میری لینڈ، امریکی صدر ڈونلڈ ٹرمپ نے میری لینڈ میں ایک تقریب سے خطاب میں بتایا کہ آبنائے ہرمز سے جہاز غیر معمولی انداز میں گزرنے لگے ہیں اور تقریباً 700 بحری جہاز گزر رہے ہیں۔

امریکی صدر نے کہا آبنائے ہرمز سے اتنے جہاز گزر رہے ہیں کہ ایسا پہلے کبھی نہیں دیکھا، جہاز گزرنے پر کمپنیاں بہت خوش ہیں، ایران کے ساتھ معاہدے پر دستخط ہو چکے ہیں اور اب 60 دنوں میں حتمی ڈیل کرنی ہوگی۔

ڈونلڈ ٹرمپ نے ایران کو ایک بار پھر متنبہ کرتے ہوئے کہا کہ ساٹھ روز میں حتمی معاہدہ نہ ہوا تو سخت اقدامات کریں گے، انھوں نے خبردار کیا کہ اگر مقررہ مدت میں حتمی معاہدہ نہ ہو سکا تو امریکہ ایسے اقدامات کرے گا جس سے ایران کو خوشی نہیں ہوگی اور مجھے نہیں لگتا کہ ایسا کچھ کرنا پڑے گا، حتمی ڈیل ہو جائے گی۔

جنگ بندی معاہدے پر ٹرمپ نے سعودی بادشاہ اور ولی عہد کا شکریہ ادا کیا، اور کہا کہ یو اے ای کے صدر بہترین شخصیت ہیں۔ اس موقع پر امریکی صدر نے یوکرین جنگ پر بھی تبصرہ کیا اور بتایا کہ روس یوکرین جنگ میں 34 ہزار افراد مارے جا چکے ہیں، ہم کوشش کر رہے ہیں کہ دونوں میں جنگ بندی ہو جائے۔

ڈونلڈ ٹرمپ نے چین کے حوالے سے کہا کہ صدر شی جن پنگ ستمبر میں امریکا کا دورہ کریں گے، اور میں بھی دوبارہ چین کا دورہ کروں گا، وہاں بڑی کانفرنس ہوگی، میں نے چین کے صدر کو کہا تھا کہ آبنائے ہرمز میں مداخلت نہ کریں، انھوں نے میری بات مان لی اور مداخلت نہیں کی۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ پاکستانی فیلڈ مارشل عاصم منیر اور پاکستان کے وزیراعظم عظیم ہیں، پاکستانی رہنماؤں نے ایران سے ڈیل میں بہت مدد دی۔

صدر ڈونلڈ ٹرمپ کی جانب سے ایک بار پھر پاکستان کے وزیراعظم اور فیلڈ مارشل عاصم منیر کی تعریف کی گئی ہے۔ صدر ٹرمپ نے امریکی ویب سائٹ کو انٹرویو دیتے ہوئے کہا کہ فیلڈ مارشل عاصم منیر عظیم آدمی ہیں اور پاکستان کے وزیراعظم بھی عظیم ہیں۔ امریکی صدر نے کہا کہ فیلڈ مارشل عاصم منیر اپنے وزیراعظم کا مکمل احترام کرتے ہیں جو بہت خوبصورت بات ہے۔ ٹرمپ نے کہا کہ پاکستانی رہنماؤں نے ایران سے ڈیل میں بہت مدد دی، پاکستانی قیادت ایرانی قیادت اور ایرانی قوم کو جانتی تھی۔

بعد ازاں امریکی صدر ڈونلڈ ٹرمپ نے ایک تقریب سے خطاب کرتے ہوئے کہا کہ چینی صدر سمتبر میں امریکہ کا دورہ کریں گے، ایران کے معاملے میں چین نے بھی اہم کردار اداکیا۔ ڈونلڈ ٹرمپ نے کہا کہ چین ایران سے اپنی ضروریات کا 50 فیصد تیل خریدتا ہے۔

اسرائیل کے ساتھ امریکہ کے بہترین تعلقات ہیں۔ اس کے علاوہ صدر ٹرمپ نے کہا کہ رواں سال کسی وقت دوبارہ چین جاؤں گا۔

یو این آئی۔ ع ا۔

واشنگٹن، امریکہ کے خصوصی ایلچی اسٹیو وٹکوف ایران کے ساتھ ممکنہ جوہری معاہدے پر مذاکرات کے لیے سوئٹزرلینڈ روانہ ہو گئے ہیں۔ توقع ظاہر کی جا رہی ہے کہ امریکہ اور ایران کے درمیان بات چیت کا پہلا دور وہیں منعقد ہوگا۔

یہ اطلاع خبر رساں ویب سائٹ ایکسیوس نے ایک نامعلوم امریکی عہدیدار کے حوالے سے دی ہے۔ عہدیدار کے مطابق امریکی صدر ڈونلڈ ٹرمپ کے داماد جیرڈ کشنر پہلے ہی سوئٹزرلینڈ میں موجود ہیں۔

رپورٹ میں کہا گیا ہے کہ ابھی یہ واضح نہیں ہے کہ مذاکرات کے لیے کوئی نیا وقت طے کیا گیا ہے یا نہیں۔ بات چیت جمعہ کو شروع ہونے والی تھی، لیکن لبنان میں اسرائیل اور اور لبنان کی شیعہ تنظیم حزب اللہ کے درمیان لڑائی کی وجہ سے اسے مؤخر کر دیا گیا تھا۔

رپورٹ کے مطابق امریکی وفد کی قیادت نائب صدر جے ڈی وینس کرنے والے تھے، لیکن انہوں نے جمعرات کو اپنا دورہ ملتوی کر دیا اور ابھی یہ بھی واضح نہیں کہ آیا وہ ہفتے کے اختتام تک سوئٹزرلینڈ جائیں گے یا نہیں۔

واضح رہے کہ 14 جون کو ایران اور امریکہ نے تصدیق کی تھی کہ ایک مفاہمتی یادداشت (ایم او یو) پر کام مکمل ہو چکا ہے۔

دونوں ممالک نے 18 جون کی شب اس دستاویز پر دستخط کیے، جس میں 28 فروری سے جاری فوجی تنازع کے خاتمے کی شق شامل ہے۔

اس مفاہمتی یادداشت کے ذریعے دونوں فریقوں کے درمیان کئی ماہ سے جاری کشیدگی کے خاتمے کی جانب ایک اہم پیش رفت ہوئی ہے۔

یہ معاہدہ دونوں ممالک کو ایرانی جوہری مسئلے اور امریکی پابندیوں کے حوالے سے حتمی معاہدے پر مذاکرات کے لیے 60 دن کی مہلت فراہم کرتا ہے۔ اس کے علاوہ یہ امریکہ کے لئے اپنی بحری ناکہ بندی ختم کرنے اور ایران کے لئے آبنائے ہرمز سے تجارتی جہازوں کی آمد و رفت بحال کرنے کی ایک متعین مدت مقرر کی گئی ہے۔

یواین آئی۔الف الف