ریاض، خلیج تعاون کونسل کے سیکرٹری جنرل جاسم البدیوی نے متحدہ عرب امارات کو نشانہ بنانے والے ایرانی حملوں کی مذمت کرتے ہوئے انہیں خطرناک جارحانہ عمل اور کھلی کشیدگی قرار دیا ہے۔

مسٹر جاسم البدیوی نے کہا کہ ایران کی جانب سے اماراتی آئل ٹینکر پر حملے اور چار کروز میزائل داغنا جنگ بندی کی خلاف ورزی ہے، جو خطے کے امن کے لیے خطرہ ہے۔

حالیہ سیکیورٹی صورتحال کے پیش نظر یو اے ای نے طلبہ اور تعلیمی عملے کے تحفظ کو مدنظر رکھتے ہوئے 5 مئی سے 8 مئی تک تعلیمی نظام کو آن لائن لرننگ پر منتقل کرنے کا فیصلہ کیا ہے۔

اسی تناظر میں امارات اور عمان پر حملے ایسے وقت میں سامنے آئے ہیں جب امریکہ نے ’’پروجیکٹ فریڈم‘‘ کے تحت آبنائے ہرمز میں پھنسے جہازوں کی مدد اور تجارتی نقل و حمل کو محفوظ بنانے کا اعلان کیا تھا۔

امریکی فوج کے مطابق اس وقت خلیج عرب میں موجود بحری جہاز 87 ممالک کی نمائندگی کر رہے ہیں، جو اس حساس گزرگاہ میں عالمی موجودگی کی اہمیت کو ظاہر کرتے ہیں۔

سینٹکام کے مطابق ایران پر عائد بحری ناکہ بندی کے آغاز سے اب تک امریکی افواج نے تقریباً 50 تجارتی جہازوں کے راستے تبدیل کیے ہیں تاکہ جہاز رانی کی سلامتی اور قواعد کی پاسداری کو یقینی بنایا جا سکے۔

خطے میں بڑھتی کشیدگی کے باعث عالمی سطح پر تشویش میں اضافہ ہو رہا ہے، جبکہ مختلف ممالک سفارتی اور دفاعی سطح پر صورتحال پر قریبی نظر رکھے ہوئے ہیں۔

ابوظہبی، متحدہ عرب امارات نے الزام عائد کیا ہے کہ ایران نے آبنائے ہرمز سے گزرنے والے اس کے آئل ٹینکر پر دو ڈرونز سے حملہ کیا ہے۔ عرب میڈیا کے مطابق یو اے ای کی وزارت خارجہ نے بتایا کہ حملے کا نشانہ بننے والا جہاز سرکاری آئل کمپنی ایڈنوک سے وابستہ تھا۔ کمپنی کی میری ٹائم لاجسٹکس یونٹ کے مطابق ’’بارکہ‘‘ نامی جہاز اس وقت خالی تھا اور فیلنگ کے لیے جا رہا تھا، جبکہ اس واقعے میں کوئی جانی نقصان نہیں ہوا۔

متحدہ عرب امارات کی وزارت خارجہ نے اس حملے کی شدید مذمت کرتے ہوئے کہا کہ تجارتی جہازوں کو نشانہ بنانا بین الاقوامی بحری قوانین کی خلاف ورزی ہے اور اس سے عالمی توانائی کی ترسیل کو خطرات لاحق ہو سکتے ہیں۔

بیان میں ایران سے مطالبہ کیا گیا کہ وہ ایسے بلا اشتعال حملوں کو فوری طور پر بند کرے اور آبنائے ہرمز کو بحری آمد و رفت کے لیے مکمل طور پر کھلا رکھا جائے۔

دوسری جانب قطر نے بھی اس واقعے پر تشویش کا اظہار کرتے ہوئے کہا کہ آبنائے ہرمز کو تجارتی جہازوں کے لیے محفوظ راستہ بنایا جانا چاہیے۔

ادھر پاسداران انقلاب نے دعویٰ کیا ہے کہ اس نے اسی روز امریکی بحریہ کے ایک ڈسٹرائر جہاز کو میزائل حملے کا نشانہ بنا کر پسپائی پر مجبور کیا، جبکہ جنوبی کوریا کے ایک جہاز میں بھی آگ بھڑک اٹھی۔

تاہم سینٹکام نے اس دعوے کو مسترد کرتے ہوئے کہا کہ آبنائے ہرمز میں کسی امریکی جہاز کو نشانہ نہیں بنایا گیا اور امریکی پرچم بردار دو جہاز بحفاظت اس گزرگاہ سے گزر چکے ہیں۔

اس کے جواب میں پاسداران انقلاب نے امریکی مؤقف کو جھوٹ اور بے بنیاد قرار دیا ہے، جس سے خطے میں کشیدگی مزید بڑھنے کا خدشہ ظاہر کیا جا رہا ہے۔

یواین آئی۔ م س

واشنگٹن، ڈونلڈ ٹرمپ نے ایران کو خبردار کرتے ہوئے کہا ہے کہ وہ نیک نیتی سے معاہدہ کرے یا پھر لڑائی دوبارہ شروع کرنے کے لیے تیار رہے۔امریکی صدر نے فاکس نیوز کو دیے گئے انٹرویو میں کہا کہ اگر آبنائے ہرمز کے آپریشن کے دوران امریکی جہازوں پر حملہ کیا گیا تو ایران کو سخت جواب دیا جائے گا۔

انہوں نے کہا کہ امریکی فوجی اجتماع جاری ہے اور ضرورت پڑنے پر جدید ترین ہتھیار استعمال کیے جائیں گے، تاہم ان کے مطابق ایران مذاکرات میں کسی حد تک لچک دکھا رہا ہے۔

صدر ٹرمپ نے دعویٰ کیا کہ آبنائے ہرمز میں ایران کی جانب سے محدود فائرنگ کی گئی، جس سے صرف جنوبی کوریا کے ایک مال بردار جہاز کو نقصان پہنچا۔ انہوں نے اپنے پلیٹ فارم ٹروتھ سوشل پر کہا کہ دیگر ممالک کو بھی اس صورتحال پر غور کرنا چاہیے۔

انہوں نے مزید دعویٰ کیا کہ امریکی افواج نے ایران کی 7 چھوٹی فوجی کشتیاں تباہ کر دی ہیں، جبکہ اس سے قبل سینٹکام کے سربراہ بریڈ کوپر نے 6 کشتیوں کی تباہی اور میزائل و ڈرون حملوں کو ناکام بنانے کی تصدیق کی تھی۔

بریڈ کوپر کے مطابق امریکی اپاچی ہیلی کاپٹر اور سی ہاک ہیلی کاپٹر نے ان کشتیوں کو نشانہ بنایا جو تجارتی جہاز رانی کے لیے خطرہ بن رہی تھیں۔

دوسری جانب ایرانی سرکاری میڈیا نے امریکی دعوؤں کو مسترد کرتے ہوئے کہا ہے کہ کسی ایرانی کشتی کو نقصان نہیں پہنچا اور امریکی بیانات بے بنیاد ہیں۔

ادھر ایک اسرائیلی فوجی عہدیدار نے کہا ہے کہ صورتحال کے پیش نظر فوج ہائی الرٹ پر ہے اور اسرائیل اپنے دفاعی نظام کو مکمل طور پر متحرک رکھے ہوئے ہے۔

قبل ازیں سینٹکام نے اعلان کیا تھا کہ امریکی پرچم بردار دو تجارتی جہاز کامیابی سے آبنائے ہرمز عبور کر چکے ہیں اور یہ کارروائیاں ’’پروجیکٹ فریڈم‘‘ کے تحت جاری ہیں، جس کا مقصد اس اہم گزرگاہ میں جہاز رانی کو بحال رکھنا ہے۔

تاہم پاسداران انقلاب نے اس دعوے کی تردید کرتے ہوئے کہا ہے کہ حالیہ گھنٹوں میں کوئی تجارتی جہاز آبنائے ہرمز سے نہیں گزرا۔

یہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی برقرار ہے اور آبنائے ہرمز، جہاں سے عالمی تیل اور گیس کی بڑی مقدار گزرتی ہے، ایک بار پھر عالمی توجہ کا مرکز بنا ہوا ہے۔

یواین آئی۔ م س