خبراردو:
صوبہ جموں کے کشتوار علاقے میں جمعہ کو اُس وقت کہرام مچ گیا جب کیشان سے کشتوار جارہی ایک مسافر بردار گاڑی زیر نمبر JK17-0663سڑک سے لڑھک کر 250فٹ نیچے جاکر دریائے چناب میں جاگری۔ معلوم ہوا ہے کہ کشتوار کے ٹھٹ گام ٹھاکری کے مقام پر ایک مسافر بردار گاڑی زیر نمبر JK17-0663ڈرائیور کے قابو سے باہر ہوکر سڑک سے لڑھک گئی جس کے نتیجے میں گاڑی250فٹ گہری کھائی میں گر کر دریائے چناب کی نذر ہوئی۔ انہوں نے بتایا کہ اس موقعے پر گاڑی میں سوار سبھی مسافروں نے چیخ و پکار اُٹھائی جس کے نتیجے میں یہاں دل کو چیر دینے والی صدائیں بلند ہوئیں۔ معلوم ہوا ہے کہ اس دوران گاڑی دریائے چناب کی گہرائی میں دفن ہوکر رہ گئی جس کے نتیجے میں گاڑی میں سوار تمام مسافر گاڑی میں ہی پھنس کر رہ گئے۔

اس دوران پولیس، ڈیزاسٹر منیجمنٹ اور مقامی لوگوں نے فوراً حرکت میں آکر بچاؤ کارروائی کا آغاز کیا۔ انہوں نے بتایا کہ گاڑی میں پھنسے مسافروں کو باہر نکالنے اور راحت کاری کا کام انجام دینے کے لیے یہاں موجود تمام لوگوں نے ہنگامی بنیادوں پر کارروائی کا آغاز کیا۔ انہوں نے بتایا کہ اس دوران گاڑی میں سوار مسافروں میں سے 11مسافر موقعے پر ہی از جان ہوئے جبکہ 6دیگرزخمی ضلعی ہسپتال کشتوار میں زخموں کی تاب نہ لاکر دم توڑ بیٹھے جن میں اختر حسین ولد محمد رمضان بٹ ساکن کیشان، محمد یوسف ولد محمد مقبول راتھر ساکن سرگواری کیشان، مجیدہ بیگم زوجہ غلام حسن ساکن سرگواری کیشان، گردھاری لعل ولد ریجا رام ساکن منڈنہ انجولی، نذیر احمد ولد عبدالعزیز راتھر ساکن سرگواری کیشان، غلام محی الدین ولد غلام رسول راتھر ساکن ناگرن کیشان، طارق حسین ولد حسین احمد کھانڈے ساکن سرگواری کیشان، نذیر احمد ولد علی شاہ ساکن سرگواری (مالک گاڑی)، 22سالہ عمر احمد ولد عبدالمجید ساکن سرگواری، 28سالہ عبدالجبار ولد بہار احمد ساکن سراوا، 18سالہ نذیر احمد ولد حبیب اللہ ساکن گھٹ ڈوڈہ، 36سالہ قاسم احمد ولد تاج الدین ساکن سرگواری کیشان، 25سالہ محمد اشرف ولد عبدالرشید ساکن دربدان ٹھاکری، شاہینہ بیگم زوجہ غلام نبی ساکن سرواہ کیشان، 32سالہ مسرہ بیگم زوجہ نذیر احمد راتھر ساکن سرگواری کیشان اور 19سالہ وکرم کمار ولد اشوک کمار ساکن ٹھاکری شامل ہیں۔

اس موقعے پر جن افراد کو علاج و معالجے کی خاطر ضلعی ہسپتال کشتوار میں داخل کرایا گیا اُن میں اظہر حسین ولد محمد دین ساکن گگار کہرا، عائشہ دختر غلام نبی ساکن سرون، مدثر احمد ولد محمد ایوب بٹ ساکن بنون بونجوا، 35سالہ محمد اسماعیل ولد منگو گوجر ساکن کرنا سرگوار، 20سالہ عرفان حسین ولد محمد شفیع ساکن نگرانہ شامل ہیں۔ اس دوران صوبائی کمشنر جموں سنجیو ورما نے حادثے سے متعلق تفصیلات فراہم کرتے ہوئے بتایا کہ حادثے میں ابتدائی طور پر 11مسافر جاں بحق ہوئے تھے تاہم زخمیوں میں سے 15افراد نازک حالت میں مختلف ہسپتالوں میں زیر علاج ہے۔

ذرائع سے معلوم ہوا ہے کہ بس میں سوار 30مسافر تھے جن میں سے 11مسافروں کو نازک حالت میں فضائی سروس کے ذریعے جموں منتقل کیا گیا۔ انہوں نے بتایا کہ حادثے کے دوران مختلف افراد نازک حالت میں تھے جن میں سے 11افراد کو ہیلی کاپٹر کے ذریعے جموں کے میڈیکل کالج میں داخل کرایا گیا۔ اس دوران صوبائی انتظامیہ کی ہدایت پر ڈپٹی کمشنر کشتوار انگریز سنگھ رانا، ایس ایس پی کشتوار سمیت انتظامیہ کے اعلیٰ افسران جائے موقعے پر بچاؤ کارروائی کی نگرانی انجام دینے پر مامور کیے گئے۔ اطلاعات کے مطابق حادثے میں جاں بحق افراد کو بازیاب کرانے اور زخمیوں کو ہسپتال منتقل کرانے کے لیے پولیس، ڈیزاسٹر منیجمنٹ سمیت مقامی لوگوں کی بڑی تعداد نے بچاؤ کارروائی شروع کرتے ہوئے گاڑی میں پھنسے کئی لوگوں کو باہر نکال کر انہیں ہسپتال منتقل کیا۔

اس دوران ڈپٹی کمشنر کشتوار انگریز سنگھ رانا نے بتایا کہ حادثے میں کل ملاکر 17افراد جاں بحق ہوئے ہیں جبکہ 16دیگر شدید زخمی ہوئے ہیں جنہیں ضلع کشتوار سمیت جموں کے مختلف ہسپتالوں میں داخل کرایا گیا ہے۔ انہوں نے بتایا کہ انتظامیہ نے 11زخمیوں کو علاج ع معالجے کی خاطر جموں ائر لفٹ کیا گیا جہاں زخمیوں میں سے مزید ایک شخص زخموں کی تاب نہ لاکر دم توڑ بیٹھا جس کے ساتھ ہی حادثے میں ہلاکتوں کی کل تعداد 17تک پہنچ گئی۔ انہوں نے مزید بتایا کہ ریاستی سرکار نے حادثے میں جاں بحق افراد کے حق میں 5لاکھ روپے فی کس جبکہ زخمیوں کے لیے 50ہزار روپے فی کس واگذار کیے ہیں۔ KNS