ٹوکیو، اقوامِ متحدہ کے سکریٹری جنرل انتونیو گوتریس نے گہرے ہوتے عالمی معاشی بحران پر تشویش ظاہر کرتے ہوئے بدھ کے روز آبنائے ہرمز اور اس کے اطراف سمندری آمد و رفت کی آزادی فوری طور پر بحال کرنے کا مطالبہ کیا۔

انتونیو گوتریس نے کہا کہ اقوامِ متحدہ کی سلامتی کونسل میں آج کی دنیا کے آبادیاتی اور جغرافیائی سیاسی حقائق کی عکاسی کے لیے ایشیائی ممالک کو مستقل رکنیت میں زیادہ نمائندگی دی جانا ضروری ہے۔

انہوں نے کہا کہ دنیا اس وقت تنازعات، موسمیاتی بحران اور بڑھتی ہوئی عدم مساوات کی وجہ سے شدید عدم استحکام کا شکار ہے۔ ان کے مطابق ایران جنگ کے اثرات نے عالمی معاشی صورتحال کو مزید خراب کر دیا ہے۔

گوتریس نے کہا، ’’مہنگائی میں اضافہ ہو رہا ہے اور لوگوں کی معاشی مشکلات بڑھتی جا رہی ہیں۔ مغربی ایشیا میں جاری تنازع نے حالات کو مزید سنگین بنا دیا ہے۔ توانائی، کھاد اور دیگر خام اشیاء کی قیمتوں میں مسلسل اضافہ ہو رہا ہے۔‘‘

خلیجی خطے میں بڑھتی کشیدگی کا حوالہ دیتے ہوئے انہوں نے کہا کہ آبنائے ہرمز اور اس کے اطراف بحری جہاز رانی کی آزادی فوری طور پر بحال کی جانی چاہیے، جنگ بندی کی تمام خلاف ورزیوں کو ختم کیا جائے اور تنازع کے سیاسی حل کے لیے سازگار ماحول پیدا کیا جائے۔

انہوں نے کہا کہ ’’بڑھتا ہوا عدم اعتماد اور جغرافیائی سیاسی دوریاں‘‘ مؤثر عالمی حل کی راہ میں سب سے بڑی رکاوٹ بن چکی ہیں۔ ان کے مطابق بعض ممالک بغیر کسی خوف کے بین الاقوامی قوانین کی خلاف ورزیاں کر رہے ہیں۔

اقوامِ متحدہ کے سیکریٹری جنرل نے سلامتی کونسل اور عالمی مالیاتی نظام میں فوری اصلاحات کا مطالبہ کرتے ہوئے کہا کہ بڑھتی ہوئی جغرافیائی سیاسی تقسیم عالمی استحکام اور کثیر جہتی اداروں کی مؤثریت کو کمزور کر رہی ہے۔

انہوں نے کہا کہ پائیدار ترقیاتی اہداف، جو انسانیت اور دنیا کے بہتر مستقبل کا خاکہ ہیں، ان کے حصول کے لیے مزید مضبوط پیش رفت کی ضرورت ہے۔

گوتریس نے ترقی پذیر ممالک کی مدد کرنے والے کثیر جہتی ترقیاتی بینکوں کی محدود صلاحیت پر بھی تشویش ظاہر کی اور کہا کہ غریب اور ترقی پذیر ممالک قرضوں کے بوجھ اور مالی وسائل کی شدید کمی کا سامنا کر رہے ہیں۔

انہوں نے زور دیتے ہوئے کہا کہ ترقی پذیر ممالک کی بہتر نمائندگی اور اقوامِ متحدہ کی ساکھ بڑھانے کے لیے سلامتی کونسل کی مستقل اور غیر مستقل دونوں قسم کی نشستوں میں توسیع ناگزیر ہے۔

انہوں نے عالمی مالیاتی اداروں میں وسیع اصلاحات اور ترقی پذیر ممالک کو زیادہ مؤثر مالی امداد فراہم کرنے کے لیے کثیر جہتی ترقیاتی بینکوں کی تنظیمِ نو کا بھی مطالبہ کیا۔

یو این آئی۔ اے ایم

واشنگٹن، امریکی صدر ڈونلڈ ٹرمپ نے ایک بار پھر دعویٰ کیا ہے کہ ایران معاہدہ کرنے کے لیے بے تاب ہے، جبکہ انہوں نے خبردار کیا کہ اگر تہران کے ساتھ ڈیل نہ ہوئی تو امریکا دوبارہ فوجی کارروائی بھی کر سکتا ہے۔ ٹرمپ نے کہا کہ ایران اس وقت شدید معاشی بحران اور داخلی دباؤ کا سامنا کر رہا ہے۔

صحافیوں سے گفتگو کرتے ہوئے صدر ٹرمپ نے کہا کہ ایران میں عوام کی حالت انتہائی خراب ہے اور وہاں شدید غم و غصہ پایا جاتا ہے۔ ان کے مطابق ایران موجودہ صورتحال کے باعث معاہدہ چاہتا ہے۔

انہوں نے کہا کہ ایران کے ساتھ جنگ کو ابھی صرف تین ماہ ہوئے ہیں، جن میں سے زیادہ وقت جنگ بندی میں گزرا ہے۔ ٹرمپ نے یہ بھی کہا کہ آبنائے ہرمز کو بھی کھول دیا جائے گا، تاہم اس معاملے میں انہیں کوئی جلدی نہیں۔

امریکی صدر نے دعویٰ کیا کہ ایران کو ’’بری طرح تباہ‘‘ کر دیا گیا ہے اور آنے والے دنوں میں مزید پیش رفت دیکھی جائے گی۔ ان کا کہنا تھا کہ وہ ایران کے ساتھ معاہدے کے معاملے میں جلد بازی نہیں کر رہے۔

ڈونلڈ ٹرمپ نے ماضی کی امریکی جنگوں کا حوالہ دیتے ہوئے کہا کہ امریکا نے ویتنام، افغانستان، عراق اور دیگر ممالک میں کئی کئی سال تک جنگیں لڑیں، جبکہ ایران جنگ میں امریکا نے صرف 13 جانیں گنوائیں۔

انہوں نے مزید کہا کہ دیگر جنگوں میں امریکا کو لاکھوں جانوں کا نقصان اٹھانا پڑا تھا۔

ٹرمپ نے چین اور روس کے تعلقات پر تبصرہ کرتے ہوئے کہا کہ ان کے خیال میں چینی صدر شی جن پنگ اور روسی صدر ولادی میر پوتن کی ملاقات اچھی بات ہے، تاہم انہوں نے دعویٰ کیا کہ پوتن کی استقبالیہ تقریب اتنی شاندار نہیں تھی جتنی ان کی تھی۔

امریکی صدر نے اسرائیلی وزیراعظم بنجمن نیتن یاہو کے حوالے سے بھی کہا کہ ایران کے معاملے پر ان دونوں کا مشترکہ مؤقف ہے اور نیتن یاہو وہی کریں گے جو وہ کہیں گے۔

یواین آئی۔ م س

روم، وزیراعظم نریندر مودی نے کہا ہے کہ ہندوستان اور اٹلی نے تجارت، دفاع اور ٹیکنالوجی سمیت مختلف شعبوں میں تعاون بڑھانے کے عزم کے ساتھ اپنے دو طرفہ تعلقات کو خصوصی تزویراتی شراکت داری کی سطح تک لے جانے کا فیصلہ کیا ہے۔

انہوں نے کہا کہ دونوں ممالک دفاعی صنعتی شعبے میں بھی مل کر کام کریں گے۔

مسٹر نریندر مودی نے بدھ کو اٹلی کی وزیراعظم جارجیا میلونی کے ساتھ دو طرفہ مذاکرات کے بعد مشترکہ بیان میں کہا کہ میلونی کی قیادت میں دونوں ممالک کے تعلقات کو نئی رفتار اور نیا اعتماد ملا ہے۔

انہوں نے کہا، ”گزشتہ تقریباً ساڑھے تین برسوں میں مجھے کئی مرتبہ وزیراعظم جارجیا میلونی سے ملاقات کا موقع ملا۔ یہ ہندوستان اور اٹلی کے درمیان قریبی تعاون اور باہمی ہم آہنگی کو ظاہر کرتا ہے۔ ان کی قیادت میں ہمارے تعلقات کو نئی رفتار، نئی سمت اور نیا اعتماد ملا ہے۔ مجھے خوشی ہے کہ ہم اپنے تعلقات کو مزید آگے بڑھاتے ہوئے خصوصی تزویراتی شراکت داری تک لے جانے کا اعلان کر رہے ہیں۔”

وزیراعظم نے کہا کہ ہندوستان اور اٹلی مل کر مصنوعات کا ڈیزائن اور ترقی کریں گے اور انہیں دنیا بھر میں دستیاب کرائیں گے۔

انہوں نے کہا، ”اٹلی دنیا بھر میں ڈیزائن اور درستگی کیلئے جانا جاتا ہے، جبکہ ہندوستان اپنی وسعت، صلاحیت اور کم لاگت اختراعات کیلئے پہچانا جاتا ہے۔ اسی لیے ہم ‘ہندوستان میں ڈیزائن، اٹلی میں ترقی اور دنیا کیلئے فراہمی’ کے اصول پر آگے بڑھیں گے۔”

دفاعی صنعتی شعبے میں تعاون کا ذکر کرتے ہوئے انہوں نے کہا، ”ہمارے دفاعی صنعتی روڈ میپ نے مشترکہ ترقی اور مشترکہ پیداوار کی راہ ہموار کی ہے۔ سمندری طاقتوں کے طور پر ہندوستان اور اٹلی کے درمیان رابطہ کاری کے شعبے میں قریبی تعاون فطری ہے۔ ہم شپنگ، بندرگاہوں کی جدید کاری، لاجسٹکس اور سمندری معیشت پر مل کر کام کریں گے۔”

دہشت گردی کے معاملے پر دونوں ممالک کے مشترکہ مؤقف کا ذکر کرتے ہوئے مسٹر نریندر مودی نے کہا، ”ہندوستان اور اٹلی اس بات پر متفق ہیں کہ دہشت گردی انسانیت کیلئے ایک سنگین خطرہ ہے۔ دہشت گردی کی مالی معاونت کے خلاف ہماری مشترکہ کوششوں نے پوری دنیا کے سامنے ایک اہم مثال پیش کی ہے۔ دونوں ممالک نے واضح پیغام دیا ہے کہ ذمہ دار جمہوریتیں صرف دہشت گردی کی مذمت نہیں کرتیں بلکہ اس کے مالیاتی نیٹ ورک کو توڑنے کیلئے عملی اقدامات بھی کرتی ہیں۔”

انہوں نے کہا کہ یوکرین اور مغربی ایشیا کی صورتحال پر بھی دونوں ممالک مسلسل رابطے میں ہیں۔

مسٹر نریندر مودی نے کہا، ”یوکرین، مغربی ایشیا اور دیگر کشیدہ حالات کے حوالے سے ہم مسلسل رابطے میں رہے ہیں۔

ہندوستان کا واضح مؤقف ہے کہ تمام مسائل کا حل بات چیت اور سفارت کاری کے ذریعے ہی ممکن ہے۔”

یواین آئی۔ م س