واشنگٹن، ڈونلڈ ٹرمپ نے ایران کو خبردار کرتے ہوئے کہا ہے کہ وہ نیک نیتی سے معاہدہ کرے یا پھر لڑائی دوبارہ شروع کرنے کے لیے تیار رہے۔امریکی صدر نے فاکس نیوز کو دیے گئے انٹرویو میں کہا کہ اگر آبنائے ہرمز کے آپریشن کے دوران امریکی جہازوں پر حملہ کیا گیا تو ایران کو سخت جواب دیا جائے گا۔

انہوں نے کہا کہ امریکی فوجی اجتماع جاری ہے اور ضرورت پڑنے پر جدید ترین ہتھیار استعمال کیے جائیں گے، تاہم ان کے مطابق ایران مذاکرات میں کسی حد تک لچک دکھا رہا ہے۔

صدر ٹرمپ نے دعویٰ کیا کہ آبنائے ہرمز میں ایران کی جانب سے محدود فائرنگ کی گئی، جس سے صرف جنوبی کوریا کے ایک مال بردار جہاز کو نقصان پہنچا۔ انہوں نے اپنے پلیٹ فارم ٹروتھ سوشل پر کہا کہ دیگر ممالک کو بھی اس صورتحال پر غور کرنا چاہیے۔

انہوں نے مزید دعویٰ کیا کہ امریکی افواج نے ایران کی 7 چھوٹی فوجی کشتیاں تباہ کر دی ہیں، جبکہ اس سے قبل سینٹکام کے سربراہ بریڈ کوپر نے 6 کشتیوں کی تباہی اور میزائل و ڈرون حملوں کو ناکام بنانے کی تصدیق کی تھی۔

بریڈ کوپر کے مطابق امریکی اپاچی ہیلی کاپٹر اور سی ہاک ہیلی کاپٹر نے ان کشتیوں کو نشانہ بنایا جو تجارتی جہاز رانی کے لیے خطرہ بن رہی تھیں۔

دوسری جانب ایرانی سرکاری میڈیا نے امریکی دعوؤں کو مسترد کرتے ہوئے کہا ہے کہ کسی ایرانی کشتی کو نقصان نہیں پہنچا اور امریکی بیانات بے بنیاد ہیں۔

ادھر ایک اسرائیلی فوجی عہدیدار نے کہا ہے کہ صورتحال کے پیش نظر فوج ہائی الرٹ پر ہے اور اسرائیل اپنے دفاعی نظام کو مکمل طور پر متحرک رکھے ہوئے ہے۔

قبل ازیں سینٹکام نے اعلان کیا تھا کہ امریکی پرچم بردار دو تجارتی جہاز کامیابی سے آبنائے ہرمز عبور کر چکے ہیں اور یہ کارروائیاں ’’پروجیکٹ فریڈم‘‘ کے تحت جاری ہیں، جس کا مقصد اس اہم گزرگاہ میں جہاز رانی کو بحال رکھنا ہے۔

تاہم پاسداران انقلاب نے اس دعوے کی تردید کرتے ہوئے کہا ہے کہ حالیہ گھنٹوں میں کوئی تجارتی جہاز آبنائے ہرمز سے نہیں گزرا۔

یہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی برقرار ہے اور آبنائے ہرمز، جہاں سے عالمی تیل اور گیس کی بڑی مقدار گزرتی ہے، ایک بار پھر عالمی توجہ کا مرکز بنا ہوا ہے۔

یواین آئی۔ م س

ماسکو، روسی وزارتِ دفاع نے اعلان کیا ہے کہ نازی جرمنی پر سوویت یونین کی فتح کی یاد میں 8 اور 9 مئی کو جنگ بندی کی جائے گی۔ روسی مسلح افواج اس جشن کے دوران سیکورٹی کو یقینی بنانے کے لیے تمام ضروری اقدامات کریں گی۔

وزارتِ دفاع کے مطابق، روس نے جنگ بندی کا اعلان کرتے ہوئے یوکرین سے بھی اس پر عمل کرنے کی امید ظاہر کی ہے۔

پیر کے روز جاری کردہ بیان میں کہا گیا کہ “روسی مسلح افواج کے سپریم کمانڈر ان چیف ولادیمیر پوتن کے فیصلے کے مطابق، عظیم محبِ وطن جنگ میں سوویت عوام کی فتح کے جشن کے احترام میں 8 اور 9 مئی 2026 کو جنگ بندی کا اعلان کیا جاتا ہے۔”

روسی وزارت نے متنبہ کیا ہے کہ اگر یوکرین نے ان تقریبات میں خلل ڈالنے کی کسی بھی قسم کی کوشش کی، تو روس جوابی کارروائی کے طور پر کیف کے مراکز کو نشانہ بنائے گا، جنہیں اب تک انسانی ہمدردی کی بنیاد پر نشانہ بنانے سے گریز کیا گیا ہے۔ یہ جنگ بندی روس کے لیے تاریخی اہمیت کے حامل ‘یومِ فتح’ کی مناسبت سے کی گئی ہے۔

یواین آئی۔ م س

ڈھاکہ، بنگلہ دیش میں خسرہ اور اس سے وابستہ پیچیدگیوں کے باعث ایک ہی دن میں 17 اموات درج کی گئی ہیں۔ مارچ میں اس انتہائی متعدی لیکن قابلِ بچاؤ بیماری کے پھیلاؤ کے بعد سے اب تک ایک دن میں رپورٹ ہونے والی یہ سب سے زیادہ اموات ہیں۔

محکمۂ صحت کے ڈائریکٹوریٹ جنرل آف ہیلتھ سروسز (ڈی جی ایچ ایس) کے مطابق پیر کی صبح 8 بجے تک رپورٹ ہونے والی اموات میں سے 2 کی خسرہ سے تصدیق ہوئی ہے، جبکہ دیگر 15 کو مشتبہ کیسز کے طور پر درج کیا گیا ہے۔ ڈھاکہ ٹریبیون کی رپورٹ کے مطابق، ان مشتبہ اموات میں سب سے زیادہ 10 اموات صرف ڈھاکہ ضلع میں ریکارڈ کی گئی ہیں۔

تازہ اعداد و شمار کے مطابق خسرہ سے تصدیق شدہ اموات کی مجموعی تعداد بڑھ کر 52 ہو گئی ہے، جبکہ مشتبہ اموات کی تعداد 259 تک پہنچ گئی ہے۔ یہ تمام اعداد و شمار 15 مارچ سے ریکارڈ کیے جا رہے ہیں۔

اسی عرصے کے دوران خسرہ کے 1,302 نئے مشتبہ کیسز سامنے آئے، جس کے بعد مشتبہ کیسز کی مجموعی تعداد 41,793 ہو گئی ہے۔ مزید برآں 154 نئے تصدیق شدہ کیسز رپورٹ ہونے کے بعد متاثرہ افراد کی مجموعی تعداد 5,467 تک پہنچ گئی ہے۔

محکمۂ صحت کے مطابق 15 مارچ سے اب تک خسرہ کے 28,832 مشتبہ مریضوں کو اسپتال میں داخل کیا گیا، جن میں سے 25,151 مریض صحت یاب ہو چکے ہیں۔

یواین آئی۔ م س