جموں وکشمیر میں علیحدہ وارڈ قائم،خصوصی طبی ٹیمیں تشکیل
چین میں مرنے والوں کی تعداد170ہوگئی،ہندوستان،پاکستان تاحال محفوظ

سرینگر: چین کے شہر ووہان سے شروع ہونے والا ’کورو نا وائرس‘ چین کے دوسرے شہروں کے علاوہ فضائی سفر کرنے والوں کی بدولت دنیا بھر میں پھیل چکا ہے،جس نے پوری دنیا کو اضطراب اور تشویش میں مبتلاء کیا۔جموں وکشمیر کی انتظامیہ نے ’کورو نا وائر س‘ کے پھیلتے خطرات کے پیش نظر کسی بھی ہنگامی صورتحال سے نمٹنے جموں اور کشمیر کے3 بڑے اسپتالوں میں علیحدہ وارڈ قائم کئے جبکہ اس ضمن میں خصوصی طبی ٹیمیں بھی تشکیل دی۔

اس دوران چین میں مرنے والوں کی تعداد170ہوگئی۔اس دوران عالمی ادارہ صحت (ڈبلیو ایچ او) نے ناول کورونا وائرس کی وبا کے صحت عامہ کی عالمی ہنگامی صورتحال کے تعین کے لیے ایمرجنسی کمیٹی کا اجلاس طلب کرلیا۔کشمیر نیوز سروس(کے این ایس) کے مطابق ’کورو نا وائرس‘ نے جہاں پوری دنیا کو فکر وتشویش میں مبتلاء کیا ہے،وہیں لیفٹیننٹ گور نر گریش چندر مرمو کی سربراہی والی جموں وکشمیر انتظامیہ بھی کافی فکر مند نظر آرہی ہے۔چین،نیپال اور دیگر ممالک سے آنے والے مسافروں کی طبی معائینہ کے بعد انتظامیہ نے کسی بھی ہنگامی صورتحال سے نمٹنے کیلئے جموں اور کشمیر میں کورونا وائرس کے خطرات کے پیش نظر علیحدہ وارڈ قائم کرنے کیساتھ ساتھ خصوصی طبی ٹیمیں بھی تشکیل دی گئیں۔

حکام کے مطابق کسی بھی طبی چیلنجز سے نمٹنے کیلئے احتیاطی اقدامات اٹھائے جارہے ہیں۔ایک اعلیٰ افسر نے بتایا کہ کورو نا وائر س کی روکتھام کیلئے طبی منصوبہ ترتیب دیا گیا۔جموں وکشمیر کی انتظامیہ نے ایک آرڈر جاری کیا ہے،جس کے تحت مشکوک مریضوں کیلئے ’اسٹیٹ سر ولنس آفس‘ میں کنٹرول قائم کرنے کی ہدایت دی گئی۔علاوہ ازیں سبھی اضلاع کیلئے ایڈوائزی جاری کی گئی جبکہ ریلوے اسٹیشنز اور ائرپورٹس پر اعلان کرنے کی بھی ہدایت دی گئی۔ معلوم ہوا ہے کہ اس کے ساتھ ساتھ کورو نا وائر کے خطرات کے پیش نظر جموں وکشمیر اور سرینگر کے گور نمنٹ میڈیکل کالجوں واسپتالوں اور شیر کشمیر انسٹی چیوٹ آف میڈیکل سائنس (سکمز) صورہ میں اور دیگر اضلاع میں علیحدہ وارڈ قائم کئے گئے ہیں۔

معلوم ہوا ہے کہ کسی بھی ہنگامی صورتحال سے نمٹنے کیلئے طبی اور نیم طبی عملے کی خصوصی ٹیمیں بھی تشکیل دی گئیں۔ حکام نے بتایا کہ مشکوک طبی کیسوں میں فوری طور پر خون کے نمونے حاصل کئے جائیں گے اور طبی جانچ کے لئے ہنگامی بنیادوں پر ’نیشنل انسٹی چیوٹ آف بائیو لاجیکلز‘ پونے بھیج دیا جائیگا۔یاد رہے کہ چین کے صوبہ حبئی میں 32کشمیری طلبہ ہیں،جنکی واپسی کیلئے وزیر اعظم،وزیر خارجہ اور دیگر مرکزی حکام کو آگاہ کیا گیا ہے۔عالمی ادارہ صحت کی تشویش:عالمی ادارہ صحت (ڈبلیو ایچ او) نے ناول کورونا وائرس کی وبا کے صحت عامہ کی عالمی ہنگامی صورتحال کے تعین کے لیے ایمرجنسی کمیٹی کا اجلاس طلب کرلیا۔میڈیا رپورٹ کے مطابق عالمی ادارہ صحت کے ڈائریکٹر جنرل ڈاکٹر ٹیڈروس آڈھانوم غیبریسوس نے جینیوا سے آن لائن نیوز کانفرنس کرتے ہوئے کہا کہ ’چین میں اور عالمی سطح پر اس وائرس کے پھیلاؤ کو روکنا ڈبلیو ایچ او کی اولین ترجیح ہے‘۔

انہوں نے کہا کہ ’ہم ہر دن کے ہر لمحے کی صورتحال کی نگرانی کررہے ہیں‘۔ایمرجنسی کمیٹی اس بحران سے نمٹنے کے طریقوں پر سفارشات بھی پیش کرے گی۔گزشتہ ہفتے عالمی اداری صحت کی کمیٹی نے2 روز جاری رہنے والی ملاقات میں فیصلہ کیا تھا کہ چونکہ وائرس چین میں ایک شدید تشویش کا باعث ہے لہٰذا یہ اب تک عالمی ایمرجنسی نہیں تھا۔اس وقت مذکورہ معاملے پر ووٹ تقریباً تقسیم تھا اور آج ہونے والے اجلاس میں یہ تعین کیا جائے گا کہ وائرس اب ایمرجنسی ہے یا نہیں۔عالمی ادارہ صحت کے ایمرجنسی ڈیزیز یونٹ کی سربراہ ڈاکٹر ماریہ وان کیرکہو نے تمام اقوام کو خوف و ہراس سے بچنے اور بیماری پر قابو پانے پر توجہ مرکوز کرنے کا مشورہ دیا۔چین میں کرونا وائرس سے ہلاکتوں کی تعداد 170 ہوگئی:چین میں پھیلنے والے نئے وائرس سے ہلاکتوں کی تعداد170 ہوگئی جبکہ عالمی صحت حکام نے وائرس کے چین سے باہر منتقل ہونے پر تشویش کا اظہار کیا ہے اور خطے سے نکالے گئے غیر ملکیوں کی کڑی نگرانی کی جارہی ہے۔

عالمی خبر رساں ادارے اے پی کی رپورٹ کے مطابق گزشتہ 24 گھنٹوں میں وائرس سے ہلاکتوں کی تعداد 38 ہوگئی جبکہ 1ہزار737 نئے کیسز سامنے آئے جس کے بعد کل کیسز کی تعداد 7 ہزار711 ہوگئی۔ان نئی ہلاکتوں میں سے 37 وائرس کے پھیلنے کے مقام، صوبہ ہوبے میں ہوئیں جبکہ جنوب مغربی صوبے سی چوان میں ایک شخص ہلاک ہوا۔دنیا میں ہلچل:ہوبے کے 1 کروڑ 10لاکھ کی آبادی والے شہر ووہان سے195 امریکیوں کو واپس بلالیا گئے، جہاں اس وائرس کا جنم ہوا۔نکالے گئے تمام امریکیوں کو کیلیفورنیا کے جنوبی حصے میں قائم فوجی اڈے میں 3 روز تک نگرانی کیلئے رکھا گیا ہے تاکہ دیکھا جاسکے کہ کہیں وہ وائرس سے متاثر تو نہیں ہوئے۔جاپانی وزارت خارجہ کے مطابق ووہان سے 210 جاپانیوں کا ایک گروہ ٹوکیو کے ہانیڈا ایئرپورٹ پر حکومت کے چارٹرڈ طیارے میں اترا۔رپورٹس کے مطابق ان میں سے 9 میں زکام اور بخار کی علامات سامنے آئیں۔فرانس، نیوزی لینڈ، آسٹریلیا، سنگاپور اور دیگر ممالک بھی اپنے شہریوں کو نکالنے کا منصوبہ بنارہے ہیں۔ہندوستان اور پاکستان تاحال اس وائر س سے محفوظ ہے،ایسا حکام یا سرکاری اداروں کا دعویٰ ہے۔

چین کیا اقدامات کیا کررہا ہے:چینی خبر رساں ادارے کی رپورٹ کے مطابق ’متاثرہ علاقوں میں غذا اور روز مرہ کی ضروریات کی قلت کو پورا کرنے کے لیے حکام اقدامات تیز کر رہے ہیں تاکہ سامان کی مسلسل فراہمی اور قیمتیں مستحکم رکھی جاسکیں‘۔انہوں نے کہا ’وزارت کامرس کے ڈیٹا میں بتایا گیا کہ ووہان میں موجودہ ذخائر15 روز تک باحفاظت چاول اور تیل کی فراہمی کو یقینی بناسکتے ہیں جبکہ پورک اور انڈے10 روز اور سبزیاں 5 روز تک فراہم کی جاسکتی ہیں‘۔حکومت نے کوئی تخمینہ ظاہر نہیں کیا کہ کب وہ اس وبا کو روک سکیں گے، تاہم چند ماہرین کا ماننا ہے کہ یہ وائرس 2 ہفتوں میں عروج پر پہنچ جائے گی۔

کورونا وائرس ہے کیا؟:کورونا وائرس ایک عام وائرس ہے جو عموماً میملز (وہ جاندار جو اپنے بچوں کو دودھ پلاتے ہیں) پر مختلف انداز سے اثر انداز ہوتا ہے۔عموماً گائے، خنزیر اور پرندوں میں نظام انہضام کو متاثر کر کے ڈائیریا یا سانس لینے میں رکاوٹ پیدا کرتا ہے جبکہ انسانوں میں اس سے صرف نظام تنفس ہی متاثر ہوتا ہے۔سانس لینے میں تکلیف اور گلے میں شدید سوزش یا خارش کی شکایت ہوتی ہے مگر اس وائرس کی زیادہ تر اقسام مہلک نہیں ہوتیں اور ایشیائی و یورپی ممالک میں تقریباً ہر شہری زندگی میں ایک دفعہ اس وائرس کا شکار ضرور ہوتا ہے۔کورونا وائرس کی زیادہ تر اقسام زیادہ مہلک نہیں ہوتیں اگرچہ اس کے علاج کے لیے کوئی مخصوص ویکسین یا دوا دستیاب نہیں ہے مگر اس سے اموات کی شرح اب تک بہت کم تھی اور مناسب حفاظتی تدابیر کے ذریعے اس کے پھیلاؤ کو کنٹرول کر لیا جاتا تھا۔مگر سال 2020 کے اوائل میں ورلڈ ہیلتھ آرگنائزیشن نے چین میں اس وائرس کی ایک نئی مہلک قسم دریافت کی جسے نوول کورونا وائرس یا این کوو کا نام دیا گیا۔

عام طور پر یہ وائرس اس سے متاثرہ شخص کے ساتھ ہاتھ ملانے یا اسے چھونے، جسم کے ساتھ مس ہونے سے دوسرے لوگوں میں منتقل ہوتا ہے، اس کے ساتھ ہی وہ علاقے جہاں یہ وبا پھوٹی ہوئی ہو وہاں رہائشی علاقوں میں در و دیوار، فرش یا فرنیچر وغیرہ کو چھونے سے بھی وائرس کی منتقلی کے امکانات ہوتے ہیں۔یہی وجہ ہے کہ چین کو اس وقت دوہری پریشانی کا سامنا ہے کیونکہ ووہان اور ہوبے گنجان ترین آبادی والے علاقے ہیں اور اتنی بڑی تعداد کو کسی اور جگہ منتقل کرنا ممکن نہیں بلکہ اس سے مرض اور پھیل جانے کے امکانات کو رد نہیں کیا جاسکتا۔(کے این ایس)