شنگھائی، ایشین گیمز کی چیمپئن جیوتی سریکھا وینم کی قیادت میں ہندوستانی تیر اندازوں نے ہفتہ کو یہاں تیر اندازی ورلڈ کپ 2024 کے کمپاؤنڈ مقابلوں میں پانچ میں سے چار طلائی تمغے جیت لئے۔
دوسری سیڈ جیوتی سریکھا وینم نے فائنل میں جگہ بنائی اور خواتین کے کمپاؤنڈ تیر اندازی میں 2023 ورلڈ چیمپئن شپ کی چاندی کا تمغہ جیتنے والی اور میکسیکو کی ٹاپ سیڈ اینڈریا بیسیرا کو شوٹ آف میں شکست دے کر انفرادی طلائی تمغہ جیتا۔ پانچ سیٹوں کے اختتام پر اسکور 146 پر برابر رہا۔
اس طلائی تمغے کے ساتھ جیوتی سریکھا وینم نے اکتوبر میں میکسیکو کے تلاکسکالا میں منعقد ہونے والے تیر اندازی ورلڈ کپ فائنل کے لیے بھی کوالیفائی کرلیا۔
اس دوران دفاعی عالمی چمپئن ادیتی گوپی چند سوامی کوارٹر فائنل میں اینڈریا بیسیرا کے ہاتھوں 144-142 سے ہار گئیں۔ اونیت کور کوارٹر کو فائنل میں جیوتی کے خلاف 143-142 سے شکست کا سامنا کرنا پڑا، جب کہ پرنیت کور تیسرے راؤنڈ میں باہر ہوگئیں۔
مردوں کے انفرادی کمپاؤنڈ میں پریانش کو 2021 کے عالمی چیمپئن آسٹریا کے نیکو وینر سے ہارنے کے بعد چاندی کے تمغے پر اکتفا کرنا پڑا، جنہوں نے 150 کا پرفیکٹ اسکور بنایا، جبکہ پریانش 147 کا اسکور بنانے میں کامیاب رہے۔
پرتھمیش پھوگے کوارٹر فائنل میں ہار گئے جبکہ ہندوستانی تجربہ کار ابھیشیک ورما اور رجت چوہان دوسرے راؤنڈ میں شکست کھاکر باہر ہو گئے۔ اس سے پہلے دن میں ہندوستان نے تینوں کمپاؤنڈ ٹیم مقابلوں میں طلائی تمغے جیتے ۔ جیوتی سریکھا وینم، ادیتی گوپی چند سوامی اور پرنیت کور نے ٹاپ سیڈ رہنے کے بعد اٹلی پر 236-225 سے جیت کے ساتھ طلائی تمغہ جیتا۔
فورتھ سیڈ ابھیشیک ورما، پریانش اور پرتھمیش پھوگے نے مردوں کے کمپاؤنڈ ٹیم ایونٹ میں ہالینڈ کو 238-231 سے شکست دے کر ٹاپ پوزیشن حاصل کی۔ مکسڈ ٹیم فائنل میں ابھیشیک ورما اور جیوتی سریکھا وینم نے بھی ایسٹونیا کو 158-157 سے شکست دیکر طلائی تمغہ جیتا۔
وینم، سوامی اور کور کو خواتین کی ٹیم کے فائنل میں اٹلی کا سامنا کرنے کے لیے ٹاپ سیڈ دیا گیا تھا۔ تینوں تیر انداز پہلے تین سروں میں صرف دو بار پرفیکٹ 10 اسکور سے محروم رہیں اور 178-171 سے آگے ہوگئیں۔ ہندوستانی خواتین کی ٹیم پھر چوتھے اینڈ میں صرف دو پوائنٹس سے محروم ہوگئی، لیکن اس سے زیادہ فرق نہیں پڑا کیونکہ ٹاپ سیڈ تیر اندازوں نے 11 پوائنٹس کے فرق سے طلائی تمغہ جیت لیا۔
مردوں کی ٹیم نے چوتھی سیڈ کے طور پر کوالیفائی کیا تھا اور اس نے پہلے اینڈ میں 60 کے اسکور کے ساتھ شاندار آغاز کیا تھا۔ اگلے دو سروں پر دو پوائنٹس کھونے کے باوجود، ہندوستانی مردوں کی ٹیم نے 60 پوائنٹس کے ایک اور پرفیکٹ اسکور کے ساتھ چوتھا اینڈ مکمل کیا اور سات پوائنٹس کے فرق سے گولڈ میڈل جیت لیا۔
وینم اور ورما نے اس کے بعد ایسٹونیا کے خلاف مکسڈ ٹیم فائنل میں شاندار کارکردگی کا مظاہرہ کیا، جہاں انہیں طلائی تمغے کے حصول میں صرف دو پوائنٹس سے محروم ہونا پڑا۔ ان دونوں نے چاروں اینڈز میں مسلسل برتری برقرار رکھی اور پہلے اور تیسرے اینڈ پر بہترین اسکور حاصل کیا۔
اتوار کو تین بار کی اولمپین دیپیکا کماری خواتین کے انفرادی ریکرو سیمی فائنل میں مقابلہ کریں گی۔ تروندیپ رائے، پروین جادھو اور دھیرج بومادیورا کی ہندوستانی مردوں کی ریکرو ٹیم سونے کے تمغے کے لیے ریپبلک آف کوریا سے مقابلہ کرے گی۔
یو این آئی۔ م ع۔ 1658
