خبر اردو :
پہاڑی ضلع شوپیان میں فوج اور جنگجوؤں کے درمیان شدید تصادم آرائی کے دوران 5جنگجو جاں بحق ہوئے جبکہ اس دوران فورسز اور مظاہرین کے درمیان شدید جھڑپیں ہوئی جس میں 1عام شہری بھی از جان ہوا۔ ادھر مظاہرین کو منتشر کرنے کے دوران 2درجن سے زائد عام شہری بھی زخمی ہوئے جنہیں علاج و معالجے کی خاطر ہسپتال منتقل کیا گیا۔ اس دوران انتظامیہ نے امن و قانون کی صورتحال کو برقرار رکھنے کے لیے اور افواہ بازی پر روک لگانے کی خاطر موبائل انٹرنیٹ سروس پر اگلے احکامات تک پابندی عائد کی۔

ضلع شوپیان کے کلورہ گاؤں میں جمعہ کی شام دیر گئے سیکورٹی فورسز اور جنگجوؤں کے درمیان اُس وقت تصادم آرائی ہوئی جب فورسز نے مصدقہ اطلاع کی بنیاد پر گاؤں کو چہاروں طرف سے گھیرے میں لے کر تلاشی کارروائی کا آغاز کیا۔ اطلاعات کے مطابق فوج نے گاؤں میں جنگجوؤں کو ڈھونڈ نکالنے کی خاطر کلورہ کا سخت محاصرہ عمل میں لایا جس دوران سیکورٹی فورسز کے اہلکاروں نے گاؤں کے تمام راستوں کو مکمل طور پر سیل کردیا۔ فورسز اہلکاروں نے گاؤں کو آنے اور جانے والے تمام راستوں پر سخت ناکے بٹھاتے ہوئے کسی کو بھی پر مارنے کی اجازت نہیں دی۔ اسی دوران جونہی فورسز اہلکاروں کا جنگجوؤں کی ایک جماعت کے ساتھ آمنا سامنا ہوا جس دوران جنگجوؤں نے فورسز پارٹی ہر گولیوں کی بوچھاڑ کرتے ہوئے علاقے سے فرار ہونے کی کوشش کی تاہم فورسز اہلکاروں کی جوابی کارروائی کے نتیجے میں جنگجوؤں علاقے سے فرار ہونے میں ناکام ہوئے۔ طرفین کے درمیان ابتدائی گولیوں کے تبادلے کے نتیجے میں ایک مقامی جنگجو جاں بحق ہوا جبکہ فرار ہوئے جنگجوؤں نے گاؤں میں واقع ایک ڈاکٹر کے مکان پناہ لی تاہم فورسز اہلکاروں کی جانب سے سخت محاصرے کے نتیجے میں جنگجوؤں کا گاؤں سے باہر جانا ممکن نہ ہوا۔

اس دوران فورسز اہلکاروں نے رات کے دوران جنگجو مخالف آپریشن کو معطل کردیا تاہم صبح کی پو پھٹتے ہی طرفین کے درمیان شدید گولیوں کا تبادلہ ہوا۔ اس دوران علاقہ آگ و آہن کے گولوں سے گونج اُٹھا جس دوران گاؤں کے ملحقہ علاقوں سے نوجوانوں کی مختلف ٹولیوں نے فورسز کارروائی میں رخنہ ڈالنے کی خاطر جائے موقعہ پر مامور فورسز اہلکاروں پر شدید سنگ باری کی۔ اس دوران فورسز نے مظاہرین کو منتشر کرنے کے لیے ہوائی فائرنگ، آنسو گیس کے گولے اور پیلٹ کا استعمال کیا جس کے نتیجے میں 2درجن سے زائد مظاہرین زخمی ہوئے جنہیں ضلع ہسپتال شوپیان میں علاج و معالجے کی خاطر داخل کرایا گیا۔

ذرائع نے بتایا کہ اس دوران 5زخمیوں کو نازک حالت میں سرینگر منتقل کیا گیا جہاں ان کا علاج جاری ہے۔ اس دوران سیکورٹی فورسز نے جونہی گاؤں میں تلاشی آپریشن کادوباہ آغاز کیا تو اس دوران جنگجوؤں کی مزید 4لاشیں برآمد کی گئیں جن کی شناخت اعجاز احمد پال ساکن لسہ دینو شوپیان، میر سبزار ساکن لاسی پورہ پلوامہ، وقار احمد شیخ ساکن ملک گنڈ شوپیان، اشرف احمد ساکن گنو پورہ بل پورہ شوپیان کے طور ہوئی۔ پولیس نے اس سلسلے میں بتایا کہ مارے گئے جنگجوؤں کا تعلق لشکر طیبہ سے معلوم ہوتا ہے جس کی تحویل سے بھاری مقدار میں اسلحہ برآمد کیا گیا۔ادھر واقعہ کے بعد پورے جنوبی کشمیر میں افراتفری کا ماحول پید اہوا اور انتظامیہ نے حالات کو مدنظر رکھتے ہوئے تمام اضلاع میں سیکورٹی کے کڑے انتظامات کئے۔

نمائندے کے مطابق جنوبی کشمیر کے شوپیان، پلوامہ، اسلام آباد اور کولگام اضلاع کے حساس مقامات پر سیکورٹی کے اضافی دستے تعینات کیے گئے جبکہ انتظامیہ نے امن و قانون کی صورتحال کو برقرار رکھنے کے لیے اور افواہ بازی پر روک لگانے کی خاطر موبائل انٹرنیٹ سروس پر اگلے احکامات تک پابندی عائد کی۔ ذرائع سے معلوم ہوا کہ شوپیان معرکے کی مابعد صورتحال کے پیش نظر انتظامیہ نے امن و قانون کی صورتحال کو برقرار رکھنے کے لیے موبائل انٹرنیٹ سروس کو اگلے احکامات تک پابندی عائد کی۔ انہوں نے بتایا کہ انتظامیہ کی جانب سے اس قسم کا اقدام احتیاطی طور پر اُٹھایا گیا۔اس دوران جنوبی کشمیر کے مختلف قصبہ جات میں جنگجوؤں اور عام شہریوں کی ہلاکت کی خبر پھیلنے کے ساتھ ہی حالات دگرگوں ہوئے جس کے نتیجے میں یہاں تجاری، عوامی، کاروباری، تعلیمی اور سرکاری و غیر سرکاری سرگرمیاں ٹھپ ہوکر رہ گئیں۔ نمائندے نے بتایا کہ اس مختلف مقامات سے لوگوں نے سڑکوں پر آکر عام شہریوں کی ہلاکت کے خلاف سخت احتجاجی مظاہرے کئے جنہیں فورسز نے طاقت کے بل پر ناکام بنایا۔ انہوں نے بتایا کہ اس دوران جنوبی کشمیر کی سڑکوں پر سکوت چھایا رہا جس دوران لوگوں کو آواجاہی میں شدید مشکلات کا سامنا کرنا پڑا۔ KNS