واشنگٹن، امریکی صدر ڈونلڈ ٹرمپ نے کہا ہے کہ پاکستانی فیلڈ مارشل عاصم منیر اور پاکستان کے وزیراعظم عظیم ہیں، پاکستانی رہنماؤں نے ایران سے ڈیل میں بہت مدد دی۔

صدر ڈونلڈ ٹرمپ کی جانب سے ایک بار پھر پاکستان کے وزیراعظم اور فیلڈ مارشل عاصم منیر کی تعریف کی گئی ہے۔ صدر ٹرمپ نے امریکی ویب سائٹ کو انٹرویو دیتے ہوئے کہا کہ فیلڈ مارشل عاصم منیر عظیم آدمی ہیں اور پاکستان کے وزیراعظم بھی عظیم ہیں۔ امریکی صدر نے کہا کہ فیلڈ مارشل عاصم منیر اپنے وزیراعظم کا مکمل احترام کرتے ہیں جو بہت خوبصورت بات ہے۔ ٹرمپ نے کہا کہ پاکستانی رہنماؤں نے ایران سے ڈیل میں بہت مدد دی، پاکستانی قیادت ایرانی قیادت اور ایرانی قوم کو جانتی تھی۔

بعد ازاں امریکی صدر ڈونلڈ ٹرمپ نے ایک تقریب سے خطاب کرتے ہوئے کہا کہ چینی صدر سمتبر میں امریکہ کا دورہ کریں گے، ایران کے معاملے میں چین نے بھی اہم کردار اداکیا۔ ڈونلڈ ٹرمپ نے کہا کہ چین ایران سے اپنی ضروریات کا 50 فیصد تیل خریدتا ہے۔

اسرائیل کے ساتھ امریکہ کے بہترین تعلقات ہیں۔ اس کے علاوہ صدر ٹرمپ نے کہا کہ رواں سال کسی وقت دوبارہ چین جاؤں گا۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ ایران کے معاملے میں چین نے اہم کردار ادا کیا۔

غیر ملکی خبر رساں ادارے کے مطابق امریکی ریاست میری لینڈ میں خطاب کرتے ہوئے ڈونلڈ ٹرمپ کا کہنا تھا کہ چین ایران سے اپنی ضروریات کا 50 فیصد تیل خریدتا ہے تاہم ایران کے معاملے میں چین نے اہم کردار ادا کیا۔

انہوں نے کہا کہ چینی صدر ستمبر میں امریکہ کا دورہ کریں گے اور میں رواں سال کسی وقت دوبارہ چین جاؤں گا۔

اسرائیل کے حوالے سے بات کرتے ہوئے امریکی صدر کا کہنا تھا کہ اسرائیل کے ساتھ امریکہ کے بہترین تعلقات ہیں۔

دوسری جانب امریکی ویب سائٹ کو انٹرویو میں صدر ٹرمپ نے کیوبا کے خلاف وینزویلا طرز پر کارروائی کا امکان ظاہر کرتے ہوئے کہا کہ ایسی کارروائی یقیناً ممکن ہے تاہم اس کے لیے کوئی ڈیڈلائن نہیں۔

یو این آئی۔ ع ا۔

واشنگٹن، امریکہ کے خصوصی ایلچی اسٹیو وٹکوف ایران کے ساتھ ممکنہ جوہری معاہدے پر مذاکرات کے لیے سوئٹزرلینڈ روانہ ہو گئے ہیں۔ توقع ظاہر کی جا رہی ہے کہ امریکہ اور ایران کے درمیان بات چیت کا پہلا دور وہیں منعقد ہوگا۔

یہ اطلاع خبر رساں ویب سائٹ ایکسیوس نے ایک نامعلوم امریکی عہدیدار کے حوالے سے دی ہے۔ عہدیدار کے مطابق امریکی صدر ڈونلڈ ٹرمپ کے داماد جیرڈ کشنر پہلے ہی سوئٹزرلینڈ میں موجود ہیں۔

رپورٹ میں کہا گیا ہے کہ ابھی یہ واضح نہیں ہے کہ مذاکرات کے لیے کوئی نیا وقت طے کیا گیا ہے یا نہیں۔ بات چیت جمعہ کو شروع ہونے والی تھی، لیکن لبنان میں اسرائیل اور اور لبنان کی شیعہ تنظیم حزب اللہ کے درمیان لڑائی کی وجہ سے اسے مؤخر کر دیا گیا تھا۔

رپورٹ کے مطابق امریکی وفد کی قیادت نائب صدر جے ڈی وینس کرنے والے تھے، لیکن انہوں نے جمعرات کو اپنا دورہ ملتوی کر دیا اور ابھی یہ بھی واضح نہیں کہ آیا وہ ہفتے کے اختتام تک سوئٹزرلینڈ جائیں گے یا نہیں۔

واضح رہے کہ 14 جون کو ایران اور امریکہ نے تصدیق کی تھی کہ ایک مفاہمتی یادداشت (ایم او یو) پر کام مکمل ہو چکا ہے۔

دونوں ممالک نے 18 جون کی شب اس دستاویز پر دستخط کیے، جس میں 28 فروری سے جاری فوجی تنازع کے خاتمے کی شق شامل ہے۔

اس مفاہمتی یادداشت کے ذریعے دونوں فریقوں کے درمیان کئی ماہ سے جاری کشیدگی کے خاتمے کی جانب ایک اہم پیش رفت ہوئی ہے۔

یہ معاہدہ دونوں ممالک کو ایرانی جوہری مسئلے اور امریکی پابندیوں کے حوالے سے حتمی معاہدے پر مذاکرات کے لیے 60 دن کی مہلت فراہم کرتا ہے۔ اس کے علاوہ یہ امریکہ کے لئے اپنی بحری ناکہ بندی ختم کرنے اور ایران کے لئے آبنائے ہرمز سے تجارتی جہازوں کی آمد و رفت بحال کرنے کی ایک متعین مدت مقرر کی گئی ہے۔

یواین آئی۔الف الف