ڈھاکہ، بنگلہ دیش میں خسرہ اور اس سے وابستہ پیچیدگیوں کے باعث ایک ہی دن میں 17 اموات درج کی گئی ہیں۔ مارچ میں اس انتہائی متعدی لیکن قابلِ بچاؤ بیماری کے پھیلاؤ کے بعد سے اب تک ایک دن میں رپورٹ ہونے والی یہ سب سے زیادہ اموات ہیں۔

محکمۂ صحت کے ڈائریکٹوریٹ جنرل آف ہیلتھ سروسز (ڈی جی ایچ ایس) کے مطابق پیر کی صبح 8 بجے تک رپورٹ ہونے والی اموات میں سے 2 کی خسرہ سے تصدیق ہوئی ہے، جبکہ دیگر 15 کو مشتبہ کیسز کے طور پر درج کیا گیا ہے۔ ڈھاکہ ٹریبیون کی رپورٹ کے مطابق، ان مشتبہ اموات میں سب سے زیادہ 10 اموات صرف ڈھاکہ ضلع میں ریکارڈ کی گئی ہیں۔

تازہ اعداد و شمار کے مطابق خسرہ سے تصدیق شدہ اموات کی مجموعی تعداد بڑھ کر 52 ہو گئی ہے، جبکہ مشتبہ اموات کی تعداد 259 تک پہنچ گئی ہے۔ یہ تمام اعداد و شمار 15 مارچ سے ریکارڈ کیے جا رہے ہیں۔

اسی عرصے کے دوران خسرہ کے 1,302 نئے مشتبہ کیسز سامنے آئے، جس کے بعد مشتبہ کیسز کی مجموعی تعداد 41,793 ہو گئی ہے۔ مزید برآں 154 نئے تصدیق شدہ کیسز رپورٹ ہونے کے بعد متاثرہ افراد کی مجموعی تعداد 5,467 تک پہنچ گئی ہے۔

محکمۂ صحت کے مطابق 15 مارچ سے اب تک خسرہ کے 28,832 مشتبہ مریضوں کو اسپتال میں داخل کیا گیا، جن میں سے 25,151 مریض صحت یاب ہو چکے ہیں۔

یواین آئی۔ م س

واشنگٹن، ڈونلڈ ٹرمپ نے کہا ہے کہ امریکہ کسی صورت ایران کو جوہری ہتھیار حاصل کرنے کی اجازت نہیں دے گا۔

وائٹ ہاؤس میں منعقدہ تقریب سے خطاب کرتے ہوئے امریکی صدر نے ایران کے حوالے سے سخت مؤقف اختیار کیا اور دعویٰ کیا کہ ایران کی فوجی طاقت کو بڑی حد تک نقصان پہنچایا جا چکا ہے۔

انہوں نے کہا کہ ایران کے پاس اب نہ مؤثر بحریہ رہی ہے، نہ فضائیہ اور نہ ہی جدید ریڈار سسٹم، جبکہ امریکا اس معاملے میں مؤثر پیش رفت کر رہا ہے۔

صدر ٹرمپ نے مزید دعویٰ کیا کہ سمندر میں 159 ایرانی جہاز ڈبو دیے گئے ہیں، تاہم انہوں نے یہ بھی واضح کیا کہ وہ ایران کے ساتھ جنگ کے حامی نہیں اور جنگوں کو پسند نہیں کرتے۔

ان کا کہنا تھا کہ ایران کو ایسے مسائل کا سامنا کرنا پڑے گا جن کا وہ تصور بھی نہیں کر سکتا، جبکہ انہوں نے امید ظاہر کی کہ تنازع کے خاتمے کے بعد تیل کی قیمتوں میں کمی آئے گی۔

چین کے حوالے سے گفتگو کرتے ہوئے انہوں نے شی جن پنگ سے ملاقات کی خواہش ظاہر کی اور اپنے ممکنہ دورہ چین کو اہم قرار دیا۔

داخلی امور پر بات کرتے ہوئے ٹرمپ نے امریکی سپریم کورٹ کے ٹیرف سے متعلق فیصلے کو تنقید کا نشانہ بنایا اور اسے غیر مؤثر قرار دیا، تاہم کہا کہ محصول بدستور وصول کیا جا رہا ہے۔

امریکی صدر ڈونلڈ ٹرمپ نے دعویٰ کیا ہے کہ امریکی فوج نے ایران کی سات چھوٹی جنگی کشتیاں تباہ کر دی ہیں۔ ان کے بقول یہ کشتیاں آبنائے ہرمز سے گزرنے والے تجارتی جہازوں کو نشانہ بنانے کی کوشش کر رہی تھیں۔ تاحال ایران کی جانب سے اس دعوے پر کوئی باضابطہ ردعمل سامنے نہیں آیا ہے۔

صدر ٹرمپ نے ایران کو سخت الفاظ میں خبردار کرتے ہوئے کہا کہ تہران کے پاس اب صرف دو ہی راستے بچے ہیں: یا تو وہ دیانتداری کے ساتھ نئے معاہدے کے لیے مذاکرات کی میز پر آئے۔ یا پھر مزید تباہ کن حملوں کا سامنا کرنے کے لیے تیار رہے۔

انہوں نے مزید دھمکی دیتے ہوئے کہا کہ اگر ایرانی افواج نے امریکی جہازوں کو نشانہ بنانے کی غلطی کی تو انہیں “روئے زمین سے مٹا دیا جائے گا”۔

یواین آئی۔ م س

تہران، ایران کے سرکاری میڈیا نے دعویٰ کیا ہے کہ آبنائے ہرمز میں امریکی فوج کی مبینہ کارروائی کے نتیجے میں 5 شہری جاں بحق ہو گئے ہیں۔

ایرانی خبر رساں اداروں کے مطابق یہ واقعہ اس وقت پیش آیا جب امریکہ کی جانب سے بحری آمد و رفت بحال کرنے کے لیے جاری آپریشن کے دوران ایرانی کشتیوں کو نشانہ بنایا گیا۔

رپورٹس میں کہا گیا ہے کہ جن کشتیوں پر حملہ کیا گیا وہ پاسداران انقلاب سے وابستہ نہیں تھیں بلکہ عام شہریوں کی کشتیاں تھیں، جو سامان اور مسافروں کو لے جا رہی تھیں۔

تسنیم نیوز ایجنسی کے مطابق ایک فوجی اہلکار نے بتایا کہ ابتدائی تحقیقات سے ظاہر ہوا ہے کہ امریکی افواج نے دو چھوٹی مال بردار کشتیوں پر فائرنگ کی، جو خصب سے ایرانی ساحل کی جانب جا رہی تھیں اور ان میں عام شہری سوار تھے۔

رپورٹس میں 5 افراد کے جاں بحق ہونے کی اطلاع دی گئی ہے، تاہم اس واقعے کی آزاد ذرائع سے تصدیق نہیں ہو سکی۔

یواین آئی۔ م س