوا۔

عباس عراقچی نے کہا کہ روس کے ساتھ علاقائی اور عالمی امور پر ہمیشہ قریبی مشاورتی عمل رہا ہے، حالیہ جنگ کی وجہ سے ملاقاتوں کا سلسلہ معطل تھا، جسے اب دوبارہ بحال کیا گیا ہے۔ انھوں نے مزید کہا کہ ایرانی قوم کی 40 روزہ مزاحمت نے عوام کے حقوق اور قومی مفادات کا بھرپور دفاع کیا ہے اور اب مزید سفارتی کوششوں کے لیے مشاورت کا عمل جاری رہے گا۔

یو این آئی۔ ع ا۔

اسلام آباد، ایرانی وزیر خارجہ عباس عراقچی اسلام آباد سے ماسکو پہنچ گئے۔

ایرانی میڈیا کے مطابق ایران کے وزیر خارجہ عباس عراقچی روس پہنچ گئے ہیں جہاں وہ آج روسی صدر ولادیمیر پوتن سے ملاقات کریں گے۔

اس سے قبل عباس عراقچی مسقط سے دوبارہ پاکستان پہنچے تھے،اسلام آباد پہنچنے پر وفاقی وزیر داخلہ محسن نقوی نے استقبال کیا، عراقچی نے فیلڈ مارشل سید عاصم منیر سے بھی ملاقات کی۔

ایرانی سرکاری میڈیا نے بتایا کہ اس ملاقات میں باہمی امور اور سیکیورٹی صورت حال پر گفتگو کی گئی اور لکھا کہ عباس عراقچی کی دوبارہ اسلام آباد آمد مشاورت کا تسلسل ہے، آمد جوہری مذاکرات سے متعلق نہیں بلکہ پاکستانی حکام کے ساتھ حالیہ بات چیت کے سلسلے کو آگے بڑھانا ہے۔

ملاقاتوں میں ثالثی کی کوششوں اور دو طرفہ تعلقات پر بات ہوئی، ایرانی میڈیا کا دعویٰ ہے کہ ملاقاتوں میں جنگ کے مکمل خاتمے کے لیے ایرانی شرائط بھی پہنچائی گئیں، جن میں سمندری پابندیوں میں نرمی، مستقبل میں حملے نہ کرنے کی ضمانت سمیت دیگر مطالبات شامل ہیں۔

یو این آئی۔ ع ا۔

واشنگٹن، سی بی ایس نیوز کو انٹرویو دیتے ہوئے ایک موقع پر امریکی صدر ڈونلڈ ٹرمپ سخت برہم ہو گئے جب اینکر نورہ او ڈانل نے حملہ آور کول ایلن کا پیغام پڑھ کر ان سے سوال کر دیا۔

پولیٹیکو نے لکھا کہ صدر ڈونلڈ ٹرمپ نے اتوار کے روز ایک انٹرویو میں صحافی نورہ او ڈانل پر سخت تنقید کی، کیوں کہ انھوں نے اُس مشتبہ حملہ آور کے منشور سے ایک اقتباس پڑھ دیا تھا، جس نے ایک دن قبل وائٹ ہاؤس کوریسپونڈنٹس ڈنر میں داخل ہونے کی کوشش کی تھی۔ جب او ڈانل نے اتوار کو وائٹ ہاؤس میں ریکارڈ کیے گئے انٹرویو کے دوران حملہ آور کول ایلن کے منشور سے یہ جملہ پڑھا ’’میں اب اس بات کی اجازت دینے کے لیے تیار نہیں ہوں کہ ایک پیڈوفائل، ریپسٹ اور غدار میرے ہاتھوں کو اپنے جرائم سے آلودہ کرے۔‘‘ تو ٹرمپ، جو اس سے پہلے نسبتاً پُرسکون تھے، اچانک غصے میں آ گئے۔

ٹرمپ نے کہا ’’میں انتظار کر رہا تھا کہ آپ یہ پڑھیں گی کیوں کہ مجھے معلوم تھا کہ آپ ایسا کریں گی، کیوں کہ آپ لوگ بہت برے ہیں، بہت برے لوگ۔ ہاں، اس نے یہ لکھا ہے۔ میں ریپسٹ نہیں ہوں۔ میں نے کسی کے ساتھ زیادتی نہیں کی۔‘‘ حملہ آور کے بارے میں ٹرمپ کا نیا انکشاف او ڈانل نے درمیان میں پوچھا ’’اوہ، کیا آپ سمجھتے ہیں کہ وہ آپ کی طرف اشارہ کر رہا تھا‘‘ لیکن صدر نے ان کے سوال کو نظر انداز کرتے ہوئے کہا ’’میں پیڈوفائل نہیں ہوں۔‘‘

ٹرمپ اس بات پر بھی برہم دکھائی دیے کہ شاید ان کا تعلق جیفری اپیسٹین کے ساتھ جوڑا جا رہا ہے، حالاں کہ منشور یا اوڈانل کی بات میں ان کا نام نہیں لیا گیا تھا۔ ٹرمپ نے کہا ’’آپ ایک بیمار شخص کی یہ بکواس پڑھ رہی ہیں۔ مجھے ان چیزوں سے جوڑا جا رہا ہے جن کا مجھ سے کوئی تعلق نہیں۔ مجھے مکمل طور پر بری الذمہ قرار دیا جا چکا ہے۔‘‘ ٹرمپ نے مزید کہا ’’آپ کو یہ پڑھنے پر شرم آنی چاہیے، کیوں کہ میں ان میں سے کچھ بھی نہیں ہوں۔ آپ کو ’60 منٹس‘ میں یہ نہیں پڑھنا چاہیے تھا۔ آپ باعثِ شرم ہیں۔‘‘ اینکر نے کہا ’’حملہ آور نے لکھا ہے کہ میں ہوٹل میں ہوں اور کوئی چیکنگ نہیں ہوئی، سیکرٹ سروس کیا کر رہی ہے، یہ نااہل ہے۔‘‘ اس پر ڈونلڈ ٹرمپ نے کہا ’’حملہ آور خود بھی نااہل ہے وہ آسانی سے پکڑا گیا۔‘‘

اینکر نے کہا کہ کچھ لوگوں کا خیال ہے کہ گزشتہ رات کوئی حملہ نہیں ہوا تھا۔ ٹرمپ نے کہا ایسے لوگوں کو لگتا ہے کہ جنگ عظیم بھی نہیں ہوئی، جو لوگ اس طرح کی باتیں کرتے ہیں وہ بیمار ذہن کے مالک ہیں۔ ٹرمپ نے یہ بھی کہا کہ حملہ آور اچھے کالج سے پڑھا اور ذہین بھی ہے لیکن بیمار ذہن ہے، کچھ لوگ ذہین ہوتے ہیں لیکن بیمار ذہن کے بھی ہوتے ہیں۔

یو این آئی۔ ع ا۔