دفعہ370کی تنسیخ،مودی حکومت کا تاریخ ساز فیصلہ
جموں وکشمیر میں یکساں ترقی کا راستہ ہموار ہوا،شہریت ترمیمی قانون،ایودھیا مسئلے کا عدالتی فیصلہ تاریخی:کوند

سرینگر :صدر ہند رام ناتھ کوند نے دفعہ370 کی تنسیخ،شہریت ترمیمی قانون سے لیکر ایودھیا کے عدالتی فیصلے کو تاریخ ساز قرار دیتے ہوئے کہا ہے کہ نریندر امودی کی مرکزی حکومت کے فیصلے سے جموں وکشمیر اور لداخ میں یکساں تعمیر وترقی کا راستہ ہموار ہوا۔

انہوں نے کہا کہ ملک میں شہریت ترمیمی قانون نافذ کرنے سے آنجہانی ماتما گاندھی کی خواہش پوری ہوئی جبکہ احتجاج کے نام پر تشدد سے سماج اور ملک کمزور ہوتا ہے۔رام ناتھ کوند نے کہا کہ ایودھیا مسئلے پر عدالتی فیصلے کو ملکی عام عوام نے تسلیم کیا۔کشمیر نیوز سروس(کے این ایس) مانیٹر نگ ڈیسک کے مطابق صدر ہند رام ناتھ کوند کے خطاب سے پارلیمنٹ کو بجٹ اجلاس2020،جمعہ کو شروع ہوا۔صدر ہند نے دونوں ایوانوں کے مشترکہ اجلا س پار لیمنٹ کے مرکزی ہال (سینٹرل ہال) میں جمعہ کی صبح11بجے خطاب شروع کیا۔

تقریباً ڈیڑھ گھنٹے کے طویل ترین خطاب کے دوران صدر ہند رام ناتھ کوند نے نریندرا مودی حکومت کی کامیابی کی حصولیابی کا ذکر کرکے ملکی عوام پر زور دیا کہ وہ پُرتشدد مظاہروں سے دور رہیں۔ان کا کہناتھا کہ مودی حکومت کو نئے بھارت کی تعمیر کا منڈیٹ ملا ہے۔صدر ہند رام ناتھ کوند نے دفعہ370 کی تنسیخ،شہریت ترمیمی قانون سے لیکر ایودھیا کے عدالتی فیصلے کو تاریخ ساز قراردیا۔

دفعہ370کی تنسیخ:صدر ہند نے دفعہ 370اور35(اے) کی منسوخی کے پارلیمانی فیصلہ جات کو تاریخی ساز قرار دیا۔انہوں نے مودی حکومت کے فیصلے کی سراہنا کرتے ہوئے کہا ’دفعہ370اورآرٹیکل35اے کی منسوخی سے جموں وکشمیر اور لداخ میں یکساں تعمیر وترقی کیلئے راستہ ہموار ہوا۔جموں وکشمیر کی تقسیم وتشکیل نو کے فیصلے پر مزید بولتے ہوئے صدر ہند نے کہا ’آئین کی دفعہ370اور اسکی ذیلی شق35(اے) کو پارلیمنٹ کی دو۔تہائی اکثریت کیسا تھ منسوخ کرنا نہ صرف تاریخی ہے بلکہ اس فیصلے سے جموں وکشمیر اور لداخ میں یکساں ترقی کیلئے راستہ ہموار ہوا‘۔

شہریت تر میمی قانون:شہریت ترمیمی قانون پر بولتے ہوئے رام ناتھ کو ند نے کہا کہ آہین، پار لیمنٹ سے یہی توقع رکھتا ہے کہ وہ لوگوں کے جذبات، احساسات اور امیدوں کو پورا کر ے گا اور اُنکے لئے (عوام) ضروری قانون بھی بنایا گا جبکہ قومی مفاد کو سب سے بالاتر رکھے گا‘۔ ان کا کہناتھا ’میری حکومت کا یہ واضح موقف ہے کہ باہمی فیصلہ جات اور بحث جمہوریت کو مزید مضبوط بنائے گی۔انہوں نے کہا’وہیں اس بات کا بھی خیال رکھیں کہ احتجاج کے نام پر تشددسے سماج اور ملک کمزور ہوتا ہے‘۔

صدر ہند نے یہ بات ملک میں شہریت ترمیمی قانون کے خلاف جاری احتجاج کے پس ِ منظر میں کہی۔صدر ہند نے جب سی سی اے کو تاریخی قانون سے تعبیر کیا تو اپوزیشن نے ایوان میں صدر کے خطاب میں رخنہ ڈالتے ہوئے (شیم،شیم) یعنی شرمناک،شرمناک کے نعرے لگائے اور بینر وپلے کارڈزدکھائے۔تاہم صدر ہند نے اپوزیشن کے شو ر وشرابہ کے بیچ اپنا خطاب جاری رکھتے ہوئے کہا ’شہریت ترمیمی قانون کو نافذ کرنے سے حکومت نے مہاتما گاندھی کے خوابوں کو پایہ تکمیل تک پہنچایا ہے‘۔

انہوں نے کہا ’میں بہت خوش ہوں کہ بابائے قوم آنجہانی ماتما گاندھی کی خواہش یا خواب سی سی اے سے پورا ہوا،جسے جمہوریت کے مندر کے دونوں ایوانوں نے منظوری دی‘۔ان کا کہناتھا ’اس قانون کو ملک میں لاگو کرنے سے پاکستانی اقلیتوں کو انصاف ملے گا،جنہیں پاکستان میں ظلم کو نشانہ بنایا جارہا تھا اور وہ بھارت میں پناہ لینے پر مجبور ہوئے۔انہوں نے اپنے خطاب میں کہا کہ عالمی برادری کو پاکستاں میں اقلیتوں سے ہورہے غیر انسانی سلوک کا نوٹس لینا چاہئے۔

ایودھیا عدالتی فیصلہ کرتارپور راہداری:صدر ہند رام ناتھ کوند نے ایودھیا مسئلے کے عدالتی فیصلے کو بھی تاریخ ساز قرار دیتے ہوئے کہا ’بھارتی عوام نے اس فیصلے کو نہ صرف تسلیم کیا بلکہ بالغ نظریہ کا ثبوت پیش کیا۔رام ناتھ کوند نے کہا ’رام جنم بھومی پر عدالتی فیصلے کو جس طرح عوام نے تسلیم اور قبول کیا وہ قابل ستائش ہے‘۔انہوں نے ہند۔پاک کے در میان کرتار پور راہداری کھولنے کے فیصلے کو بھی مودی حکومت کی بڑی کامیابی سے تعبیر کیا۔ان کا کہناتھا کہ حکومت نے یہ گورو نانک دیو جی کے 550ویں پرکاش پارو کے موقع پر لیا۔

انہوں نے مزید کہا’ہندوستان واحد ملک ہے،جہاں حج عمل ڈیجٹل نظام کے تحت ہوتا ہے۔چیف آف ڈیفنس اسٹاف کی تقرری:صدر رام ناتھ کوند نے چیف آف ڈیفنس اسٹاف کی تقرری یا تعیناتی کے فیصلے پر بولتے ہوئے کہا ’اس عہدے کے قیام سے ہندوستان کی تین افواج کی شاخوں میں مطابقت یا متحدہ عمل پروان چڑھ جائیگا‘۔انہوں نے شدت پسندی کے خلاف حکومتی اقدامات کی بھی ستائش کرتے ہوئے کہا ’حکومت نے شدت پسندی سے نمٹنے کیلئے فورسز کے ہاتھ آزاد رکھے‘۔انہوں نے کہا کہ راجدھانی دہلی میں رہائش پذیر40لاکھ افراد کو مودی حکومت نے اونر شپ(مالکان مکان حقوق) دئے۔ان کا کہناتھا کہ 1731غیر قانونی کالونیوں کو دہلی میں قانونی قرار دیکر لوگوں کے خوابوں کو پورا کیا۔(کےاین ایس)