نئی دہلی، کانگریس پارٹی نے کہا ہے کہ مغربی ایشیا میں امن کی بحالی کے لیے ثالث کے طور پر دہشت گردانہ سرگرمیوں کو فروغ دینے والے پاکستان کا نام سامنے آنا ہندستان کی سفارتی ناکامی ہے اور اب وزیر خارجہ ایس جے شنکر اس ناکامی پر پردہ ڈالنے کی کوشش کر رہے ہیں جمعرات کو ایک بیان میں کانگریس کمیونیکیشن ڈیپارٹمنٹ کے انچارج جے رام رمیش نے کہا کہ پاکستان جیسے ملک کو ثالث کے طور پر قبول کرنا انتہائی قابل اعتراض ہے۔ انہوں نے کہا کہ پاکستان طویل عرصے سے دہشت گردی کو فروغ دینے، اسامہ بن لادن جیسے دہشت گردوں کو پناہ دینے، جوہری عدم پھیلاؤ کے قوانین کی خلاف ورزی اور اے کیو خان نیٹ ورک کے ذریعے جوہری پھیلاؤ میں ملوث رہا ہے۔ اس نے افغانستان میں شہری اہداف پر حملے کیے نیز اپنے ہی شہریوں اور اقلیتوں کے خلاف کارروائی کی۔

مسٹر رمیش نے کہا کہ 2008 کے ممبئی حملے کے بعد ڈاکٹر منموہن سنگھ کی حکومت نے پاکستان کو عالمی سطح پر الگ تھلگ کر دیا تھا، لیکن حالیہ واقعات میں ایسا نہیں ہوسکا۔ عاصم منیر کے بیانات کا حوالہ دیتے ہوئے انہوں نے کہا کہ اس کے باوجود پاکستان عالمی سطح پر مزید متعلقہ ہوتا جا رہا ہے۔

انہوں نے الزام لگایا، “ہماری حکومت کی سفارت کاری، عالمی رابطہ اور بیانیہ کے انتظام میں کمزوریوں کی وجہ سے، ایک غیر مستحکم ملک کو ’’بروکر‘‘ کا کردار مل گیا ہے، جو ہندوستان کی خارجہ پالیسی پر سنگین سوالات کھڑے کرتا ہے۔”

یواین آئی۔الف الف

سری نگر، جموں و کشمیر پولیس کی کاؤنٹر انٹیلی جنس کشمیر (سی آئی کے) نے پاکستان میں قائم دہشت گرد تنظیم لشکرِ طیبہ سے وابستہ ایک دہشت گرد ماڈیول کی تحقیقات کے سلسلے میں وادیِ کشمیر میں دس مقامات پر چھاپے مارے ہیں حکام نے جمعرات کو بتایا کہ سری نگر، شوپیاں اور گاندربل اضلاع میں دس مقامات پر چھاپے مارے گئے۔ یہ کارروائی سی آئی کے پولیس اسٹیشن میں درج دہشت گردی کے ایک نئے تفتیشی کیس کا حصہ ہے۔ یہ چھاپے ایک عدالت سے سرچ وارنٹ حاصل کرنے کے بعد مارے گئے۔ آخری اطلاعات تک چھاپے جاری تھے۔

اطلاعات کے مطابق گاندربل ضلع میں چھ مقامات، شوپیاں ضلع میں تین مقامات اور سری نگر ضلع میں ایک مقام پر تلاشی لی گئی۔ ان چھاپوں کا تعلق ایک بین الاقوامی دہشت گردی کے ماڈیول سے ہے، جسے مبینہ طور پر شبیر احمد لون نامی ایک فرد چلاتا ہے۔ یہ شخص لشکر طیبہ کا کارندہ ہے اور اس کا تعلق گاندربل کے کنگن علاقے سے ہے، جو اس وقت بنگلہ دیش میں مقیم ہے۔

حکام نے بتایا کہ ماڈیول مبینہ طور پر بنگلہ دیش اور پاکستان سے کام کرنے والے دہشت گرد تنظیم کے ہینڈلرز سے ہدایات حاصل کر رہا تھا۔ حکام نے بتایا کہ تلاشی کی کارروائیوں کا مقصد دہشت گرد نیٹ ورک سے متعلق ثبوت جمع کرنا تھا، جس میں ڈیجیٹل آلات، دستاویزات اور دیگر مواد شامل ہیں۔ اس معاملے کی مزید تحقیق جاری ہے۔ٰ

یو این آئی۔ الف الف۔ م الف

برلن ، جرمنی کے صدر فرینک والٹر نے امریکا کی ایران جنگ کو تباہ کُن سیاسی غلطی اور بین الاقوامی قانون کی خلاف ورزی قرار دے دیا برلن میں ایک تقریب سے خطاب کرتے ہوئے جرمن صدر نے امریکی صدر ٹرمپ پر کڑی تنقید کی اور کہا کہ یہ جنگ بین الاقوامی قانون کی خلاف ورزی ہے، اس جنگ کے لیے امریکا کا جواز قابلِ قبول نہیں ہے۔

انہوں نے مزید کہا کہ اگر جنگ کا مقصد ایران کو جوہری ہتھیار بنانے سے روکنا تھا تو یہ غیر ضروری جنگ ہے۔

دوسری جانب ایرانی وزیرخارجہ عباس عراقچی نے کہا ہے کہ جرمن صدر کو خاموشی توڑ کر ایران کے خلاف غیرقانونی جنگ کی مذمت کرنے پروہ انہيں سراہتے ہیں۔ انہوں نے مزیدکہا کہ غزہ اور یوکرین کے معاملے پر مغرب کا معیار دوغلا ہے، مغرب کا یہ دوغلا معیار ایران پر امریکی و اسرائیلی حملے پر خاموشی سے ظاہر ہوتا ہے، قانون کے حکمرانی پر یقین رکھنے والوں کو بھی قانون کی پامالیوں پر آواز اٹھانی چاہیے۔

یواین آئی۔ ا م