نئی دہلی، وزیر اعظم نریندرمودی نے جمعرات کو سابق وزیر اعظم راجیو گاندھی کی برسی کے موقع پر انہیں خراج عقیدت پیش کیا وزیر اعظم نے آج ایکس پر اپنی پوسٹ میں کہا، ’’سابق وزیر اعظم شری راجیو گاندھی جی کو ان کی برسی پر خراج عقیدت  مسٹر راجیو گاندھی 1984 سے 1989 تک ملک کے وزیر اعظم رہے 21 مئی 1991 کو تمل ناڈو کے سری پیرمبدور میں ایک انتخابی مہم کے دوران لبریشن ٹائیگرز آف تمل ایلم (لٹے) کے ایک خودکش حملے میں ان کی موت ہوگئی تھی۔

اس موقع پر مختلف سیاسی جماعتوں کے رہنماؤں نے بھی راجیو گاندھی کو یاد کیا اور ملک کی ترقی اور جمہوری اداروں میں ان کی خدمات کو خراج عقیدت پیش کیا۔

یواین آئی۔الف الف

نئی دہلی، کانگریس نے کہا ہے کہ کمزور سرمایہ کاری کے ماحول اور بگڑتی ہوئی اقتصادی صورتحال کے پیش نظر ملک کی معیشت میں اصلاحات ضروری ہیں اور اس کے لیے اقتصادی پالیسی میں فوری طور پر بڑے پیمانے پر تبدیلیاں کرنے کی شدید ضرورت ہے کانگریس کے شعبہ مواصلات کے انچارج جے رام رمیش نے جمعرات کے روز ایک بیان میں کہا کہ بھارتی معیشت کے تعلق سے ماحول اس قدر خراب ہو چکا ہے کہ اب حکومت کے حامی بھی عوامی سطح پر تشویش کا اظہار کرنے لگے ہیں۔ انہوں نے دعویٰ کیا کہ افراط زر (مہنگائی) کے تخمینے تیزی سے بڑھ رہے ہیں، جبکہ اقتصادی ترقی کی شرح کے تخمینے گھٹ رہے ہیں۔ براہ راست غیر ملکی سرمایہ کاری (ایف ڈی آئی) میں گراوٹ جاری ہے اور سپلائی چین کی بدانتظامی کی صورتحال ایسی ہو گئی ہے کہ خود وزیر اعظم کو صارفین سے کھپت کم کرنے کی اپیل کرنی پڑ رہی ہے۔

انہوں نے کہا کہ کانگریس طویل عرصے سے ان مسائل کو اٹھاتی رہی ہے اور ان میں سب سے اہم مسئلہ کمزور سرمایہ کاری کا ماحول ہے۔ ان کا کہنا تھا کہ نجی سرمایہ کاری میں نمایاں اضافے کے بغیر اقتصادی ترقی کو تیز اور پائیدار نہیں بنایا جا سکتا، لیکن حقیقی اجرتوں میں جمود، صارفین کی مانگ میں کمی، پالیسیوں میں عدم استحکام، ٹیکس نوٹسز، چھاپوں اور تحقیقاتی ایجنسیوں کے دباؤ کی وجہ سے سرمایہ کاری کا ماحول بری طرح متاثر ہوا ہے۔

مسٹر رمیش نے الزام لگایا کہ چین سے سستے سامان کی ‘ڈمپنگ’ نے مینوفیکچرنگ سیکٹر کو نقصان پہنچایا ہے، اور حکومت کی سرپرستی میں قائم کاروباری اجارہ داری اور ‘چندہ لو، دھندا دو’ (چندہ لو، کاروبار دو) کے کلچر نے آزاد سرمایہ کاری کے جذبے کو کمزور کیا ہے۔ انہوں نے کہا کہ کارپوریٹ ٹیکس کی شرحیں ریکارڈ نچلی سطح پر ہیں اور کمپنیوں کی کمائی بڑھ رہی ہے، لیکن سرمایہ کاری میں تیزی نظر نہیں آ رہی، جبکہ کئی بڑے سرمایہ کار بیرون ملک سرمایہ کاری کر رہے ہیں۔

کانگریس لیڈر نے کہا کہ حکومت کو خود کی ستائش چھوڑ کر اقتصادی پالیسی میں وسیع تبدیلیاں کرنی چاہئیں۔ انہوں نے طنز کرتے ہوئے کہا کہ وزیر اعظم نریندر مودی انتخابی انتظام میں مصروف ہیں، لیکن معیشت کے حوالے سے انہیں نئے علم کی ضرورت ہے۔

یواین آئی ۔ایف اے

نئی دہلی، وزیر دفاع راج ناتھ سنگھ اور جنوبی کوریا کے سابق فوجیوں کے امور کے وزیر کوون اوہ-یول نے جمعرات کو سیول میں واقع امجنگاک پارک میں ہندوستانی جنگی یادگار کا مشترکہ طور پر افتتاح کیا مسٹر سنگھ جنوبی کوریا کے دوروزہ دورے پر ہیں وزارتِ دفاع نے بتایا کہ کوریائی جنگ کی 75ویں برسی کے موقع پر منعقدہ یادگاری پروگراموں کے تحت تعمیر کی گئی یہ یادگار ہندوستانی فوج کی 60 پیرا فیلڈ ایمبولینس اور کسٹوڈین فورس آف انڈیا کے ذریعے جنگ کے دوران دکھائی گئی شجاعت، قربانی اور انسانی خدمات کے لیے وقف ہے۔ دونوں وزراء نے یادگار پر گلہائے عقیدت پیش کیے اور ان بہادر ہندوستانی فوجیوں کو خراجِ عقیدت پیش کیا، جن کی خدمات کو کوریا کے عوام آج بھی انتہائی احترام اور ممنونیت کے ساتھ یاد کرتے ہیں۔ وزیر دفاع نے کوریائی جزیرہ نما میں امن اور انسانی امداد کے لیے ہندوستان کے تعاون کی دیرینہ وراثت کا ذکر کیا۔ انہوں نے کہا کہ دونوں ممالک کی مشترکہ تاریخ اور قربانیاں ہندوستان-جمہوریہ کوریا کی خصوصی اسٹریٹجک شراکت داری کی مضبوط بنیاد ہیں۔

مسٹر سنگھ نے کہا کہ ہندوستانی فوجیوں کے کردار کی یاد لوگوں کے درمیان باہمی مفاہمت کو مضبوط کرتی ہے اور دونوں ممالک کے تاریخی تعلقات کی طرف نئے سرے سے توجہ مبذول کراتی ہے۔ ہندوستان کی جانب سے انہوں نے کوریائی حکومت، خاص طور پر سابق فوجی امور کی وزارت کے ذریعے یادگار کے قیام میں دیے گئے تعاون اور سرپرستی کی تعریف کی۔ کوریا کے سابق فوجی امور کے وزیر نے کوریائی جنگ کے دوران ہندوستان کے کردار کی ستائش کی۔ انہوں نے ہندوستانی فوجیوں کی قربانی اور انسانی خدمات سے قائم ہونے والے پائیدار دوستانہ تعلقات کا اعتراف کیا۔ دونوں وزراء کے ذریعے ایک مفاہمت نامہ پر دستخط کیے گئے، جس کا مقصد کوریائی جنگ کے سابق فوجیوں کا احترام کرنا اور ان کے درمیان تبادلوں کو مضبوط بنانا ہے۔ فوجیوں کی بے لوث قربانی کی یاد میں ایک یادگاری جریدہ بھی جاری کیا گیا۔

لیفٹیننٹ کرنل (ڈاکٹر) اے جی رنگراج، (مہاویر چکر) کی قیادت میں کام کرنے والی 60 پیرا فیلڈ ایمبولینس نے انتہائی مشکل اور گولہ باری کے حالات میں ہزاروں زخمی فوجیوں اور شہریوں کا علاج کر کے اپنی شاندار طبی خدمات اور لگن کے لیے وسیع پہچان حاصل کی۔ ان کی بے مثال بہادری اور انسانی نقطہ نظر کی وجہ سے کوریا کے زخمی فوجیوں اور شہریوں نے انہیں ‘مرون اینجلس’ کا خطاب دیا تھا۔

جاری ۔ یواین آئی۔ایف اے