بیروت، اسرائیل کی جانب سے جنگ بندی کے باوجود لبنان پر حملے جاری ہیں جس میں مزید 13 افراد شہید ہوگئے ۔

اسرائیل نے جنگ بندی کے معاہدے کے بعد بدھ کو پہلی بار لبنان کے دارالحکومت بیروت پر حملہ کیا۔ رپورٹس کے مطابق یہ فضائی حملہ بیروت کے جنوبی مضافاتی علاقے داحیہ پر کیا گیا، جہاں حزب اللہ کا مرکز واقع ہے۔ سوشل میڈیا پر شیئر کی گئیں تصاویر میں بڑے پیمانے پر آگ اور کم از کم ایک عمارت کو شدید نقصان دکھایا گیا ہے۔

اسرائیلی وزیراعظم بن یامین نیتن یاہو نے ایک بیان میں کہا کہ انہوں نے خود اس حملے کی منظوری دی تھی، جس کا ہدف حزب اللہ کی ایلیٹ رضوان فورس کا ایک کمانڈر تھا۔ اس کے علاوہ اسرائیلی جنگی طیاروں نے جنوبی لبنان کے شہر سکسکیہ پر بمباری کی جس میں 5 افراد شہید اور 15 زخمی ہوئے۔ رپورٹ کے مطابق بدھ کے روز اسرائیل نے 17 اپریل کو نافذ ہونے والی جنگ بندی کے بعد پہلی بار بیروت کے جنوبی مضافات پر بمباری کی، جس میں لبنان بھر میں کم از کم 13 افراد شہید ہوئے۔

ادھر اقوام متحدہ کے ادارے برائے انسانی امور کے رابطہ دفتر کے مطابق لبنان میں انسانی صورتحال “جنگ بندی کے باوجود انتہائی غیر مستحکم” ہے اور شہری مسلسل جنگ سے متاثر ہو رہے ہیں۔ رپورٹ میں بتایا گیا ہے کہ 2 مارچ سے اب تک لبنان میں 2,700 سے زائد افراد ہلاک ہو چکے ہیں، جبکہ فضائی حملوں کے باعث ہلاکتوں کی تعداد روزانہ بڑھ رہی ہے۔

دوسری جانب حزب اللہ کا کہنا ہے کہ اس کے جنگجوؤں نے بدھ کے روز لبنان کے اندر داخل ہونے والی اسرائیلی افواج پر 17 حملے کیے۔ حزب اللہ کے بیان کے مطابق اسرائیلی فوجیوں اور فوجی گاڑیوں کو قنطرہ، البیاضہ، طیّبہ، نقرہ، رشاف اور عیتا الشعب میں ڈرون اور راکٹ حملوں کے ذریعے نشانہ بنایا گیا۔

یو این آئی۔ ع ا۔

تہران، ایران کے چیف مذاکرات کار اور پارلیمنٹ کے اسپیکر محمد باقر قالیباف کا کہنا ہے کہ دشمن میڈیا پروپیگنڈے کی کوشش کر رہا ہے تاکہ ایران کو ہتھیار ڈالنے پر مجبور کیا جاسکے۔

اپنے ایک بیان میں محمد باقر قالیباف نے کہا ہے کہ دشمن میڈیا پروپیگنڈے کی کوشش کر رہا ہے، جس کا مقصد بحری ناکہ بندی کے ذریعے اقتصادی دباؤ بڑھا کر ایران کو اندر سے کم زور کرنا ہے تاکہ ایران کو ہتھیار ڈالنے پر مجبور کیا جاسکے۔

انہوں نے مزید کہا کہ ایرانیوں کو تاریخ کے اس حساس دور میں دشمن کے خلاف ڈٹ کر کھڑے رہنے کا ادراک ہے۔

یو این آئی۔ ع ا۔

بیجنگ، چین نے ایران کے خلاف امریکہ اور اسرائیل کی جنگ ناجائز قرار دے دی ہے، چینی وزیر خارجہ وانگ یی نے کہا ایران اور امریکہ کے درمیان مکمل جنگ بندی ضروری ہے۔

ایران کے وزیرِ خارجہ عباس عراقچی نے بیجنگ میں چینی ہم منصب سے ملاقات کی، جس میں انھوں نے کہا کہ تہران صرف منصفانہ اور جامع معاہدہ قبول کرے گا، عباس عراقچی نے ملاقات کے بعد ٹوئٹ بھی کیا جس میں انھوں نے بتایا کہ علاقائی امن و استحکام کے لیے چین نے 4 نکاتی تجویز دی ہے۔ انھوں نے کہا ہم خطے میں امن و استحکام کے لیے چین کے کردار پر اعتماد کرتے ہیں اور جنگ کے بعد ایک نئے علاقائی ڈھانچے کے قیام کی حمایت کرتے ہیں۔

ایرانی میڈیا کے مطابق چینی وزیر خارجہ وانگ یی نے امریکہ اور اسرائیلی حکومت کی جانب سے ایران کے خلاف شروع کی گئی جنگ کو ”غیر قانونی اور ناجائز” قرار دیتے ہوئے مکمل جنگ بندی کے قیام کا مطالبہ کیا۔ بدھ کے روز بیجنگ میں اپنے ایرانی ہم منصب سید عباس عراقچی کے ساتھ ایک اہم ملاقات کے دوران چینی وزیر خارجہ نے زور دیا کہ خطہ اس وقت ایک ”فیصلہ کن موڑ” سے گزر رہا ہے۔

انھوں نے کہا ”ہم کشیدگی کم کرنے کی کوششیں جاری رکھنے کے لیے تیار ہیں، مکمل جنگ بندی کا قیام ایک بنیادی اور ناگزیر ضرورت ہے۔” امریکی تجاویز: نتیجے پر پہنچے تو پاکستان کو مؤقف بتا دیں گے، اسماعیل بقائی وانگ یی نے موجودہ بحران سے نمٹنے کے لیے متعلقہ فریقوں کے درمیان براہِ راست ملاقاتوں کی اہمیت پر بھی زور دیا۔ ایرانی وزیر خارجہ عباس عراقچی نے تہران کے مضبوط مؤقف کو دہراتے ہوئے کہا ”ہم صرف ایک منصفانہ اور جامع معاہدہ ہی قبول کریں گے۔” انھوں نے چین کے مؤقف پر شکریہ ادا کرتے ہوئے، خصوصاً امریکہ اور اسرائیل کے اقدامات کی مذمت کو سراہا، اور چین کو ایران کا قریبی دوست قرار دیا۔ انھوں نے کہا کہ موجودہ حالات میں دونوں ممالک کے درمیان تعاون مزید مضبوط ہوگا۔

عراقچی نے کہا کہ ہم پر مسلط کی گئی جنگ ایک واضح جارحیت اور بین الاقوامی قانون کی کھلی خلاف ورزی ہے، ایران مذاکرات کے دوران اپنے جائز حقوق اور مفادات کے تحفظ کے لیے ہر ممکن کوشش کرے گا۔

یو این آئی۔ ع ا۔