واشنگٹن، امریکی صدر ڈونلڈ ٹرمپ نے کہا ہےکہ ایران سے جنگ بندی میں توسیع پر غور نہيں کر رہے اور شاید اس کی ضرورت ہی نہ پڑے۔

امریکی ٹی وی کو دیے گئے انٹرویو میں ڈونلڈ ٹرمپ نے کہا کہ جنگ ختم ہونے کے قریب ہے، ایران بہت شدت سے معاہدہ کرنا چاہتا ہے، آنے والے دو دنوں میں ایک حیرت انگیز منظر دیکھنے کو ملے گا، امریکہ کی ترجیح معاہدہ کرنا ہے ۔

انہوں نے کہا کہ ایران کے حملوں سے خلیجی ملکوں کو شدید دھچکا پہنچا، انہیں ہرگز توقع نہیں تھی کہ ایران اُن پر حملہ کردے گا، قطر، سعودی عرب اور متحدہ عرب امارات شدید حیران ہوئے جب ایران نے ان پر حملہ کیا، ان ملکوں کو اندازہ ہی نہیں تھا کہ ان پر بھی حملہ ہوسکتا ہے۔

امریکی صدر نے دعویٰ کرتے ہوئے کہا کہ ایران سے جنگ بندی میں توسیع پر غور نہيں کر رہے کیونکہ شاید اس کی ضرورت ہی نہ پڑے۔

یو این آئی۔ ع ا۔

تہران، ایران نے بحری جہازوں کو بغیر کارروائی کے آزادانہ طور پر گزرنے کے لیے آبنائے ہرمز سے عمانی ساحل س کھولنے کی پیشکش کردی خبر رساں ایجنسی رائٹرز کے مطابق ایرانی ذرائع کا کہنا ہے کہ آبنائے ہرمز کو عمانی ساحل سے کھولا جا سکتا ہے اور اس راستے سے جہازوں کو نقل و حرکت میں آسانی ہو سکتی ہے ایران نے تجویز پیش کی ہے عمانی ساحلی پٹی کی طرف جہازوں پر حملہ نہیں کیا جائے گا اور اس تجویز کا مقصد مذاکرات کے دوران کسی بھی ناخوشگوار واقعے سے بچنا ہے۔ رائٹرز کا کہنا ہے کہ جنگ کے بعد 20ہزار سے زائد بحری جہاز اور آئل ٹینکر پھنسے ہوئے ہیں، آبنائے ہرمز کے عمانی ساحل سے بحری جہاز راستہ استعمال کر سکتے ہیں۔

یو این آئی۔ ع ا۔

انقرہ، ترک صدر رجب طیب اردوان نے امریکہ اور ایران سے جنگ بندی مذاکرات کو آگے بڑھانے کی اپیل کرتے ہوئےکہا ہےکہ بند مُٹھیاں لے کر مذاکرات نہیں کیے جا سکتے، جنگ بندی کے لیے موجود موقع سے فائدہ اٹھایا جانا چاہیے۔

ترک میڈیا کے مطابق انقرہ میں جسٹس اینڈ ڈیولپمنٹ پارٹی کے پارلیمانی اجلاس سے خطاب کرتے ہوئے ترک صدر کا کہنا تھا کہ اسرائیل جنگ بندی سے ناخوش ہے اور اسے اس عمل کو سبوتاژ کرنے کی اجازت نہیں دی جانی چاہیے، لبنان میں اسرائیلی حملے پائیدار امن کے امکانات کو نقصان پہنچا رہے ہیں۔ انہوں نے کہا کہ ترکیے خطے میں کشیدگی کم کرنے، جنگ بندی میں توسیع اور مذاکرات جاری رکھنے کے لیے ضروری سفارتی کوششیں کر رہا ہے، خطے میں امن تب ہی ممکن ہے جب اسے اس صہیونی حکومت کو شامل کیے بغیر حاصل کیا جائے۔

ترک صدر نےگزشتہ دنوں اسرائیلی وزیراعظم نیتن یاہو کی طرف سے سوشل میڈیا پر ترکیے اور خود پر تنقید کا جواب دیتے ہوئےکہا کہ کوئی بھی ترکیے پر انگلی نہیں اٹھاسکتا، مجھے اور ہمارے ملک کو نشانہ بنانے والوں کو یاد دلاتا ہوں کہ ترکیے ایک عام ریاست نہیں ہے۔ ان کا کہنا تھا کہ ترکیے ہمیشہ مظلوم فلسطینیوں کی آواز بنا رہےگا، ہم ظالم کو ظالم، قزاق کو قزاق اور قاتل کو قاتل کہنا جاری رکھیں گے اور غزہ کے بچوں اور ان ماؤں کی آواز بنے رہیں گے جن کے دل جل رہے ہیں، مقبوضہ مغربی کنارے میں اپنے بھائیوں کے حقوق کا دفاع کریں گے اور لبنان میں بچوں کے خلاف ہونے والے مظالم پر آواز اٹھاتے رہیں گے۔

ترک صدر رجب طیب اردوان کا مزید کہنا تھا کہ ہم گھر میں امن، خطے میں امن اور دنیا میں امن کے اصول کے ساتھ ہمیشہ امن کے سفیر رہنےکے لیے تیار ہیں، ہم اپنے قومی ترانےکے آغاز ‘مت ڈرو’ پر یقین رکھنے والی ایک بہادر قوم ہیں اور عزت کے ساتھ مرنا بے عزتی کی زندگی سے بہتر سمجھتے ہیں۔

یو این آئی۔ ع ا۔