بیجنگ،ایرانی وزیرِ خارجہ عباس عراقچی دورہ چین پر بیجنگ میں موجود ہیں، ایرانی وزیرخارجہ کی چینی ہم منصب سے ملاقات ہوئی ہے۔

غیر ملکی ذرائع ابلاغ کے مطابق ایرانی وزیرِ خارجہ عباس عراقچی نے ملاقات میں چینی وزیر خارجہ وانگ یی سے خطے کی تازہ صورتحال، علاقائی و بین الاقوامی پیش رفت اور دو طرفہ تعلقات پر اہم گفتگو کی۔

چینی وزیر خارجہ وانگ ای کا کہنا تھا کہ ایران کے خلاف امریکہ اور اسرائیل کی جنگ ناجائز ہے۔ مکمل جنگ بندی کا قیام ضروری ہے۔

عباس عراقچی ایرانی وزیر خارجہ کا کہنا ہے ایران صرف ایک منصفانہ اور جامع معاہدے کو قبول کرے گا، انہوں نے مزید کہا کہ چین ایران کا قریبی دوست ہے، موجودہ حالات میں دونوں ممالک کے درمیان تعاون ماضی کی نسبت زیادہ مضبوط ہو گا۔

یو این آئی۔ ع ا۔

ویٹیکن سٹی، پوپ لیو نے کہا ہے کہ وہ امن کے بارے میں گفتگو کر کے مسیحیت کے پیغام کو عام کرنا چاہتے ہیں۔

کیتھولک مسیحیوں کے مذہبی پیشوا پوپ لیو نے کہا ہے کہ وہ امن کے بارے میں گفتگو کر کے مسیحیت کے پیغام کو عام کرنا چاہتے ہیں، تاہم لوگ ان پر تنقید کرنے کے لیے مکمل آزاد ہیں۔

امریکی صدر ڈونلڈ ٹرمپ کی جانب سے کی جانے والی حالیہ تنقید کے جواب میں پوپ فرانسس کا کہنا تھا کہ کلیسا کا اصل مقصد انجیل کی تعلیمات اور امن کی تبلیغ ہے۔ انہوں نے واضح کیا کہ اگر انجیل کی تبلیغ کی بنیاد پر کوئی ان پر تنقید کرنا چاہتا ہے تو وہ اس کا حق رکھتا ہے، لیکن ساتھ ہی انہوں نے امید ظاہر کی کہ ان کا موقف بھی توجہ سے سنا جائے گا۔

پوپ نے اپنے پیغام میں اس بات پر زور دیا کہ ان کی تمام تر کوششوں کا محور مکالمے کے ذریعے امن کا قیام ہے، مگر وہ اختلاف رائے رکھنے والوں کی آزادی کا احترام کرتے ہیں۔

یو این آئی۔ ع ا۔

تہران، ایران نے ایک بار پھر پر امن ایٹمی پروگرام جاری رکھنے کا اعلان کیا ہے۔

ایرانی میڈیا کے مطابق صدر مسعود پزشکیان نے واضح کیا ہے کہ ایران عالمی قوانین کے تحت پر امن ایٹمی پروگرام جاری رکھے گا۔ یہ بیان عراق کے نامزد وزیر اعظم علی الزیدی سے ان کی ٹیلیفونک گفتگو کے دوران سامنے آیا۔

ایرانی صدر مسعود پزشکیان نے دو ٹوک مؤقف بیان کرتے ہوئے کہا ایران مذاکرات میں چاہتا تھا کہ عالمی قوانین کے تحت اس کا ایٹمی پروگرام جاری رہے، ہر چیز پر قبضے کی بجائے ایرانی عوام کے حقوق کا احترام کیا جائے۔ انھوں نے کہا امریکی مطالبات کو یک طرفہ طور پر تسلیم کرنے کا معاہدہ ناممکن ہے، ایک طرف امریکہ ایران پر شدید دباؤ کی پالیسی پر چل رہا ہے، دوسری طرف مذاکرات چاہتا ہے، دھمکیوں کے سائے میں گفتگو نہیں کی جائے گی۔

مسعود پزشکیان نے کہا امریکہ کہتا ہے کہ ایران کو ایٹمی طاقت نہیں بننے دیں گے، لیکن دوسری طرف رہبر انقلاب نے واضح اور دو ٹوک ایٹم بم کا شرعی فتویٰ دیا تھا، پھر بھی انھیں شہید کر دیا۔

ادھر امریکی صدر ڈونلڈ ٹرمپ نے ایک بار پھر دعویٰ کیا ہے کہ ایران کے پاس اب کوئی چانس نہیں، ایرانی نیوی کے تمام جہازوں کو ڈبو دیا ہے، اس کے پاس ایٹم بم ہوتا تو ہم آج یہاں نہ ہوتے، مشرق وسطیٰ اور اسرائیل ختم ہو جاتے، ایران کو ایٹمی ہتھیار رکھنے کی اجازت نہیں دے سکتے۔

یو این آئی۔ ع ا۔