خبر اردو :
شمالی کشمیر حاجن کے پرے محلہ بستی میں فوج، سی آر پی ایف اور ایس او جی کی مشترکہ پارٹی نے جمعرات کی صبح ایک مصدقہ اطلاع کی بنیاد پر محاصرہ عمل میں لایا اور یہاں گھر گھر تلاشیوں کا باضابطہ آغاز کیا۔ اطلاعات کے مطابق فوج، سی آر پی ایف اور ایس او جی سے وابستہ اہلکاروں نے مستند اطلاع کی بنیاد پر پرے محلہ نامی بستی کا علی الصبح محاصرہ کیا جس دوران سیکورٹی فورسز نے علاقے کو آنے اور جانے والی تمام سڑکوں کو سیل کرتے ہوئے فورسز کے اضافی دستے تعینات کئے۔ فورسز اہلکاروں نے اس موقعے پر جنگجووءں کے فرار ہونے کی تمام راستوں پر سخت پہرے بٹھاتے ہوئے موبائل بنکروز کی خدمات حاصل کرنے کے علاوہ یہاں مکانات میں بھی پوزیشن سنبھالی۔ نمائندے نے بتایا کہ اس موقعے پر جونہی سیکورٹی فورسز بستی کے اندر تلاشی کے بہانے داخل ہوئے تو جونہی اہلکاروں نے آگے پیش قدمی کی تو یہاں چھپے بیٹھے جنگجوؤں نے تلاشی پارٹی پر جدید ہتھیاروں سے فائرنگ کی۔

اس موقعے پر فورسز اہلکاروں نے بھی جائے واردات کے ارد گرد سخت محاصرہ کرتے ہوئے علاقے میں فورسز کی مزید کمک کو طلب کیا جس کے ساتھ ہی علاقہ گولیوں کی گن گرج سے لر ز اُ ٹھا۔ انہوں نے بتایا کہ اس موقعے پر کئی گھنٹوں تک علاقے میں وقفے وقفے سے گولہ باری جاری رہی جس دوران ابتدائی مرحلے میں فورسز نے ایک جنگجو کو ہلاک کیا تاہم دوسرے جنگجو کی لگاتار فائرنگ سے مہلوک جنگجو کی نعش کو حاصل نہ کیا جاسکا۔ انہوں نے بتایا کہ اس موقعے پر فورسز نے یہاں چھپے بیٹھے دوسرے جنگجو کے خلاف فیصلہ کن لڑائی کا آغاز کیا جس کے نتیجے میں یہاں موجود دونوں جنگجوؤں کو ڈھیر کیا گیا۔ ادھر پولیس نے جھڑپ سے متعلق تفصیلات فراہم کرتے ہوئے کہا کہ فوج، سی آر پی ایف اور ایس او جی نے پرے محلہ نامی بستی کو محاصرہ میں لیتے ہوئے جنگجوؤں کو ڈھونڈ نکالنے کی خاطر تلاشی کارروائی کا باضابطہ آغاز کیا ۔ انہوں نے بتایا کہ جونہی تلاشی پارٹی بستی کے اندر داخل ہوئی تو یہاں چھپے بیٹھے جنگجوؤں نے فورسز اہلکاروں پر خودکار ہتھیاروں سے شدید فائرنگ کی جس کافورسز اہلکاروں نے بھی بروقت جواب دیا اور اس کے ساتھ ہی طرفین کے درمیان لڑائی کا باضابطہ آغاز ہوا۔

انہوں نے بتایا کہ کئی گھنٹوں تک جاری رہنے والی جھڑپ کے اختتام پر لشکر طیبہ سے وابستہ 2غیر ملکی جنگجوؤں کو جاں بحق کیا گیا جن کی شناخت رضوان عرف جندال اور علی عرف معاذ کے بطور ہوئی۔ انہوں نے بتایا کہ جھڑپ کے اختتام پر فورسز اہلکاروں نے جنگجوؤں سے ہتھیاروں کی بھاری کھیپ بھی ضبط کی جن میں کئی رائفلیں، میگزین، پاوچ اور دیگر غیر قانونی مواد شامل ہیں۔ پولیس نے بتایا کہ مہلوک جنگجوؤں سے برآمد ہوئے غیر قانونی دستاویز اور مواد سے پتا چلا ہے کہ دونوں جنگجوؤں کا تعلق کالعدم تنظیم لشکر طیبہ سے ہیں۔ انہوں نے بتایا کہ دونوں جنگجوؤں وادی میں سیکورٹی فورسز اور عام شہریوں پر حملوں میں ملوث رہے ہیں۔ ادھر جھڑپ کے دوران ہی پرے محلہ اورملحقہ علاقوں سے نوجوانوں نے سڑکوں کا رخ کرتے ہوئے احتجاجی مظاہرے کئے ۔ مظاہرین نے اس موقعے پر اسلام ، آزادی اور جنگجوؤں کے حق میں زور دار نعرے بازی کرتے ہوئے یہاں تعینات فورسز اہلکاروں پر سنگ باری کی۔ نمائندے نے بتایا کہ اس موقعے پر مظاہرین نے جھڑپ کے مقام کی جانب پیش قدمی کرنے کی کوشش کی جسے سیکورٹی فورسز کے اہلکاروں نے ناکام بنایا۔ انہوں نے بتایا کہ احتجاجی مظاہرین کو منتشر کرنے کے لیے فورسز اہلکاروں سے آنسو کیس کے درجنوں گولے داغنے کے علاوہ مظاہرین کا دور دور تک تعاقب کیا۔

اس دوران انتظامیہ نے امن و قانون کی صورتحال کو برقرار رکھنے اور افواہ بازی پر روک لگانے کے لیے ضلع بھر میں موبائل انٹرنیٹ سروس کو احتیاطی طور پر معطل کردیا۔ انتظامیہ کے ایک افسر نے بتایا ضلع بھر میں کسی بھی امکانی گڑ بڑ سے نمٹنے کے لیے موبائل انٹرنیٹ خدمات کو اگلے احکامات تک معطل رکھنے کا فیصلہ کیا گیا ہے۔ ادھر ذرائع سے معلوم ہوا ہے کہ جھڑپ میں مارے گئے 2غیر ملکی جنگجوؤں کو مقامی اوقاف کو حوالے کرنے کے بجائے اوڑی بارہمولہ میں سپرد لحد کیا جائے گا۔KNS