نئی دہلی، راجدھانی کے مالویہ نگر علاقے میں بدھ کی صبح ایک ریستوراں میں بھیانک آگ لگنے سے کم از کم 20 لوگوں کی موت ہو گئی، جن میں زیادہ تر افریقی نژاد شہری تھے۔ فائر بریگیڈ کے اہلکاروں، پولیس اور مقامی لوگوں کی مدد سے 27 افراد کو بحفاظت نکال کر قریبی ہسپتالوں میں داخل کرایا گیا ہے۔

مقامی بی جے پی ایم ایل اے ستیش اپادھیائے نے کہا کہ جس عمارت میں یہ حادثہ ہوا، وہاں کچھ غیر ملکی شہریوں کے بھی ٹھہرے ہونے کی اطلاع ہے۔ مسٹر اپادھیائے نے کہا، “میری پہلی ترجیح بچاؤ مہم ہے۔ کسی کو بھی بخشا نہیں جائے گا۔ اگر جانچ میں یہ پایا گیا کہ مالک ضروری لائسنس کے بغیر کام کر رہا تھا یا کسی دوسری سطح پر لاپروائی ہوئی ہے، تو ذمہ داروں کے خلاف سخت کارروائی کی جائے گی۔”

ابتدائی معلومات کے مطابق، ‘لیمن گرین ریستوراں ‘ کو صرف چھ کمروں کی تعمیر کی اجازت تھی لیکن وہاں 25 کمرے موجود تھے۔ اس مبینہ بے ضابطگی نے ریگولیٹری نگرانی اور اجازت کے طریقۂ کار پر سنگین سوالات کھڑے کر دیے ہیں۔

حکام نے بتایا کہ عمارت کا بیسمنٹ باہر سے بند تھا۔ بچاؤ ٹیم نے تالا توڑ کر اندر پھنسے لوگوں کو باہر نکالا۔ جان بچانے کے لیے کئی لوگوں نے کھڑکیوں سے چھلانگ بھی لگائی۔ یہ واقعہ ساکیت پولیس اسٹیشن کے دائرۂ اختیار میں آتا ہے۔

دہلی فائر سروس (ڈی ایف ایس) کے مطابق، مالویہ نگر میں واقع لیمن گرین ریستوراں میں آگ لگنے کی اطلاع صبح تقریباً نو بجے ملی۔ ابتدائی مرحلے میں فائر بریگیڈ کی سات گاڑیوں کو موقع پر بھیجا گیا، جبکہ بعد میں امدادی اور بچاؤ کاموں کو تیز کرنے کے لیے 10 اضافی گاڑیاں روانہ کی گئیں۔

فائر بریگیڈ کے ایک اہلکار نے بتایا کہ صبح پونے دس بجے تک بیسمنٹ سے تین لوگوں کو بحفاظت باہر نکال لیا گیا تھا۔ اس کے بعد صبح تقریباً 11:20 بجے اطلاع ملی کہ فائر بریگیڈ کے اہلکاروں، پولیس اور مقامی لوگوں کی مدد سے 25 دیگر افراد کو بھی بچا کر ہسپتال پہنچایا گیا ہے۔ دو اور لوگوں کو دوپہر تک نکال لیا گیا، جس سے بچائے گئے لوگوں کی کل تعداد 27 تک پہنچ گئی ہے۔

مقامی پولیس اور دیگر ہنگامی ایجنسیوں کی ٹیموں کو بھی امدادی کاموں میں لگایا گیا۔ بھیڑ کو قابو کرنے کے لیے اضافی پولیس فورس تعینات کی گئی اور جائے وقوعہ تک رسائی کو محدود کر دیا گیا۔ دہلی کی وزیر اعلیٰ محترمہ ریکھا گپتا نے اس واقعے کو انتہائی دردناک قرار دیتے ہوئے جانی و مالی نقصان پر گہرے دکھ کا اظہار کیا ہے۔

یو این آئی۔ ایف اے

نئی دہلی، کانگریس پارٹی نے عظیم نکوبار جزیرے کے ترقیاتی پروجیکٹ پر شدید تشویش کا اظہار کرتے ہوئے مرکزی حکومت سے اس پر دوبارہ غور کرنے اور مناسب ماحولیاتی جائزہ لینے کی اپیل کی ہے  کانگریس کے کمیونی کیشن ڈپارٹمنٹ کے انچارج جے رام رمیش نے بدھ کو ماحولیات، جنگلات اور موسمیاتی تبدیلی کے وزیر بھوپیندر یادو کو ایک مکتوب تحریر کیا، جس میں کہا گیا کہ اس پروجیکٹ کو دی گئی ماحولیاتی منظوری ناکافی ماحولیاتی اثرات کے جائزے پر مبنی ہے۔ اس کا دعویٰ ہے کہ اس سے جزیرے کی حیاتیاتی تنوع، سمندری ماحولیات اور مقامی کمیونٹیز پر منفی اثر پڑ سکتا ہے۔

سوشل میڈیا پر خط کو شیئر کرتے ہوئے مسٹر رمیش نے کہا کہ وہ اور وزیر گزشتہ دو برسوں سے اس معاملے پر خط و کتابت کر رہے ہیں۔ منصوبے کے ممکنہ ماحولیاتی نقصان پر تشویش کا اظہار کرتے ہوئے، انہوں نے حکومت پر زور دیا کہ وہ اس پر نظر ثانی کرے اور متعلقہ رپورٹس کو عام کرکے شفافیت کو یقینی بنائے۔

انہوں نے کہا کہ منصوبے کے لیے تیار کی گئی ماحولیاتی اثرات کی تشخیص کی رپورٹ مناسب بنیادی ڈیٹا پر مبنی نہیں ہے اور جزیرے کی حساس ماحولیات سے متعلق کئی اہم پہلوؤں کو نظر انداز کرتی ہے۔

گالاتھیا بے کے علاقے میں ساحلی کٹاؤ کی رپورٹوں کا حوالہ دیتے ہوئے مسٹر رمیش نے اس منصوبے کے طویل مدتی ماحولیاتی اثرات کا ایک آزاد اور جامع مطالعہ کرنے کا مطالبہ کیا۔ انہوں نے یہ بھی مطالبہ کیا کہ اس منصوبے پر اعلیٰ اختیاراتی کمیٹی کی رپورٹ منظر عام پر لائی جائے اور مقامی اور قبائلی برادریوں کے تحفظات کو ترجیح دی جائے۔

یو این آئی۔ م الف

نئی دہلی، ہندوستان نے پاکستان اور یورپی یونین (ای یو) کے مشترکہ بیان میں جموں و کشمیر اور لداخ کے حوالے سے کیئے گئے تبصرے پر سخت موقف اختیار کیا ہے اور اسے ناپسندیدہ قرار دیتے ہوئے سرے سے مسترد کر دیا ہے۔

وزارت خارجہ کے ترجمان رندھیر جیسوال نے منگل کو یہاں ہفتہ وار میڈیا بریفنگ میں اس سلسلے میں پوچھے گئے سوال کے جواب میں کہا کہ مرکز کے زیر انتظام علاقے جموں و کشمیر اور لداخ ہندوستان کے اٹوٹ انگ ہیں۔ یہ ہندوستان کا اندرونی معاملہ ہے اور جس کا اس معاملے سے کوئی لینا دینا نہیں ہے، اسے اس طرح کے تبصرے سے گریز کرنا چاہیے۔ رپورٹوں کے مطابق پاکستان اور یورپی یونین کے درمیان پیر کو اسلام آباد میں ہونے والی بات چیت کے بعد مشترکہ بیان میں روس اور یوکرین کے درمیان جنگ کے ساتھ ساتھ جموں و کشمیر کا بھی ذکر کیا گیا ہے۔

قابل ذکر ہے کہ پاکستان جموں و کشمیر کے معاملے کو بین الاقوامی رنگ دینے کے لیے وقتاً فوقتاً کشمیر کا راگ الاپتا رہا ہے۔ اس سے قبل حال ہی میں پاکستان اور چین کے مشترکہ بیان میں بھی پاکستان نے یہ مسئلہ اٹھایا تھا۔ ہندوستان نے اس وقت بھی دونوں ممالک کو سخت پھٹکار لگائی تھی۔ اس معاملے میں ہندوستان شروع ہی سے اپنے موقف پر قائم رہا ہے اور اس نے اپنے اندرونی اور خودمختار امور میں کسی تیسرے ملک یا تنظیم کے کردار کو کبھی تسلیم نہیں کیا ہے۔

یواین آئی۔ایف اے