نئی دہلی، ہندوستان کی معروف ایئر لائن، انڈیگو نے جمعرات کو ممبئی اور گجرات کے جام نگر کے درمیان براہ راست پرواز شروع کی ہے اس کے ساتھ ہی انڈیگو اب گجرات کے چھ شہروں میں کے لیے اب انڈیگو کی سروس دستیاب ہوگی احمد آباد، بڑودہ، سورت، راجکوٹ اور بھاو نگر کو وہ پہلے ہی ممبئی سے جوڑتی ہے۔ کمپنی اس روٹ پر اے320 طیارے کا آپریشن کررہی ہے۔

ایئر لائن کی طرف سے آج جاری کردہ ایک پریس ریلیز میں کہا گیا ہے کہ وہ گجرات میں بڑھتی ہوئی سفری مانگ کی حمایت کرتی رہی ہے، جو ریاست کی مضبوط صنعتی بنیاد، تجارتی تعلقات اور عالمی تارکین وطن برادری کی وجہ سے بڑھ رہی ہے۔

ایئر لائن ریاست سے فی ہفتہ 700 سے زیادہ پروازیں چلاتی ہے، جو 30 سے زیادہ گھریلو مقامات کو براہ راست رابطہ فراہم کرتی ہے نیز سنگاپور، بنکاک، نیروبی، شنگھائی اور لندن سمیت 40 سے زیادہ بین الاقوامی شہروں کے لیے آسان ون اسٹاپ کنکشن بھی فراہم کراتی ہے۔

اس نے کہا کہ اس کے نیٹ ورک میں جام نگر کا اہم کردار ہے، جہاں منظم بندرگاہ اور توانائی، پیٹرو کیمیکل اور مینوفیکچرنگ صنعتیں ہیں۔ یہ نئی سروس جام نگر اور ممبئی کے درمیان رابطے کو مضبوط کرتی ہے۔

مسافر انڈیگو کی آفیشل ویب سائٹ، موبائل ایپ، یا مجاز ٹریول پارٹنرز کے ذریعے ٹکٹ بک کرا سکتے ہیں۔

یواین آئی۔الف الف

واشنگٹن، امریکی وزیر خزانہ اسکاٹ بیسنٹ نے دعویٰ کیا ہےکہ کئی خلیجی اتحادیوں نے کرنسی سواپ کی سہولت کے لیے درخواست کی ہے امریکی میڈیا کے مطابق امریکی سینیٹ کی سماعت میں بیان دیتے ہوئے اسکاٹ بیسنٹ نے کہا کہ کرنسی سواپ کی درخواست کرنے والوں میں متحدہ عرب امارات بھی شامل ہے انہوں نے کہا کہ کرنسی سواپ کا مقصد امریکا میں اتحادی ممالک کے اثاثوں کی بے ہنگم فروخت روکنا بھی ہوتا ہے، کرنسی سواپ معاہدے کے تحت امریکا کسی ملک کو عارضی طور پر ڈالر فراہم کرتا ہے۔

امریکی وزیر خزانہ کاکہنا تھا کہ ڈالر کے بدلے میں امریکا اس ملک کی کرنسی لیتا ہے، تاکہ مالیاتی نظام مستحکم رہے۔

یو این آئی۔ ع ا

نیویارک ، امریکی فیشن ڈیزائنر ایلیسا پوپلاسکی خود کو بڑی سوشل میڈیا انفلوئنسر تو نہیں سمجھتیں، لیکن سوشل میڈیا سے ان کی آمدنی حیران کن حد تک قابل ذکر ہے ایک اعلیٰ ترین فیشن برانڈ کے لیے 32 سالہ تکنیکی ڈیزائنر کے ٹک ٹاک پر زیادہ سے زیادہ 8 ہزار فالوورز ہیں، جہاں وہ اپنی روزمرہ زندگی سے متعلق ویڈیوز شیئر کرتی ہیں یہاں قابل ذکر بات یہ ہے کہ فالوورز کی چند ہزار کی محدود تعداد کے باوجود انہوں نے مالی طور پر آن لائن نمایاں کامیابی حاصل کی ہے۔ رواں سال کے پہلے تین ماہ میں وہ برانڈ پارٹنرشپس، افیلی ایٹ لنکس اور ایمازون کمشنز کے ذریعے ٹیکس سے قبل 4 ہزار 355 ڈالر کماچکی ہیں۔

رپورٹ کے مطابق نومبر میں انہیں ایک بیوٹی برانڈ کی جانب سے چار ہندسوں پر مشتمل معاوضے کی پیشکش موصول ہوئی، جسے ابتدا میں انہوں نے جعلی سمجھا۔ بعد ازاں انہیں ایک 30 سیکنڈ کی ویڈیو کے عوض ایک ہزار 500 ڈالر ادا کیے گئے، جسے انہوں نے انسٹاگرام پر بھی شیئر کیا جہاں ان کے 4 ہزار فالوورز ہیں۔ پاپلاسکی کا سوشل میڈیا پر آنے کا مقصد پیسہ کمانا نہیں بلکہ محض ایک مشغلہ تھا، وہ ایک مختلف تخلیقی پلیٹ فارم کی تلاش میں تھیں، جس کے لیے انہوں نے دوستوں کے ساتھ گزارے گئے لمحات کو ریکارڈ کرنا شروع کیا۔ وہ کہتی ہیں کہ اگرچہ یہ سرگرمی اب اضافی آمدن کا ذریعہ بن چکی ہے، تاہم وہ اپنی مستقل ملازمت چھوڑنے کا کوئی ارادہ نہیں رکھتیں۔

ان کے مطابق مستقل آمدن اور سہولیات انہیں مالی تحفظ فراہم کرتی ہیں، جبکہ سوشل میڈیا ان کی آمدن میں اضافہ کر رہا ہے۔ وہ ویڈیوز کی تیاری اور اس کی ایڈیٹنگ اپنی ملازمت کے اوقات سے پہلے یا بعد میں کرتی ہیں جبکہ ویک اینڈ پر پورا دن بھی اس کام میں مصروف رہتی ہیں تاکہ ہفتے بھر کے لیے مواد تیار ہوسکے۔ وہ برانڈز کے ساتھ شراکت داری میں محتاط رویہ اختیار کرتی ہیں اور کم معاوضے والی پیشکشیں مسترد کردیتی ہیں۔ ان کی آمدن کا ایک اور ذریعہ افیلی ایٹ لنکس ہیں، جن کے ذریعے ہر دو ہفتے بعد ادائیگی ہوتی ہے جبکہ ایمازون کے افیلی ایٹ پروگرام سے ماہانہ کمیشن بھی حاصل ہوتا ہے۔ پاپلاسکی کے مطابق وہ وائرل ہونے کے بجائے ایک حقیقی اور مضبوط کمیونٹی بنانے پر یقین رکھتی ہیں وہ اپنے آن لائن امیج کو بڑی بہن جیسا رکھنا چاہتی ہیں۔ مالیاتی پلیٹ فارم لومانو کی 2025 رپورٹ کے مطابق، 10 ہزار سے کم فالوورز رکھنے والے نینو انفلوئنسرز کی اوسط سالانہ آمدن 4 ہزار 800 ڈالر تک پہنچ گئی ہے جو 2024 کے مقابلے میں 45 فیصد زیادہ ہے جبکہ 10 ہزار سے ایک لاکھ فالوورز رکھنے والے مائیکرو انفلوئنسرز کی اوسط آمدن 38 ہزار 500ڈالر رہی۔

یو این آئی۔ ع ا۔