نئی دہلی، کانگریس نے منگل کو اشارہ دیا کہ وہ اداکار سے سیاست داں بنے وجے اور ان کی پارٹی، تملگا ویٹری کزگم (ٹی وی کے) کو تمل ناڈو میں حکومت بنانے کے لیے حمایت دینے پر غور کر رہی ہے حالانکہ حتمی فیصلہ پارٹی کی ریاستی اکائی کی جانب سے کیا جائے گا ایکس پر ایک پوسٹ میں، کانگریس کے جنرل سکریٹری کے سی وینوگوپال نے کہا کہ وجے نے حکومت بنانے کے لیے پارٹی کی حمایت مانگنے کے لیے رسمی طور پر پارٹی سے رابطہ کیا ہے۔ مسٹر وینوگوپال نے کہا کہ “ٹی وی کے صدر تھیرو وجے نے تمل ناڈو میں حکومت بنانے کے لیے بھارتیہ راشٹریہ کانگریس سے حمایت کی درخواست کی ہے۔ انہوں نے اپنے سیاسی مشن میں پیرومتھلائیور کے۔ کامراج سے ترغیب لینے کی بات بھی کہی ہے۔”

انہوں نے مزید کہا کہ کانگریس تمل ناڈو میں کےانتخابی نتائج کو آئینی اقدار کو برقرار رکھنے کے لیے پرعزم سیکولر حکومت کے مینڈیٹ کے طور پر دیکھتی ہے۔ انہوں نے کہا کہ “تمل ناڈو میں کانگریس کو واضح طور پر یہ مینڈیٹ ملا ہے کہ ایک سیکولر حکومت منتخب کی جائے جو آئین کی لفظی اور معنوی طور پر حفاظت کرنے کے لیے پرعزم ہو۔ کانگریس یہ یقینی بنانے کے لیے پرعزم ہے کہ بی جے پی اور اس کے حامی کسی بھی طرح سے تمل ناڈو حکومت میں نہ آئیں۔”

مسٹر وینوگوپال نے کہا کہ پارٹی قیادت نے تمل ناڈو کانگریس کمیٹی سے زمینی صورتحال کا جائزہ لینے کے بعد درخواست پر حتمی فیصلہ لینے کو کہا ہے۔ انہوں نے مزید کہا کہ “اسی مناسبت سے، کانگریس قیادت نے تمل ناڈو کونسل کو انتخابی نتائج میں جھلکتے ریاست کے جذبات کو مدنظر رکھتے ہوئے تھیرو وجے کی درخواست پر حتمی فیصلہ لینے کی ہدایت دی ہے۔”

یہ پیش رفت تمل ناڈو میں اسمبلی انتخابات کے نتائج کے بعد کی غیر مستحکم سیاسی صورتحال کے درمیان سامنے آئی ہے، جہاں پارٹیاں اکثریت حاصل کرنے اور اگلی حکومت بنانے کے لیے اتحاد کے امکانات تلاش کر رہی ہیں۔ الیکشن کمیشن کے مطابق، تمل ناڈو اسمبلی کی 234 سیٹوں میں سے ٹی وی کے کو 108 سیٹیں ملی ہیں۔ کانگریس کو پانچ سیٹیں ملی ہیں جبکہ حکومت بنانے کے لیے کسی بھی جماعت یا اتحاد کو 118 سیٹوں کی ضرورت ہوگی۔

ریاست میں اتحاد کی سیاست میں کانگریس روایتی طور پر ایک اہم رول ادا کرتی رہی ہے اور اکثر بھارتیہ جنتا پارٹی کے اثر و رسوخ کا مقابلہ کرنے کے لیے علاقائی پارٹیوں کے ساتھ اتحاد کرتی رہی ہے۔ وجے کی سیاسی رسائی اور کانگریس کے ایک معزز لیڈر اور سابق وزیراعلیٰ کامراج کا ذکر کرنا، ریاست میں حکومت کی تشکیل کے حوالے سے بات چیت تیز ہونے کے ساتھ ہی اپنی پارٹی کو ایک وسیع سیکولر اور علاقائی سیاسی ساخت قائم کرنے کی کوشش کے طور پر دیکھا جا رہا ہے۔

یو این آئی۔ این یو۔

نئی دہلی گرو دیو ربیندر ناتھ ٹیگور کے یومِ پیدائش 25 بیساکھ (نو مئی) کو مغربی بنگال میں بھارتیہ جنتا پارٹی (بی جے پی) کی نئی حکومت کی حلف برداری کی تقریب ہو سکتی ہے واضح رہے کہ ٹیگور کا یومِ پیدائش ہر سال بنگالی مہینے کی 25 تاریخ یعنی بیساکھ کو منایا جاتا ہے اور یہ دن بنگال کے لوگوں کے لیے کافی اہمیت رکھتا ہے۔ ریاست کے لوگ نوبل انعام یافتہ ٹیگور کے یومِ پیدائش کو کافی دھوم دھام سے مناتے ہیں اور اس دن ریاست بھر میں مختلف قسم کے پروگراموں کا انعقاد کیا جاتا ہے۔

ذرائع سے ملی اطلاع کے مطابق اس دن ریاست میں بی جے پی کی نئی حکومت کی تشکیل کے لیے حلف برداری کی تقریب منعقد ہو سکتی ہے۔ اس سے قبل بی جے پی کے مرکزی مبصر اور مرکزی وزیر داخلہ امت شاہ کی صدارت میں آٹھ مئی کو کولکتہ میں پارٹی کی قانون سازپارٹی کی میٹنگ ہو سکتی ہے جس میں ریاست کے نئے وزیر اعلیٰ کا انتخاب کیا جائے گا۔ ذرائع نے بتایا کہ آٹھ مئی کو ہی ریاست میں پارٹی کے لیڈر کے نام کا اعلان ہو سکتا ہے اور نو مئی کو گرو دیو ربیندر ناتھ ٹیگور کے یومِ پیدائش کے موقع پر حلف برداری کی تقریب کا انعقاد کیا جا سکتا ہے۔

بی جے پی نے ریاست میں قانون سازپارٹی کی میٹنگ کے لیے مسٹر شاہ کو مرکزی مبصر اور اڈیشہ کے وزیر اعلیٰ موہن چرن ماجھی کو شریک مبصر مقرر کیا ہے۔ مغربی بنگال بی جے پی کے صدر سمک بھٹاچاریہ نے بھی نو مئی کو نئی حکومت کی حلف برداری کی تقریب منعقد کرنے کا اشارہ دیا ہے۔

ریاست میں بی جے پی تاریخی جیت درج کرتے ہوئے پہلی بار حکومت بنانے جا رہی ہے اور اس کے لیے بی جے پی کولکتہ میں شاندار پروگرام منعقد کرنے کی تیاریاں کر رہی ہے۔ بی جے پی کی نئی حکومت کی حلف برداری کی تقریب میں وزیراعظم نریندر مودی نیز بی جے پی اور این ڈی اے کے زیر اقتدار ریاستوں کے لیڈروں کے شامل ہونے کی امید ہے، جس کو لے کر سکیورٹی ایجنسیاں بھی چوکس ہیں۔ ہندوستان کی سیاست میں اس تبدیلی کو کافی اہم قرار دیا جا رہا ہے۔

یواین آئی۔ایف اے

نئی دہلی، لوک سبھا میں اپوزیشن لیڈر راہل گاندھی نے ایک بار پھر انتخابی عمل پر سنگین سوال اٹھاتے ہوئے “ووٹ چوری” کا الزام لگایا ہے۔ انہوں نے سوشل میڈیا کے ذریعے مرکزی حکومت اور الیکشن کمیشن کی جانبداری پر سوال اٹھائے۔

مسٹر راہل گاندھی نے بدھ کو کہا کہ “ووٹ چوری سے کبھی سیٹیں چرائی جاتی ہیں، کبھی پوری حکومت۔” انہوں نے دعویٰ کیا کہ لوک سبھا میں بی جے پی کے 240 ارکان پارلیمنٹ میں سے “تقریباً ہر چھٹا رکن پارلیمنٹ ووٹ چوری سے جیتا ہے۔” انہوں نے طنز کرتے ہوئے کہا کہ ایسے لوگوں کو کیا بی جے پی کی زبان میں “گھس پیٹھیا” کہا جانا چاہیے۔ ہریانہ کا ذکر کرتے ہوئے مسٹر راہل گاندھی نے کہا کہ “وہاں تو پوری حکومت ہی ‘گھس پیٹھیا’ ہے۔” انہوں نے الزام لگایا کہ جو اداروں کو اپنے کنٹرول میں رکھتے ہیں اور ووٹر لسٹوں و انتخابی عمل میں ہیر پھیر کرتے ہیں، وہ خود “ریموٹ کنٹرول” سے چل رہے ہیں۔ مسٹر گاندھی نے یہ بھی کہا کہ منصفانہ انتخابات ہونے پر برسراقتدار جماعت 140 سیٹوں کے آس پاس بھی نہیں پہنچ پائے گی۔

اس دوران، مغربی بنگال اسمبلی انتخابات کے نتائج کے تعلق سے بھی سیاست تیز ہوگئی ہے۔ وزیراعلیٰ ممتا بنرجی سمیت اپوزیشن کے کئی بڑے لیڈروں نے الیکشن کمیشن اور مرکزی حکومت پر سوال اٹھائے ہیں۔ واضح رہے کہ بی جے پی نے مغربی بنگال میں تاریخی جیت درج کرتے ہوئے ترنمول کانگریس کے 15 سال پرانے اقتدار کا خاتمہ کر دیا ہے۔ بی جے پی لیڈروں نے راہل گاندھی کے الزامات کو سرے سے مسترد کرتے ہوئے اسے ہار کی مایوسی قرار دیا ہے اور کہا ہے کہ الیکشن کمیشن ایک آزاد ادارہ ہے، جس پر اس طرح کے الزامات جمہوری اداروں کو کمزور کرتے ہیں۔

یو این آئی۔ این یو۔