خبر اردو :
پولیس اہلکاروں پر جنگجوؤں کی طرف سے پے در پے حملوں کے پیش نظر محکمہ پولیس نے ایڈوائزری جاری کرتے ہوئے جنوبی کشمیرکے 4اضلاع سے تعلق رکھنے والے پولیس افسران اور اہلکاروں کو صرف 2گھنٹوں کے لیے گھر جانے کی اجازت دی ہے۔ ایڈوائزری میں واضح کیا گیا ہے کہ رخصتی کے دوران اہلکاروں کی سخت سیکورٹی کا بندوبست کیا جائے گا تاکہ جنگجوؤں کی طرف سے پولیس اہلکاروں پر کئے جارہے حملوں کو ناکام بنایا جائے۔

محکمہ کے ایک اعلیٰ افسر نے بتایا کہ نئی ایڈوائزری کے مطابق اہلکاروں کو صرف 2گھنٹوں کے لیے گھر چھوڑا جائے گا ۔ جنوبی کشمیر کے کولگام، اسلام آباد، پلوامہ اور شوپیان اضلاع میں پولیس اہلکاروں پر جنگجوؤں کی جانب سے لگاتار حملوں کے پیش نظر محکمہ پولیس نے ایڈوائزری جاری کرتے ہوئے اہلکاروں کو صرف 2گھنٹوں کے لیے گھر جانے کی اجازت دی ہے۔ ایڈوائزری کا بنیادی مقصد پولیس اہلکاروں کے جان و مال کو تحفظ فراہم کرنا ہے۔ایڈوائزری میں صاف طور پر بتایا گیا ہے کہ جب بھی کوئی اہلکار رخصتی کے لیے گھر جانا چاہے تو اس دوران انہیں سخت سیکورٹی فراہم کی جائے گی۔

ذرائع نے بتایا کہ محکمہ پولیس سے وابستہ اہلکاروں کے جان و مال کو تحفظ فراہم کرنے کی غرض سے محکمہ نے کافی غوروفکر کے بعد ایک مخصوص لائحہ عمل ترتیب دیا ہے تاکہ پولیس اہلکاروں کے تحفظ کو یقینی بنانے کے علاوہ جنگجوؤں کی طرف حملوں کو ناکام بنایا جائے۔ ایڈوائزری میں اہلکاروں کو ہدایت کی گئی ہے کہ جب بھی وہ اپنے آبائی گھروں میں بطور رخصت کے لیے جایا کریں تب انہیں سخت سیکورٹی فراہم کی جائے گی۔معلوم ہوا ہے کہ ایڈوائزری میں خصوصی طور پر جنوبی کشمیر کے کولگام، اسلام آباد، پلوامہ اور شوپیان سے وابستہ اہلکاروں کو ایڈرس کرتے ہوئے بتایا گیا ہے کہ ان کی رخصتی صرف 2گھنٹوں پر مبنی ہوگی اور اس دوران ان کی حفاظت کے لیے سیکورٹی کے کڑے بندوبست کئے جائیں گے ۔محکمہ پولیس نے مذکورہ ایڈوائزری بدھوار کے روز جنوبی کشمیر میں جنگجوؤں کی جانب سے 3اہلکاروں کو ہلاک کرنے کے بعد جاری کردی ہے۔

یاد رہے 22اگست بدھوار کو جنگجوؤں نے جنوبی کشمیر میں ایک پولیس انسپکٹر سمیت 3پولیس اہلکاروں کو موت کی ابدی نیند سلادیا۔ عیدالاضحی کی صبح کو ہی کولگام میں اُس وقت صف ماتم بچھ گئی جب فیاض احمد شاہ نامی پولیس اہلکار مسجد سے فجر کی نماز ادا کرکے گھر کی جانب چل رہا تھا۔ ذرائع نے بتایا کہ جونہی فیاض احمد مسجد سے باہر نکلا تو اسی دوران نامعلوم افراد نے اُس پر گولیوں کی بوچھاڑ کی جس کے نتیجے میں وہ موقعے پر ہی از جان ہوا۔ واقعے کے 9گھنٹے بعد ہی پلوامہ کے مضافات میں جنگجوؤں نے محمد یعقوب شاہ نامی پولیس اہلکار پر اپنے گھر کے باہر گولیوں کی بوچھاڑ کی جس کے نتیجے میں وہ موقعے پر ہی جاں بحق ہوا۔ اسی طرح ایک گھنٹے کے وقفے کے بعد ہی ڈسٹرکٹ پولیس لائنز پلوامہ سے وابستہ پولیس انسپکٹر محمد اشرف جو کہ پلوامہ سے تعلق رکھتا تھا پر جنگجوؤں نے گھرکے نزدیک ہی گولیاں مار کر ہلاک کردیا۔ ذرائع سے معلوم ہوا ہے کہ جن 3اہلکاروں نے عید الاضحی کے روز اپنی جانیں گنوائیں انہوں نے محکمہ کی جانب سے جاری ایڈوائزری کو مکمل طور پر فراموش کردیا تھا۔ ذرائع نے بتایا کہ سیکورٹی ایجنسیوں کے پاس مصدقہ اطلاعات تھی جن سے یہ ظاہر ہوتا تھا کہ جنگجو عید کے موقعے پر پولیس اہلکاروں کو رخصتی کے دوران نشانہ بناسکتے ہیں۔

اس دوران معلوم ہوا ہے کہ سال رواں کے دوران اب تک جنگجوؤں کے حملوں میں 28پولیس اہلکار اپنی جانوں سے ہاتھ دھو بیٹھے ہیں جبکہ اس دوران جنوبی کشمیر کے حساس مقامات سے تعلق رکھنے والے درجن بھر ایس پی اوز نے جنگجوؤں کی طرف سے بڑھتے دباؤ کے نتیجے میں اپنی عارضی نوکریوں سے استعفیٰ پیش کیا ہے۔KNS