کورونا انفیکشن: سامنے آیا اب تک کا سب سے حیرت انگیز معاملہ، ڈاکٹر بھی انگشت بدنداں

Published

6 years ago

June 25, 2020

طبی افسران کا کہنا ہے کہ انھوں نے اس سے پہلے ایسا کوئی کیس نہیں دیکھا جس میں بچے کورونا انفیکشن کے ساتھ پیدا ہوئے ہیں جب کہ ان کے والدین میں کوئی انفیکشن نہیں۔

ہندوستان سمیت پوری دنیا کے لیے کورونا وائرس ایک بڑا چیلنج بن کر سامنے آیا ہے۔ اب تک اس کا علاج نہیں ڈھونڈا جا سکا ہے۔ اس درمیان کورونا کی نئی نئی علامتیں اور اس سے جڑے معاملے سامنے آ رہے ہیں۔ میکسیکو میں تو ایک ایسا حیران کرنے والا معاملہ سامنے آیا ہے جسے دیکھ کر ڈاکٹرس بھی انگشت بدنداں ہیں۔ دراصل ایک ساتھ پیدا ہوئے تین بچے کورونا انفیکشن سے متاثر پائے گئے ہیں اور معاملہ کچھ یوں ہے کہ ان کے والدین میں کورونا انفیکشن نہیں۔ ایسا پہلی بار سامنے آیا ہے کہ والدین کے کورونا پازیٹو نہ ہونے کے باوجود پیدا ہوئے ان کے بچے کورونا پازیٹو ہوں۔ میکسیکو کے طبی افسران اس بات کا پتہ لگانے میں مصروف ہو گئے ہیں کہ آخر ایسا کیوں کر ہوا۔

طبی افسران نے میڈیا کو بتایا کہ تین بچوں میں ایک لڑکی ہے اور دو لڑکے ہیں۔ پیدا ہونے کے چار گھنٹے بعد سان لوئس پوٹوسی میں ان کا کورونا وائرس ٹیسٹ کرایا گیا جہاں ان کی رپورٹ پازیٹو آئی ہے۔ طبی افسران کا کہنا ہے کہ وہ یہ دیکھ کر حیران ہیں کہ والدین پر کورونا انفیکشن کا اثر نہیں تھا لیکن نوزائیدہ بچے اس وائرس کی زد میں ہیں۔ افسران کا کہنا ہے کہ شروع میں انھیں لگا کہ ہو سکتا ہے بچوں کی ماں کورونا پازیٹو ہو اور ان سے کورونا بچوں میں پھیل گیا ہو۔ بچوں کی رپورٹ آنے کے بعد ماں باپ کا بھی ٹیسٹ کرایا گیا لیکن دونوں کی رپورٹ نگیٹو برآمد ہوئی۔

بچوں کی دیکھ بھال کرنے والے ڈاکٹر کا کہنا ہے کہ 17 جون کو پیدا ہوئے تینوں بچوں میں سے 2 پوری طرح صحت مند تھے اور ان میں کورونا کی علامت بھی دیکھنے کو نہیں مل رہی تھی جب کہ تیسرے بچے کو نمونیا کی شکایت تھی، لیکن وہ بھی اب ٹھیک ہے۔

میکسیکو کی ہیلتھ سکریٹری نے ایک کانفرنس کے دوران بتایا کہ والدین کی کورونا وائرس ٹیسٹ رپورٹ نگیٹو برآمد ہوئی ہے اور اب ہماری پوری توجہ یہ پتہ لگانے پر ہے کہ بچوں میں یہ انفیکشن کیسے ہوا۔ انھوں نے کہا کہ ہم نے ماہرین سے اس معاملہ کی جانچ کرنے کی اپیل کی ہے۔ انھوں نے کہا ہے کہ فی الحال تینوں بچے ڈاکٹروں کی نگرانی میں اسپتال میں ہیں۔
(قومی آواز)

Up Next

ہندوستان کو ہمیشہ چین کے ساتھ تعلقات پر نظر ثانی کرتے رہنا چاہیے: ماہرین

Don't Miss

کشمیر کےحالات پر او آئی سی کا اظہار تشویش، حقوق انسانی کے تحفظ کا مطالبہ

جموں و کشمیر

جموں و کشمیر ہائی کورٹ اسٹاف ویلفیئر ایسوسی ایشن کی نئی ایگزیکٹو کمیٹی کا اعلان

Published

9 hours ago

July 23, 2026

Online Desk

سرینگر، جموں و کشمیر اور لداخ ہائی کورٹ اسٹاف ویلفیئر ایسوسی ایشن نے اپنی نئی ایگزیکٹو کمیٹی تشکیل دی ہے۔ یہ نوٹی فکیشن ایسوسی ایشن کے صدر سید انور شاہین نے جنرل سکریٹری تپیشور کے مشورے سے جاری کیا، جس کا مقصد ایسوسی ایشن کو مضبوط بنانا اور جموں، سرینگر اور مین ونگ کے تمام اداروں میں ہائی کورٹ کے ملازمین کی بہبود کو فروغ دینا ہے۔

نئی تشکیل شدہ ایگزیکٹو کمیٹی میں مظفر احمد میر (سرینگر) اور سوربھ رینا(جموں) بطور نائب صدور شامل ہیں، جب کہ عزیر ناظر (سرینگر) اور شوکت علی (جموں) کو جوائنٹ سکریٹری نامزد کیا گیا ہے۔ الطاف حسین جنجوعہ(ٹرانسلیٹر، جموں) اور جاوید احمد میر بطور لیگل ایڈوائزر خدمات انجام دیں گے۔دیگر عہدیداران میں دلبیر سنگھ پٹھانیہ (جموں) اور سہیل احمد گنائی (سرینگر) کو خزانچی مقرر کیا گیا ہے، عامر خان کو آرگنائزر نامزد کیا گیا، رفیق احمد کو پبلسٹی سکریٹری اور نیاز احمد لون و نتیش سنگھ کو ترجمان مقرر کیا گیا ہے۔ایگزیکٹو کمیٹی میں انیس اراکین بھی شامل ہیں جو ہائی کورٹ کے مختلف کیڈرز اور ونگز کی نمائندگی کرتے ہیں۔ ان میں ریاض احمد بھٹ، جعفر احمد زہد، سندیپ شرما، جنید ایوب، وشال، مکیش بخشی، کنال شرما، شاکب شوکت، چنی لال، جتیندر سنگھ، وشو ورما، پروین کمار، سہیل احمد ڈار، محمد رفیق بانی، رضوان، ملک عباس شمیم، ریاض احمد حجام، فیاض احمد کمار اور وپن چندر پال شامل ہیں۔ایسوسی ایشن نے اعتماد کا اظہار کیا کہ نئی تشکیل شدہ ایگزیکٹو کمیٹی ہائی کورٹ کے ملازمین کے مفادات اور فلاح و بہبود کے تحفظ، ہائی کورٹ کے تمام ونگز کے درمیان عملے میں ہم آہنگی کو مضبوط بنانے، اور اپنے اراکین کی پیشہ ورانہ اور سماجی بہبود کے لیے اقدامات کرنے کے لیے لگن کے ساتھ کام کرے گی۔ ایسوسی ایشن نے امید ظاہر کی کہ نئی ٹیم ہائی کورٹ آف جموں و کشمیر اور لداخ کے ملازمین کے درمیان اتحاد، تعاون اور خدمت کے جذبے کو برقرار رکھتی رہے گی۔

یو این آئی۔ م س۔ م الف

دنیا

’ایران کی توانائی تنصیبات پر حملہ ہوا تو‘ پاسداران انقلاب کی امریکہ اور اتحادیوں کو دھمکی

Published

9 hours ago

July 23, 2026

Online Desk

تہر ان، ایرانی پاسدارانِ انقلاب کی ایرو اسپیس فورس کے کمانڈر بریگیڈیئر جنرل سید مجید موسوی نے امریکہ اور اس کے اتحادی کو خبردار کردیا۔

ایرانی پاسدارانِ انقلاب کی ایرو اسپیس فورس کے کمانڈر بریگیڈیئر جنرل سید مجید موسوی نے خبردار کیا ہے کہ ایران کی توانائی کی بنیادی تنصیبات پر کسی بھی حملے کی صورت میں خطے میں فوری اور سخت جوابی کارروائی کی جائے گی۔

سماجی رابطے کی سائٹ ‘ایکس’ پر اپنے ایک پیغام میں بریگیڈیئر جنرل سید مجید موسوی نے لکھا کہ اگر ایران کے پلوں اور بجلی گھروں کو نشانہ بنایا گیا تو اس کے نتیجے میں خطے میں موجود امریکی فوج کے اتحادیوں اور میزبان ممالک میں بجلی کی بندش یقینی ہوگی۔انہوں نے واضح کیا کہ ایران اپنی تنصیبات کے خلاف کسی بھی قسم کی کارروائی کا فوری اور دندان شکن جواب دے گا۔

ایرانی کمانڈر کا یہ سخت بیان امریکی صدر ڈونلڈ ٹرمپ کے اس انتباہ کے بعد سامنے آیا ہے، جس میں انہوں نے کہا تھا کہ اگر ایران نے آبنائے ہرمز سے گزرنے والے کسی بھی جہاز کو نشانہ بنایا تو امریکہ اس کے جواب میں ایران کا ایک پل یا ایک پاور پلانٹ تباہ کر دے گا۔

واضح رہے کہ امریکی صدر ڈونلڈ ٹرمپ نے امریکی فوج کو ایران پر جہنم کے دروازے کھولنے کا حکم دیا۔ رپورٹ کے مطابق امریکی صدر ٹرمپ نے 3 روز قبل سینٹکام کو حکم جاری کیا، امریکی صدر نے تین روز پہلے کا بیان سوشل میڈیا اکاؤنٹ پر آج دوبارہ جاری کیا۔

امریکی صدر ڈونلڈ ٹرمپ نے دھمکی دیتے ہوئےکہا ہے کہ ایران کو بڑی قیمت ادا کرنا پڑے گی، انہیں تباہ کیا جا رہا ہے، حملے جاری رہیں گے۔

یو این آئی۔ ع ا۔

دنیا

ہرمز سے گزرتے ایک جہاز میں آگ لگ گئی، دو مڑگئے، پاسداران

Published

9 hours ago

July 23, 2026

Online Desk

تہران، ایرانی پاسدارانِ انقلاب نے کہا ہے کہ آبنائے ہرمز کے جنوب میں بارودی سرنگوں والے راستے سے گزرنے کی کوشش کے دوران تین میں سے ایک آئل ٹینکر میں دھماکے کے بعد آگ لگ گئی، جبکہ دیگر دو ٹینکر واپس مڑ گئے۔

پاسدارانِ انقلاب کا کہنا ہے کہ آبنائے ہرمز ایران کے کنٹرول میں ہے اور خطے میں امریکی سرگرمیوں کے باعث اسے مکمل طور پر بند کر دیا گیا ہے۔

ایرانی پاسدارانِ انقلاب نے خبردار کیا کہ ایران کی مرضی کے بغیر کسی بھی ٹینکر کو داخل ہونے یا وہاں سے گزرنے کی اجازت نہیں۔

یو این آئی۔ ع ا۔