ریو ڈی جنیرو، ایرانی وزیرِ خارجہ عباس عراقچی نے کہا ہے کہ ایران کے مسئلے کا کوئی فوجی حل موجود نہیں اور خطے کے بحرانوں کا حل صرف سفارتکاری کے ذریعے ممکن ہے۔برکس وزرائے خارجہ اجلاس سے خطاب کرتے ہوئے ایرانی وزیر خارجہ نے کہا کہ گزشتہ ایک سال سے کم عرصے میں ایران کو امریکہ اور اسرائیل کی جانب سے دو ”وحشیانہ اور غیر قانونی جارحیتوں” کا سامنا کرنا پڑا۔

انہوں نے کہا کہ ایران دیگر آزاد ممالک کی طرح غیر قانونی توسیع پسندی اور جنگی جنون کا نشانہ بنا ہے، جو آج کی دنیا کے بدترین مظاہر ہیں۔

عباس عراقچی نے کہا کہ وہ ایسے عوام کی نمائندگی کر رہے ہیں جنہوں نے شدید بمباری کے باوجود ثابت قدمی کا مظاہرہ کیا۔

انہوں نے کہا کہ ایرانی عوام دباؤ یا دھمکی کے سامنے نہیں جھکتے، تاہم احترام کا جواب احترام سے دیتے ہیں۔

ایرانی وزیر خارجہ کے مطابق دنیا پر واضح ہو جانا چاہیے کہ ایران ناقابلِ شکست ہے اور ہر دباؤ کے بعد مزید مضبوط اور متحد ہو کر ابھرتا ہے۔

انہوں نے کہا کہ ایران اپنی آزادی اور خودمختاری کے دفاع کے لیے پوری طاقت سے لڑنے کے لیے تیار ہے، لیکن ساتھ ہی سفارتکاری کے تحفظ اور فروغ کے لیے بھی مکمل آمادہ ہے۔

عباس عراقچی نے دعویٰ کیا کہ ایران کی مسلح افواج بیرونی جارحیت کا ”تباہ کن جواب” دینے کی صلاحیت رکھتی ہیں، تاہم ایرانی قوم امن پسند ہے اور جنگ نہیں چاہتی۔

انہوں نے برکس ممالک اور عالمی برادری سے مطالبہ کیا کہ وہ ایران کے خلاف مبینہ غیر قانونی جارحیت اور بین الاقوامی قانون کی خلاف ورزیوں کی مذمت کریں۔

ایرانی وزیر خارجہ نے عالمی اداروں کو سیاسی مقاصد کیلئے استعمال ہونے سے روکنے پر بھی زور دیا۔

انہوں نے کہا کہ وقت آ گیا ہے کہ ”امریکہ کی غنڈہ گردی” کو تاریخ کے کوڑے دان میں پھینک دیا جائے اور گلوبل ساؤتھ مغربی برتری کے تصور کو مسترد کرے۔

عباس عراقچی نے مزید کہا کہ ایران کے نقطۂ نظر سے آبنائے ہرمز تمام تجارتی جہازوں کیلئے کھلی ہے، تاہم جہازوں کو ایرانی بحری افواج کے ساتھ تعاون کرنا ہوگا۔

یواین آئی۔ م س

بیجنگ، چینی صدر شی جن پنگ نے امریکی صدر ڈونلڈ ٹرمپ کو خبردار کیا ہے کہ اگر تائیوان کے معاملے کو غلط انداز میں نمٹایا گیا تو چین اور امریکہ کے درمیان تصادم چھڑ سکتا ہے۔چین کے سرکاری ٹی وی کے مطابق شی جن پنگ نے کہا کہ تائیوان کا مسئلہ چین۔امریکہ تعلقات میں سب سے اہم معاملہ بن چکا ہے۔

انہوں نے خبردار کیا کہ اگر اس معاملے کو درست طریقے سے نہ سنبھالا گیا تو دونوں ممالک آپس میں ٹکرا سکتے ہیں اور صورتحال پورے چین۔امریکہ تعلقات کو انتہائی خطرناک مرحلے میں داخل کر سکتی ہے۔

بیجنگ طویل عرصے سے تائیوان کو اپنا حصہ قرار دیتا رہا ہے، جبکہ چین نے بدھ کے روز ایک بار پھر تائیوان کو امریکی ہتھیاروں کی فروخت کی شدید مخالفت کا اعادہ کیا تھا۔

رپورٹس کے مطابق تقریباً 14 ارب ڈالر مالیت کے اسلحہ معاہدے کا مستقبل اب بھی غیر واضح ہے اور یہ امریکی صدر ڈونلڈ ٹرمپ کی منظوری کا منتظر ہے۔

واضح رہے کہ امریکہ قانونی طور پر تائیوان کو اس کے دفاع کے لیے ضروری وسائل فراہم کرنے کا پابند ہے، اگرچہ واشنگٹن اور تائیوان کے درمیان باضابطہ سفارتی تعلقات موجود نہیں ہیں۔

سیاسی مبصرین کے مطابق تائیوان اس وقت واشنگٹن اور بیجنگ کے درمیان سب سے حساس جغرافیائی اور تزویراتی تنازع بن چکا ہے، جہاں دونوں طاقتیں خطے میں اپنے اثر و رسوخ کو برقرار رکھنے کی کوشش کر رہی ہیں۔

ابتدائی شیڈول کے مطابق شی جن پنگ رواں سال کے آخر میں امریکہ کا دورہ کریں گے، جو ڈونلڈ ٹرمپ کے دوبارہ اقتدار میں آنے کے بعد ان کا پہلا امریکی دورہ ہو گا۔

یواین آئی۔ م س

پیرس، ایمانوئل میکرون کو ان کی اہلیہ بریجیٹ میکرون کی جانب سے مبینہ طور پر تھپڑ مارنے کے واقعے کی ایک نئی وجہ سامنے آئی ہے، جس نے فرانسیسی میڈیا اور سوشل میڈیا پر ایک بار پھر ہلچل پیدا کر دی ہے رپورٹس کے مطابق مئی 2025 میں ہنوئی میں طیارے سے اترتے وقت کیمرے میں محفوظ ہونے والا یہ منظر دنیا بھر میں وائرل ہوا تھا، تاہم اس وقت فرانسیسی صدر نے اسے محض مذاق قرار دیا تھا۔

اب ایک نئی کتاب میں دعویٰ کیا گیا ہے کہ بریجیٹ میکرون اپنے شوہر کو اس وجہ سے ناراض تھیں کیونکہ وہ مبینہ طور پر ایرانی اداکارہ گل شفتے فرحانی کے ساتھ نامناسب پیغامات کا تبادلہ کرتے پائے گئے تھے۔

کتاب میں یہ دعویٰ بھی کیا گیا ہے کہ 48 سالہ میکرون اور 42 سالہ گل شفتے فرحانی کے درمیان کئی ماہ تک قریبی تعلقات رہے۔

مصنفہ کے مطابق صدر میکرون نے ایک پیغام میں ایرانی اداکارہ سے کہا تھا کہ وہ ’’بہت خوبصورت‘‘ دکھائی دیتی ہیں۔

کتاب میں شامل ایک بیان کے مطابق بریجیٹ میکرون کو صرف پیغامات کے تبادلے پر نہیں بلکہ اس احساس پر زیادہ دکھ تھا کہ وہ آہستہ آہستہ پس منظر میں دھکیلی جا رہی ہیں۔

واضح رہے کہ ویڈیو وائرل ہونے کے بعد صدر میکرون نے اپنی اہلیہ کے ساتھ کسی جھگڑے کی تردید کرتے ہوئے کہا تھا کہ دونوں کے درمیان ہلکے پھلکے انداز میں مذاق ہو رہا تھا جسے غلط رنگ دے دیا گیا۔

دوسری جانب بریجیٹ میکرون اور گل شفتے فرحانی دونوں نے نئی کتاب میں کیے گئے دعوؤں کی تردید کر دی ہے۔

یاد رہے کہ بریجیٹ میکرون ماضی میں ایمانویل میکرون کی استاد رہ چکی ہیں، بعد ازاں دونوں نے شادی کر لی تھی۔

یواین آئی۔ م س