سرینگر، وادیِ کشمیر میں اگلے اتوار تک وقفے وقفے سے ہلکی بارش اور گرج چمک کے ساتھ بوندا باندی کی پیش گوئی کی گئی ہے۔ محکمہ موسمیات نے جمعہ کو اطلاع دی ہے کہ گزشتہ 24 گھنٹوں کے دوران وادی کے مختلف حصوں میں ہلکی بارش ریکارڈ کی گئی ہے۔

محکمہ موسمیات کے جاری کردہ اعداد و شمار کے مطابق سرینگر میں 2.6 ملی میٹر بارش ریکارڈ کی گئی۔ قاضی گنڈ میں 4.4 ملی میٹر اور کپواڑہ میں 6 ملی میٹر بارش ہوئی۔ مشہور سیاحتی مقام گلمرگ میں 7 ملی میٹر بارش ہوئی، جو وادی میں سب سے زیادہ ریکارڈ کی گئی، جبکہ پہلگام میں 5.4 ملی میٹر بارش درج ہوئی۔وادی میں رات کا درجہ حرارت معمول سے 0 سے 3 ڈگری سیلسیس زیادہ رہا۔ گلمرگ میں کم سے کم درجہ حرارت 3.6 ڈگری سیلسیس ریکارڈ کیا گیا، جو وادی کا سرد ترین مقام رہا۔

محکمہ موسمیات نے 19 اپریل تک موسم خراب رہنے کا امکان ظاہر کیا ہے۔

اس دوران 40 سے 50 کلومیٹر فی گھنٹہ کی رفتار سے تیز ہوائیں چلنے اور بعض مقامات پرژالہ باری کا بھی خدشہ ہے۔ 20 سے 24 اپریل تک موسم کی صورتحال میں بہتری کی توقع ہے اور موسم عام طور پر خشک رہے گا۔ خشک موسم کا یہ سلسلہ 25 اور 26 اپریل کو بھی جاری رہ سکتا ہے، تاہم دوپہر کے وقت چند مقامات پر گرج چمک کے ساتھ ہلکی بوندا باندی ہو سکتی ہے۔

یو این آئی۔م ا ع

واشنگٹن، امریکی صدر ڈونلڈ ٹرمپ نے دعویٰ کیا ہے کہ ایران ایٹمی ہتھیار نہ رکھنے پر رضامند ہوگیا ہے۔

صحافیوں سے بات چیت کرتے ہوئے امریکی صدر نے یہ بھی دعویٰ کیا کہ ایران اپنے تباہ شدہ افزودہ یورینیم کو بھی امریکہ کے حوالے کرنے پر تیار ہو گیا ہے جو دھول بن چکا ہے۔ امریکی صدر نےکہاکہ ایران سے امریکا کی بہت اچھی بات چیت چل رہی ہے، ایران کے ساتھ امریکاکی ڈیل بہت قریب ہے، مذاکرات کا نیا دوراسی ہفتے ممکن ہے، ایران پہلے جن باتوں پر تیار نہیں تھا، اب ان پر تیار ہے، ایران سے معاہدہ ہو گیا تو پاکستان جاؤں گا۔

صدر ٹرمپ نے کہاکہ آبنائے ہرمز کی ناکہ بندی بم باری سے زیادہ مؤثر ثابت ہوئی ہے۔ لبنان اور اسرائیل کی جنگ بندی پر کہا کہ انہوں نے لبنانی صدر اور اسرائیلی وزیراعظم کو وائٹ ہاوس بلایا ہے، حزب اللہ سے بات چیت لبنانی حکومت کرےگی۔

امریکی صدر نے وزیراعظم شہباز شریف اور آرمی چیف فیلڈ مارشل عاصم منیر کی ایک بار پھر تعریف کی اور کہا یہ دونوں زبردست آدمی ہیں۔

یو این آئی۔ ع ا۔

تہران، ایرانی صدر مسعود پزشکیان نے جنگ روکنے میں پاکستان کے مؤثر اور ذمہ دارانہ کردار کو قابل ستائش قرار دیا۔

ایرانی صدر نے کہا کہ ان کا ملک امن، استحکام اور خطے میں برادرانہ تعلقات کا خواہاں ہے، انہوں نے واضح کیاکہ ایرانی عوام کا وعدے توڑے جانے کی وجہ سے امریکا پر اعتماد نہیں اور زور دیا کہ عالمی قوانین اور اصولوں کے تحت ایرانی قوم کے حقوق برقرار رہنے چاہیں۔

صدر پزشکیان کا کہنا تھا کہ امریکا اس تنازعے میں فاتح بن کر نہیں ابھرے گا، تنازعے سے خطے کے ممالک اور دنیا سنگین نقصانات اٹھائے گی۔ ایرانی صدر کا کہنا تھا کہ صیہونی رجیم اپنے عزائم کے تعاقب میں ہے، انہوں نے امید ظاہر کی کہ اسلامی امہ کا اتحاد صیہونی رجیم کے عزائم پورے ہونے سے روکے گا۔ صدر پزشکیان نے اس بات پر بھی زور دیا کہ خطے کی سکیورٹی خطے کے ممالک کو یقینی بنانا چاہیے۔

یو این آئی۔ ع ا۔