خبراردو:
سابق مذاکرات کار رادھا کمار نے وادی میں جاری خونین صورتحال پر ردعمل ظاہر کرتے ہوئے کہا کہ حالات سے نپٹنے کے لیے مذاکرات ہی واحدراستہ ہے اور آہنی ہاتھوں سے مسائل مزید پیچیدہ ہوں گے۔ انہوں نے بی جے پی پر الزام عائد کیا کہ وہ مسائل کو افہام و تفہیم سے حل کرنے کے خواہش مند نہیں ہے۔ انہوں نے واضح کیا کہ موجودہ صورتحال کے ساتھ آہنی ہاتھوں سے نپٹنے کے نتیجے میں حالات مزید ابتر ہوں گے۔ انہوں نے بتایا کہ افرا تفری کے ماحول کو ختم کرانے کے لیے جو مہم فی الوقت وادی میں عملائی جارہی ہے وہ امن کوبحال کرنے میں کامیاب نہیں ہوگی۔انہوں نے مسائل کو بات چیت کے ذریعے حل کرنے پر زور دیتے ہوئے کہا کہ تصفیہ طلب معاملات افہام و تفیم کے ذریعے مل بیٹھ کر حل کئے جاتے ہیں اور آہنی ہاتھوں سے نپٹنے کے نتیجے میں حالات مزید پیچیدہ ہوں گے۔ انہوں نے افسوس کا اظہار کرتے ہوئے کہا کہ بی جے پی صرف طاقت کی زبان سے ہی ریاست میں حالات کو پٹری پر لانے کے لیے عمل پیرا ہے۔

سابق مذاکرات کار نے بی جے پی پر الزام عائد کرتے ہوئے کہا کہ وہ مسائل کو افہام و تفہیم کے ساتھ حل کرنا نہیں چاہتی اور اسی لیے وہ طاقت اور تشدد کے ذریعے سے حالات کو ڈیل کررہی ہے جس کے نتیجے میں ریاستی عوام سمیت بھارت بھر میں اقلیتی طبقے کے اندر اجنبیت کا ماحول پروان چڑھ رہا ہے۔انہوں نے سوالیہ انداز میں بتایا کہ 4سال کا عرصہ گزرجانے کے باوجود بھی مذاکرات کا کہیں نا م ونشان نہیں ہے۔ انہوں نے بتایا کہ مرکزی سرکار نے 4سال قبل ریاست میں حالات کو پٹری پر لانے کے لیے تمام طبقوں سے بات چیت کے لیے مذاکرات کار نامزد کیا تاہم 4سال کا عرصہ گزرنے کے باوجود زمینی سطح پر مذاکرات کا کہی نام و نشان موجود نہیں ہے۔

رادھا کمار نے بتایا کہ ہمیں اُمید تھی کہ مذاکرات کی نامزدگی کے بعد اُن لوگوں کے ساتھ بھی بات چیت کی جائے گی جو ابھی تک بات چیت میں شامل نہیں ہوئے تھے تاہم ہمارمی تمام اُمیدوں پر پانی پھیرا گیاکیوں کہ زمینی سطح پر صرف جنگجو مخالف آپریشن دکھائے دے رہے ہیں جبکہ مذاکرات کا کہیں نام و نشان بھی موجود نہیں ہے۔سابق مذاکرات کار نے بتایا کہ میرے دو مذاکرات کار ساتھیوں نے وزارت داخلہ کو سابق یو پی اے حکومت میں پیش کی گئی سفارشات کو عملانے کے حوالے سے رابطہ کیا جس دوران میرے مرحوم ساتھی دلیپ پڈگاؤنکر کو وزارت داخلہ کی طرف سے یہ یقین دہانی بھی کرائی گئی کہ مرکزی سرکار ان سفارشات پر سنجیدگی کے ساتھ سوچ وبچار کرکے آپ کو مزید تبادلہ خیال کے لیے طلب کرے گی۔انہوں نے بتایا کہ بدقسمتی سے مرکزی سرکار نے نہ ہی رپورٹ پر سنجیدگی کا مظاہرہ کیا اور نہ ہی ہمیں تبادلہ خیال کے لیے بلایا گیا کیوں کہ سابق وزیر اعظم ڈاکٹر منموہن سنگھ کے دور اقتدار میں جب ہم لوگوں نے اپنی رپورٹ پیش کی تو بھگوا گروپوں سے تعلق رکھنے والے لوگوں نے دن کے اُجالے میں ہماری رپورٹ کے ٹکڑے ٹکڑے کردئے۔انہوں نے افسوس کا اظہار کرتے ہوئے کہا کہ مرکز میں قائم بی جے پی حکومت نے حریت کانفرنس اور پاکستان کے ساتھ مذاکرات اور بات چیت کے تمام دروازے بند کردئے ہیں اور فی الوقت وادی میں جنگجومخالف آپریشنوں کو جاری رکھتے ہوئے مسکولر اپروچ پر عمل جاری ہے جس کے نتیجے میں امن کی بحالی ایک خواب کی حیثیت رکھتا ہے۔انہوں نے بتایا کہ مذاکرات کی عدم موجودگی کے نتیجے میں فوج بھی انسانی حقوق کا احترام کرنے سے قاصر ہے۔