خبراردو:

سرحدی قصبہ لنگیٹ کے کھانو باباگنڈ علاقے میں فوج اور فورسز نے جمعرات اور جمعہ کی درمیانی شب کو کڑا محاصرہ عمل میں لاتے ہوئے یہاں چھپے بیٹھے جنگجوؤں کو تلاش کرنے کے لیے بڑے پیمانے پر تلاشی آپریشن شروع کیا۔ معلوم ہوا کہ فوج کی 22آر آر، 92بٹالین سی آر پی ایف اور جموں وکشمیر پولیس کے اسپیشل آپریشن گروپ کے خصوصی دستوں نے کھانوباباگنڈ علاقے کا جنگجوؤں سے متعلق مصدقہ اطلاع موصول ہونے کے بعد کڑا محاصرہ عمل میں لایا۔ فوج و فورسز نے اس موقعے پر گاؤں کے اندرون و بیرون راستے کو مکمل طور پر سیل کرتے ہوئے فرار کے تمام ممکنہ راستوں پر کڑے پہرے بٹھاتے ہوئے یہاں فورسز کی بھاری نفری کو تعینات کردیا۔

ذرائع نے بتایا کہ محاصرے کے دوران فورسز نے علاقے میں گھر گھر تلاشی کا آغاز کیا تاہم 5گھنٹے تک جاری تلاشی آپریشن کے دوران فورسز کو کوئی بھی سراغ ہاتھ نہیں لگا۔ انہوں نے بتایا کہ جونہی طویل وقفے کے بعد تلاشی پارٹی مشتبہ مقام کے نزدیک پہنچ گئی تو یہاں چھپے بیٹھے جنگجوؤں نے فورسز پر خود کار ہتھیاروں سے فائرنگ شروع کردی۔ معلوم ہوا کہ فورسز نے بھی مورچہ سنبھالتے ہوئے جنگجوؤں کی فائرنگ کا جراب دیا اور اس طرح علاقے میں باضابطہ طور پر جھڑپ شروع ہوئی۔

معلوم ہوا کہ شبانہ مسلح تصادم آرائی کے دوران گاؤں میں گولیوں اور سماعت شکن دھماکوں کی آوازیں سنی گئی جس کے نتیجے میں آبادی گھروں میں سہم کر رہ گئی تاہم صبح ہوتے ہی باباگنڈ اور متصل علاقوں سے نوجوانوں کی بڑی تعداد نے سڑکوں پر نکل کر فورسز کارروائی کے خلاف احتجاج کیا۔ معلوم ہوا کہ مظاہرین نے علاقے میں تعینات فورسز اہلکاروں پر شدید خشت باری کرنے کے ساتھ ساتھ جائے جھڑپ کی جانب پیش قدمی شروع کی۔

عینی شاہدین کا کہنا تھا کہ مظاہرین نے فورسز اہلکاروں پر پتھراؤ کرنے کے علاوہ اسلام ، آزادی اور جنگجوؤں کے حق میں بھی زور دار نعرے لگائے جبکہ مظاہرین کی ایک بڑی تعداد نے جائے جھڑپ کی طرف پیش قدمی شروع کرنے کی کوشش کی تاہم یہاں موجود اہلکاروں نے انہیں ایسا کرنے کی اجازت نہیں دی جس کے نتیجے میں طرفین کے درمیان شدید جھڑپوں کا آغاز ہوا۔ انہوں نے بتایا کہ اس موقعے پر فورسز اہلکاورں نے مظاہرین کو منتشر کرنے کی غرض سے آنسو گیس کے درجنوں گولے داغنے کے ساتھ ساتھ پیلٹ فائرنگ کی جس کے نتیجے میں کئی مظاہرین پیلٹ لگنے کی وجہ سے زخمی ہوگئے۔ معلوم ہوا کہ فورسز کارروائی کے نتیجے میں 5نوجوان زخمی ہوئے جنہیں علاج و معالجے کی خاطر نزدیکی ہسپتال منتقل کردیا گیا۔ جبکہ زخمیوں میں ایک نوجوان جاں بحق ہو گیا ہے .

جبلاک میڈیکل آفیسر لنگیٹ نے تفصیلات فراہم کرتے ہوئے بتایا کہ فورسز کارروائی میں 5نوجوان زخمی ہوئے ہیں جن میں سے 2کو معمولی چوٹیں آئی تھی اور انہیں ابتدائی مرہم پٹی کے بعد گھروں کو روانہ کردیا گیا تاہم زخمیوں میں سے 3نوجوانوں کے چہرے اور دیگر اعضا میں پیلٹ پیوست ہوئے ہیں جنہیں علاج و معالجے کی خاطر ڈسٹرکٹ ہسپتال ہندوارہ منتقل کیا گیا ہے۔

ادھر ذرائع نے بتایا کہ فورسز اہلکاروں نے جنگجوؤں کی نقل و حرکت کو مسدود کرنے کی خاطر دوران شب ہی علاقے میں جنریٹر نصب کرتے ہوئے روشنی کا انتظام کیا۔ادھر فورسز نے دعویٰ کرتے ہوئے کہاکہ جھڑپ کے دوران 2عدم شناخت جنگجوؤں کو جاں بحق کردیا گیا تاہم جونہی جائے جھڑپ پر فورسز اہلکارجنگجوؤں کی لاشوں کو حاصل کرنے کی غرض سے آگے بڑھے تو یہاں زندہ جنگجوؤں نے فوج پر شدید فائرنگ کرتے ہوئے سی آر پی ایف انسپکٹر سمیت ایس او جی اہلکار کو موقعے پر ہی ہلاک کردیا۔ ذرائع نے بتایا کہ جنگجوؤں کی دوبارہ فائرنگ کے نتیجے میں سی آر پی ایف کی 92بٹالین سے وابستہ پنٹو نامی انسپکٹر اور ایس او جی ہندوارہ سے تعلق رکھنے والے نصیر احمد گولیاں لگنے سے لقمہ اجل بن گئے۔

انہوں نے بتایا کہ طرفین کے درمیان دوبارہ شروع ہوئی فائرنگ کے نتیجے میں فوج کے 5اہلکار بھی بری طرح سے زخمی ہوگئے جنہیں علاج و معالجے کی خاطر فوجی ہسپتال منتقل کردیا گیا ۔ادھر علاقے میں آخری اطلاعات موصول ہونے تک طرفین کے درمیان فائرنگ کا تبادلہ جاری تھا۔ادھر جھڑپ میں عام شہریوں کی جانیں تلف ہونے کے پیش نظر پولیس نے عوام کے نام ایڈوائزری جاری کرتے ہوئے انہیں جائے جھڑپ کے قریب جانے سے اجتناب کرنے کی ہدایت کی۔

پولیس کا کہنا تھا کہ طرفین کی گولی باری کے نتیجے میں عین ممکن ہے کہ جائے جھڑپ کے ارد گرد کوئی بارودی شل پھٹنے سے رہ گیا ہو لہٰذا جب تک نہ فورسز اہلکار جائے جھڑپ کو بارودی مواد سے مکمل طور پر صاف کریں گے تب تک عوام یہاں آنے سے پرہیز کریں۔اس دوران علاقے میں جنگجوؤں کی ہلاکت کے خلاف مکمل ہڑتال رہی جس دوران یہاں معمول کی سرگرمیاں ٹھپ ہوکر رہ گئیں۔ معلوم ہوا کہ جمعہ کو دن بھر باباگنڈ اور مضافاتی علاقوں میں مکمل ہڑتال رہی جس دوران یہاں تجاری، عوامی، کاروباری اور غیر سرکاری سرگرمیاں ٹھپ ہوکر رہ گئیں جبکہ سڑکوں پر بھی ٹریفک کی نقل و حمل بری طرح سے متاثر رہی۔ ادھر انتظامیہ نے ضلع بھر میں امن و قانون کی صورتحال کو برقرار رکھنے اور بے لگام افواہ بازی کی روک تھام کے لیے ضلع بھر میں تیز رفتار موبائل انٹرنیٹ سروس معطل کردی۔