واشنگٹن، امریکی صدر ڈونلڈ ٹرمپ نے ایران جنگ ختم کرنے کا مطالبہ کرنے پر کانگریس کی قرارداد کو تنقید کا نشانہ بنایا ہے۔

امریکی صدر ٹرمپ نے کانگریس کی قرارداد کو تنقید کا نشانہ بناتے ہوئےکہا کہ قرارداد بے وقت اور بے معنی ہے، میں نے ایران کو گھٹنوں پر لا کھڑا کیا ہے، وہ گرنے ہی والا ہے۔

انہوں نے کہا کہ سینیٹرز نے میرا کام مشکل بنادیا مگر میں یہ کام کسی نہ کسی طرح مکمل کرلوں گا،میں ہمیشہ کام مکمل کرتا ہوں۔

واضح رہے کہ امریکی سینیٹ نے 48 کے مقابلے میں50 ووٹوں سے ایران کےخلاف فوجی کارروائی روکنے سے متعلق مشترکہ قرارداد کےحق میں فیصلہ دےدیا۔ یہ قرارداد رواں ماہ کے آغاز میں ایوان نمائندگان سے بھی منظور ہوچکی ہے۔

یو این آئی۔ ع ا۔

تہران، ایران نے عالمی ایٹمی توانائی ایجنسی ( آئی اے ای اے) کو حملوں سے متاثرہ جوہری پلانٹس کا معائنہ کرانے سے انکار کر دیا۔

ترجمان ایرانی وزارت خارجہ اسماعیل بقائی نے اپنے بیان میں کہا ہے کہ ایران آئی اے ای اے کو امریکی و اسرائیلی حملوں سے متاثرہ فردو ، نطنز اور اصفہان کی ایٹمی تنصیبات کے معائنے کی اجازت نہیں دے گا ۔

ترجمان ایرانی وزارت خارجہ نے سوئٹزرلینڈ میں ڈی جی آئی اے ای اے سے ملاقات کی بھی تردید کی۔ اس کے علاوہ منجمد اثاثوں کے باے میں اسماعیل بقائی نے کہا کہ منجمد فنڈز کے استعمال سے متعلق ایران کو کسی قسم کی پابندی کا سامنا نہیں۔

دوسری جانب امریکی صدر ڈونلڈ ٹرمپ نے دعویٰ کیاکہ ایران اپنی ایٹمی تنصیبات کے مکمل معائنے پر رضامند ہے، اگر ایران راضی نہ ہوتا تو مزید بات چیت ہی نہ ہوتی۔ امریکی صدر نے اپنے بیان میں کہا کہ دوبارہ ناکا بندی کی ضرورت پڑی تو امریکی بحری جہاز اپنی جگہ موجود ہیں، ایسا نہیں لگتا کہ دوبارہ ناکا بندی کی ضرورت پڑے گی، بحال ایرانی اثاثے امریکاکے زیرکنٹرول بینک اکاؤنٹس میں رکھےجائیں گئے۔

یو این آئی۔ ع ا۔

تل ابیب، پاکستان کی ثالثی میں امریکہ اور ایران کے درمیان جاری مذاکرات سے ناخوش اسرائیلی وزیر اعظم نتین یاہو کا امریکی فوجی امداد پر انحصار کے حوالے سے اہم بیان سامنے آگیا۔

اسرائیلی وزیر اعظم نیتن یاہو کے دفتر سے جاری بیان کے مطابق انہوں نے ایک بار پھر اپنے ملک پر زور دیا ہے کہ وہ اپنی فوجی خودمختاری میں اضافہ کرے اور امریکہ کی فوجی امداد پر انحصار کم کرے۔

خبر رساں ایجنسی اے ایف پی کی رپورٹ کے مطابق نیتن یاہو نے مقبوضہ مغربی کنارے میں ایک تربیتی کورس کے دوران ریزرو افسران سے گفتگو کرتے ہوئے کہا کہ میں اپنے امریکی دوستوں سے ملنے والی فوجی امداد کی دل سے تعریف کرتا ہوں، لیکن ہمیں اس انحصار سے آزاد ہونے اور اپنا آزادانہ اسلحہ سازی کا نیٹ ورک بنانے کی ضرورت ہے۔

واضح رہے کہ نیتن یاہو کا مذکورہ بیان 18 جون کو اُس وقت سامنے آیا جب امریکہ اور ایران کے درمیان مشرق وسطیٰ کی جنگ ختم کرنے کے ابتدائی معاہدے ہوا، اسرائیل میں اس معاہدے کے خلاف شدید مخالفت کی گئی۔ اسرائیلی وزیر اعظم نے مزید کہا کہ آج میں کہتا ہوں کہ ہمیں اپنے آزاد اسلحہ سازی کے نیٹ ورک کی ضرورت ہے، ہمیں اپنے ہتھیار خود تیار کرنے چاہییں۔ کونسل آن فارن ریلیشنز کے اعداد و شمار کے مطابق 1948 سے اسرائیل نے 300 بلین ڈالر سے زیادہ کی امریکی اقتصادی اور فوجی امداد حاصل کی ہے جو کہ 1946 کے بعد سے کسی بھی دوسرے ملک کو ملنے والی امداد سے کہیں زیادہ ہے۔

2016 میں دستخط کیے گئے اور 2019 سے نافذ العمل ایک معاہدے کے تحت اسرائیل کو سالانہ تقریباً 3.8 بلین ڈالر کے ہتھیاروں کی خریداری کیلیے مالی امداد ملتی ہے جو کہ اس کے دفاعی بجٹ کا تقریباً 15 فیصد ہے۔ یہ معاہدہ 2028 تک لاگو رہے گا۔ نیتن یاہو اس سے قبل بھی کہہ چکے ہیں کہ وہ امریکی فوجی امداد پر اسرائیل کا انحصار ختم کرنا چاہتے ہیں۔

واضح رہے کہ امریکا اسرائیل کا سب سے قریبی اتحادی ہے، لیکن 7 اکتوبر 2023 کو حماس کے حملے کے بعد سے اسرائیل کی جنگی حکمت عملی پر دونوں ممالک کے درمیان اختلافات رہے ہیں۔

یو این آئی۔ ع ا۔