خبراردو:

رواں سال منعقد ہورہے لوک سبھا انتخابات سے متعلق حتمی شیڈول کو جاری کرتے ہوئے الیکشن کمیشن آف انڈیا نے اتوار کو انتخابی عمل سے متعلق تمام پہلوؤں کا احاطہ کرتے ہوئے تمام قیاس آرائیوں سے پردہ اُٹھایا۔ چیف الیکشن کمشنر سنیل ارورا نے نئی دہلی میں پرہجوم پریس کانفرنس کے دوران بتایا کہ ملک بھر میں رواں برس منعقد ہورہے لوک سبھا انتخابات 11اپریل 2019سے شروع ہوں گے۔ انہوں نے بتایا کہ ملک بھر کی تمام ریاستوں بشمول جموں وکشمیر میں لوک سبھا انتخابات 7مرحلوں میں منعقد ہوں گے جس دوران رائے دہندگان اپنی رائے کا جمہوری طریقے پر استعمال کرتے ہوئے منتخب اُمیدواروں کو میدان میں لائیگی۔انتخابات سے متعلق شیڈول کو جاری کرنے کے دوران چیف الیکشن کمیشن آف انڈیا نے واضح کیا کہ شیڈول کو جاری کئے جانے کے ساتھ ہی ملک بھر میں انتخابات سے متعلق ضابطہ اخلاق نافذ ہوگیا ہے۔ای سی آئی نے سماجی رابطہ سائٹ فیس بک کو ہدایت کرتے ہوئے کہا کہ انتخابات میں حصہ لینے والے اُمیدواروں کی تشہیر الیکشن سے 48گھنٹے بند ہونی چاہیے۔

انہوں نے بتایا کہ 7مرحلوں پر محیط انتخابی عمل مکمل ہونے کے بعد 23مئی 2019کو انتخابات کے نتائج ظاہر کئے جائیں گے۔چیف الیکشن کمشنر آف انڈیا سنیل ارورا کا کہنا تھا کہ پہلے مرحلے کے دوران 11اپریل کو ووٹ ڈالے جائیں گے جبکہ 18اپریل 2019کو دوسرے مرحلا شروع کیا جائیگا۔ انہوں نے بتایا کہ 23اور 29اپریل کو بالترتیب تیسرے اور چوتھے مرحلے کے لیے ووٹ ڈالے جائیں گے۔چیف الیکشن کمشنر کا کہنا تھا کہ پانچوے، چھٹے اور ساتوے مرحلے کے لیے بالترتیب 12,6اور 19مئی کو ووٹنگ عمل میں لائی جائیگی۔ادھر چیف الیکشن کمشنر آف انڈیا کے مطابق ریاست جموں وکشمیر کی 6پارلیمانی نشستوں پر4مرحلوں میں انتخابات منعقد کرائے جائیں گے جہاں بالترتیب 23, 18, 11اور 29اپریل کوووٹ ڈالے جائیں گے جبکہ 23مئی 2019کو ووٹوں کی گنتی عمل میں لائے جائیگی۔

الیکشن کمشنر آف انڈیا کاکہنا تھا کہ اندھرا پردیش، سکم، اروناچل پردیش اور اُریسہ میں اسمبلی و پارلیمانی انتخابات ایک ساتھ منعقد ہوں گے تاہم ریاست جموں وکشمیر میں سیکورٹی صورتحال کو مدنظر رکھتے ہوئے لوک سبھا اور اسمبلی انتخابات کو ایک ساتھ منعقد کرانا ٹھیک نہیں ہے۔ انہوں نے بتایا کہ الیکشن کمیشن آف انڈیا نے حال ہی میں ریاست جموں وکشمیر کا دورہ کرتے ہوئے یہاں گورنر ستیہ پال ملک کی قیادت والی انتظامیہ، سیاسی جماعتوں اور سیکورٹی ایجنسیوں کے اعلیٰ حکام کے ساتھ ریاست کی سیاسی و سیکورٹی صورتحال پر تفصیلی تبادلہ خیال کیا تاہم جو رپورٹ ہمیں سیکورٹی ذرائع نے فراہم کی اُس اعتبار سے فی الوقت لوک سبھا اور اسمبلی انتخابات کو ایک ساتھ منعقد کرانا خطرے سے خالی نہیں تھا۔ انہوں نے بتایا کہ ریاست کی مجموعی سیکورٹی صورتحال گھمبیر اور پرتناؤ ہے لہٰذا فی الوقت صرف لوک سبھا انتخابات کو ہی منعقد کیا جائیگا۔

ادھر ریاست کی مین اسٹریم پارٹیوں نے الیکشن کمیشن آف انڈیا کی جانب سے لوک سبھا اور اسمبلی انتخابات کو علیحدہ علیحدہ منعقد کرانے کے فیصلے پر حیرت اور افسوس کا اظہار کیا ہے۔ نیشنل کانفرنس، کانگریس ، بی جے پی اور دیگر سیاسی پارٹیوں کا کہنا ہے کہ ریاست کی سبھی سیاسی جماعتیں انتخابات کے لیے تیار تھی تاہم الیکشن کمیشن آف انڈیا کی جانب سے اس طرح کا فیصلہ آنا جمہوری اقدار کی کھل کھلا پامالی ہے۔ مین اسٹریم سیاسی پارٹیوں کا ما ننا ہے کہ اگرالیکشن کمیشن آف انڈیا کے مطابق ریاست جموں وکشمیر میں اسمبلی انتخابات سے متعلق حالات سازگار نہیں ہے تو لوک سبھا انتخابات کے لیے حالات کیسے ٹھیک ہے؟.

ادھر خفیہ ذرائع کا کہنا ہے کہ الیکشن کمیشن آف انڈیا کی جانب سے لوک سبھا انتخابات سے متعلق شیڈول کو جاری کردینے کے نتیجے میں اسمبلی انتخاب کا انعقاد کھٹائی میں پڑگیا ہے۔ انہوں نے بتایا کہ ریاستی سرکار موجودہ صورتحال میں پے در پے لوک سبھا انتخابات اور اسمبلی انتخابات کو منعقد کرنے کی متحمل نہیں ہوسکتی۔

ذرائع نے بتایا کہ ایسا محسوس ہورہا ہے کہ ریاست میں لوک سبھا انتخابابات کے انعقاد سے اسمبلی انتخابات ایک سال کے لیے ٹل گئے ہیں اور سرکار سال 2020میں اب اسمبلی انتخابات کو منعقد کریگی۔