نئی دہلی، لوک سبھا میں اپوزیشن کے لیڈر راہل گاندھی نے ہندوستان کی اقتصادی صورتحال کے تعلق سے سنگین تشویش کا اظہار کرتے ہوئے کہا ہے کہ ملک ایک بڑے معاشی بحران کی طرف بڑھ رہا ہے اور اس کا سب سے زیادہ اثر عام جنتا پر پڑے گا اتر پردیش دورے کے دوران مسٹر گاندھی نے منگل کو مرکزی حکومت اور وزیر اعظم نریندر مودی کونشانہ بناتے ہوئے کہا کہ گزشتہ کچھ برسوں میں ہندوستان کا اقتصادی ڈھانچہ پوری طرح بدل دیا گیا ہے، جس کے سبب ایک بڑا معاشی طوفان آنے والا ہے۔ انہوں نے کہا، “میں گزشتہ کچھ دنوں سے لگاتار کہہ رہا ہوں کہ مودی جی نے ملک کا اقتصادی ڈھانچہ بدل دیا ہے۔ ایک بڑا معاشی بحران آنے والا ہے۔ بدقسمتی سے اس کا خمیازہ عام آدمی کو بھگتنا پڑے گا۔ اس معاشی جھٹکے کا اثر صرف اڈانی، امبانی اور مودی پر نہیں پڑے گا، بلکہ ہندوستان کے عام لوگوں پر اس کا گہرا اثر پڑے گا۔”

مسٹر گاندھی نے الزام لگایا کہ حکومت معاشی چیلنجوں کا حل نکالنے کے بجائے لوگوں کو بیرون ملک سفر نہ کرنے کا مشورہ دے رہی ہے، جبکہ وزیر اعظم خود لگاتار غیر ملکی دوروں پر ہیں۔ انہوں نے کہا کہ آنے والا وقت ہندوستان کے لیے کٹھن ہو سکتا ہے اور حکومت کو وقت رہتے ٹھوس قدم اٹھانے چاہئیں۔

واضح رہے کہ مسٹر گاندھی منگل کو اپنے پارلیمانی حلقے رائے بریلی کے دورے پر ہیں، جہاں وہ کئی پروگراموں میں حصہ لے رہے ہیں۔ ان کے پروگراموں میں بچھراواں اسمبلی حلقہ میں بارات گھر کا افتتاح اور گرام وکاس سمواد، ہرچند پور اسمبلی میں کارکنوں سے خطاب، لال گنج کے سرینی علاقے میں مہیلا سمواد پروگرام اور ویبھو نگر وارڈ نمبر-14 میں سڑک کا افتتاح شامل ہیں۔

یواین آئی۔ایف اے

نئی دہلی، کانگریس صدر ملکارجن کھرگے نے چار دن کے اندر دوسری بار پٹرول اور ڈیژل کے قیمتیں بڑھائے جانے کے حکومت کے فیصلے پر حیرانی ظاہرکرتے ہوئے کہا ہے کہ وزیر اعظم نریندر مودی کو اس بارے میں عوام کو جواب دینا چاہیےمسٹر کھرگے نے منگل کو سوشل میڈیا پلیٹ فارم ’ایکس‘ پر کہا کہ حکومت نے 15 مئی کے بعد آج صبح اچانک پھر پٹرول اور ڈیژل کے قیمتیں بڑھا دیں۔ انہوں نے کہا کہ اب واضح ہو گیا ہے کہ ہندوستان بحران میں ہے اور مسٹر مودی کو اس کا جواب دینا چاہیے۔ کانگریس صدر نے تیل کے دام چار دن میں دوسری بار بڑھانے کے فیصلے کو حکومت کی غلط پالیسیوں کا نتیجہ بتایا اور کہا کہ مودی حکومت ناکامیوں کا بوجھ عوام کے سر پر ڈال رہی ہے۔

انہوں نے کہا کہ دام بڑھے چار ہی دن ہوئے کہ مودی حکومت نے پٹرول اور ڈیژل کے دام پھر بڑھا دیے۔ پوری تمہید باندھ کر، بچت کی نصیحت کرکے اپنی ناکامیوں کا بوجھ عوام پر ڈالنے کا کام جاری ہے۔ کانگریس صدر نے الزام لگاتے ہوئے کہا کہ ’عام لوگوں کی لوٹ اور صنعت کار گوتم اڈانی کو امریکہ سے چھوٹ‘، یہی مودی جی کا ’کمپرومائزڈ ماڈل‘ ہے۔ وزیر اعظم نے امریکہ سے ہاتھ پیر جوڑ کر روسی تیل خریدنے کی اجازت کی مدت ایک مہینے کے لیے بڑھوائی ہے اور اس سے ہندوستان کے وقار کو ٹھیس پہنچی ہے۔ انہوں نے کہا کہ اگر حکومت کے مطابق روسی تیل خریدنے کی اجازت مل گئی ہے، تو پٹرول اور ڈیژل کی قیمتوں کا بوجھ عام لوگوں پر کیوں ڈالا جا رہا ہے۔

مسٹرکھرگے نے الزام لگایا کہ بھارتیہ جنتا پارٹی میں دوراندیشی اور قیادت کی کمی ہے۔ انہوں نے کہا کہ بحران کے وقت حکومت انتخابات میں مصروف رہی اور بعد میں ’چکنی چپڑی باتیں کر کے لوٹ کا پلان‘ بنایا گیا۔ کانگریس صدر نے کہا کہ صرف بیرون ملک میں اسپانسر شدہ تعلقات عامہ کی سرگرمیاں کرنے سے کوئی ’وشو گرو‘ نہیں بن جاتا، عوام کے تئیں جوابدہی بھی یقینی بنانی پڑتی ہے۔ انہوں نے وزیر اعظم سے ہندوستان کے سامنے موجود سوالوں کا جواب دینے کا مطالبہ کرتے ہوئے کہا کہ بحران سے نمٹنے کے لیے حکومت کیا کر رہی ہے، یہ ہندوستان کو بتایا جانا چاہیے۔

یواین آئی۔ایف اے

نئی دہلی، کانگریس نے کہا ہے کہ سپریم کورٹ کی تین رکنی بنچ کی جانب سے اروناچل پردیش کے وزیر اعلیٰ پیما کھانڈو کے خلاف بدعنوانی کے الزامات کی جانچ کا حکم دیے جانے کے بعد وزیر اعظم نریندر مودی کو ان سے استعفیٰ طلب کرنا چاہیے کانگریس کمیونیکیشن ڈپارٹمنٹ کے انچارج جے رام رمیش نے منگل کو سوشل میڈیا پلیٹ فارم ’ایکس‘ پر کہا کہ گزشتہ چھ اپریل کو سپریم کورٹ کی تین ججوں پر مشتمل بنچ نے مرکزی تفتیشی بیورو (سی بی آئی) کو ان الزامات کی ابتدائی جانچ کرنے کی ہدایت دی تھی، جن میں جنوری 2015 سے دسمبر 2025 کے درمیان اروناچل پردیش کے وزیر اعلیٰ کے خاندان کو مبینہ مفادات کے ٹکراؤ کی صورت میں 1,270 کروڑ روپے کے ٹھیکے دیے جانے کا معاملہ شامل ہے۔

انہوں نے کہا کہ یہ کسی نچلی عدالت یا ہائی کورٹ کا نہیں بلکہ سپریم کورٹ کا حکم ہے۔ اس کے باوجود وزیر اعلیٰ اب بھی اپنے عہدے پر برقرار ہیں۔ مسٹر کھانڈو محکمہ تعمیرات عامہ (پی ڈبلیو ڈی) کے وزیر بھی ہیں اور ان فائلوں پر ان کا کنٹرول ہے جن کی جانچ کے لیے سی بی آئی کو ضرورت پڑ سکتی ہے۔

مسٹر رمیش نے اس معاملے میں وزیر اعظم مودی پر سوال اٹھاتے ہوئے طنز کیا اور کہا کہ جنہوں نے کبھی “نہ کھاؤں گا، نہ کھانے دوں گا” کہا تھا، وہ اس معاملے پر خاموش کیوں ہیں اور مسٹر کھانڈو سے استعفیٰ کیوں نہیں مانگا گیا۔ انہوں نے الزام لگایا کہ یہ سپریم کورٹ کے حکم کا مذاق ہے۔

کانگریس لیڈر نے یہ بھی کہا کہ بھارتیہ جنتا پارٹی (بی جے پی) کے کچھ دیگر وزرائے اعلیٰ بھی اروناچل پردیش کے وزیر اعلیٰ جیسی ہی صف میں آتے ہیں۔

یواین آئی۔الف الف