نئی دہلی، کانگریس پارلیمانی پارٹی کی لیڈر سونیا گاندھی، پارٹی کے قومی صدر ملک ارجن کھڑگے اور سابق صدر راہل گاندھی نے پیر کے روز ملک کے اولین وزیر اعظم پنڈت جواہر لال نہرو کی 60 ویں برسی پر انہیں خراج عقیدت پیش کیا۔
محترمہ سونیا گاندھی اور مسٹر کھڑگے نے آج صبح پنڈت نہرو کی سمادھی ‘شانتی ون’ کا دورہ کیا اور انہیں خراج عقیدت پیش کیا۔ انہوں نے کہا کہ “میں پنڈت نہرو کو خراج عقیدت پیش کرتا ہوں جنہوں نے اپنی موثر قیادت اور مضبوط فیصلوں سے جدید ہندوستان کی بنیاد رکھی”۔
مسٹر کھڑگے نے کہا، “جدید ہندوستان کے معمار پنڈت جواہر لال نہرو نے اپنے بے مثال کردار سے ہندوستان کو سائنسی، اقتصادی، صنعتی اور مختلف شعبوں میں آگے بڑھایا۔ جمہوریت کے لیے وقف محافظ، آزاد ہندوستان کے پہلے وزیر اعظم اور ہمارے لیے باعث تحریک کے بغیر ہندوستان کی تاریخ نامکمل ہے۔ ‘ہند کے جواہر’ کو ان کی برسی پر ہمارا عاجزانہ خراج عقیدت”۔
ملک کی جدیدیت، ترقی اور اتحاد کے لیے پنڈت نہرو کا تذکرہ کرتے ہوئے انھوں نے کہا، “پنڈت جواہر لال نہرو جی نے کہا تھا، ملک کی حفاظت، ملک کی ترقی، ملک کا اتحاد ہم سب کا قومی مذہب ہے۔ ہم مختلف مذاہب کی پیروکار ہو سکتے ہیں، مختلف ریاستوں کے باشندے ہوسکتے ہیں، مختلف زبانیں بولنے والے ہوسکتے ہیں، لیکن اس سے ہمارے درمیان کوئی دیوار نہیں بننی چاہیے۔ تمام لوگوں کو ترقی کے یکساں مواقع ملنے چاہئیں۔ ہم نہیں چاہتے کہ ہمارے ملک میں کچھ لوگ بہت امیر ہوں اور زیادہ تر لوگ غریب ہوجائیں”۔ انہوں نے کہا کہ آج بھی کانگریس پارٹی ‘انصاف’ کے اسی راستے پر چل رہی ہے۔
مسٹر راہل گاندھی نے کہا، “جدید ہندوستان کے معمار اور ملک کے پہلے وزیر اعظم پنڈت جواہر لال نہرو کو ان کی برسی پر خراج عقیدت۔ انہوں نے اپنی پوری زندگی تحریک آزادی، جمہوریت کے قیام، سیکولرازم اور آئین کی بنیاد رکھ کر ہندوستان کی تعمیر کے لیے وقف کر دی۔ ان کی اقدار سے ہمیشہ ہمیں رہنمائی ملتی رہے گی”۔
یو این آئی۔ م ش۔
