واشنگٹن، ڈونلڈ ٹرمپ نے کہا ہے کہ امریکہ کسی صورت ایران کو جوہری ہتھیار حاصل کرنے کی اجازت نہیں دے گا۔

وائٹ ہاؤس میں منعقدہ تقریب سے خطاب کرتے ہوئے امریکی صدر نے ایران کے حوالے سے سخت مؤقف اختیار کیا اور دعویٰ کیا کہ ایران کی فوجی طاقت کو بڑی حد تک نقصان پہنچایا جا چکا ہے۔

انہوں نے کہا کہ ایران کے پاس اب نہ مؤثر بحریہ رہی ہے، نہ فضائیہ اور نہ ہی جدید ریڈار سسٹم، جبکہ امریکا اس معاملے میں مؤثر پیش رفت کر رہا ہے۔

صدر ٹرمپ نے مزید دعویٰ کیا کہ سمندر میں 159 ایرانی جہاز ڈبو دیے گئے ہیں، تاہم انہوں نے یہ بھی واضح کیا کہ وہ ایران کے ساتھ جنگ کے حامی نہیں اور جنگوں کو پسند نہیں کرتے۔

ان کا کہنا تھا کہ ایران کو ایسے مسائل کا سامنا کرنا پڑے گا جن کا وہ تصور بھی نہیں کر سکتا، جبکہ انہوں نے امید ظاہر کی کہ تنازع کے خاتمے کے بعد تیل کی قیمتوں میں کمی آئے گی۔

چین کے حوالے سے گفتگو کرتے ہوئے انہوں نے شی جن پنگ سے ملاقات کی خواہش ظاہر کی اور اپنے ممکنہ دورہ چین کو اہم قرار دیا۔

داخلی امور پر بات کرتے ہوئے ٹرمپ نے امریکی سپریم کورٹ کے ٹیرف سے متعلق فیصلے کو تنقید کا نشانہ بنایا اور اسے غیر مؤثر قرار دیا، تاہم کہا کہ محصول بدستور وصول کیا جا رہا ہے۔

امریکی صدر ڈونلڈ ٹرمپ نے دعویٰ کیا ہے کہ امریکی فوج نے ایران کی سات چھوٹی جنگی کشتیاں تباہ کر دی ہیں۔ ان کے بقول یہ کشتیاں آبنائے ہرمز سے گزرنے والے تجارتی جہازوں کو نشانہ بنانے کی کوشش کر رہی تھیں۔ تاحال ایران کی جانب سے اس دعوے پر کوئی باضابطہ ردعمل سامنے نہیں آیا ہے۔

صدر ٹرمپ نے ایران کو سخت الفاظ میں خبردار کرتے ہوئے کہا کہ تہران کے پاس اب صرف دو ہی راستے بچے ہیں: یا تو وہ دیانتداری کے ساتھ نئے معاہدے کے لیے مذاکرات کی میز پر آئے۔ یا پھر مزید تباہ کن حملوں کا سامنا کرنے کے لیے تیار رہے۔

انہوں نے مزید دھمکی دیتے ہوئے کہا کہ اگر ایرانی افواج نے امریکی جہازوں کو نشانہ بنانے کی غلطی کی تو انہیں “روئے زمین سے مٹا دیا جائے گا”۔

یواین آئی۔ م س

تہران، ایران کے سرکاری میڈیا نے دعویٰ کیا ہے کہ آبنائے ہرمز میں امریکی فوج کی مبینہ کارروائی کے نتیجے میں 5 شہری جاں بحق ہو گئے ہیں۔

ایرانی خبر رساں اداروں کے مطابق یہ واقعہ اس وقت پیش آیا جب امریکہ کی جانب سے بحری آمد و رفت بحال کرنے کے لیے جاری آپریشن کے دوران ایرانی کشتیوں کو نشانہ بنایا گیا۔

رپورٹس میں کہا گیا ہے کہ جن کشتیوں پر حملہ کیا گیا وہ پاسداران انقلاب سے وابستہ نہیں تھیں بلکہ عام شہریوں کی کشتیاں تھیں، جو سامان اور مسافروں کو لے جا رہی تھیں۔

تسنیم نیوز ایجنسی کے مطابق ایک فوجی اہلکار نے بتایا کہ ابتدائی تحقیقات سے ظاہر ہوا ہے کہ امریکی افواج نے دو چھوٹی مال بردار کشتیوں پر فائرنگ کی، جو خصب سے ایرانی ساحل کی جانب جا رہی تھیں اور ان میں عام شہری سوار تھے۔

رپورٹس میں 5 افراد کے جاں بحق ہونے کی اطلاع دی گئی ہے، تاہم اس واقعے کی آزاد ذرائع سے تصدیق نہیں ہو سکی۔

یواین آئی۔ م س

تہران، عباس عراقچی نے کہا ہے کہ آبنائے ہرمز میں حالیہ کشیدگی نے ثابت کر دیا ہے کہ کسی بھی سیاسی بحران کا حل فوجی طاقت کے ذریعے ممکن نہیں۔ سماجی رابطے کی ویب سائٹ پر جاری اپنے بیان میں ایرانی وزیر خارجہ نے کہا کہ موجودہ صورتحال میں سفارتکاری ہی واحد مؤثر راستہ ہے۔

انہوں نے بتایا کہ پاکستان کی کوششوں کے باعث ایران اور امریکہ کے درمیان جاری بات چیت میں کچھ پیش رفت دیکھنے میں آ رہی ہے، اور پاکستان کا کردار اس حوالے سے اہم ہے۔

عباس عراقچی نے امریکہ کو خبردار کرتے ہوئے کہا کہ اسے ایسے عناصر سے محتاط رہنا چاہیے جو اسے کسی بڑے تنازع میں دھکیل سکتے ہیں۔

انہوں نے بالواسطہ طور پر خطے کے دیگر ممالک کا حوالہ دیتے ہوئے متحدہ عرب امارات کو بھی محتاط رہنے کا مشورہ دیا اور خطے میں کشیدگی کم کرنے کے لیے سفارتی کوششوں کو ترجیح دینے پر زور دیا۔

یواین آئی۔ م س